Plơ̆ sĭt jay jêh 5 nar hăn rlu rlău ta Ntŭk mât uănh nuĭh geh soan bah n’gor Dak Lak, tahen ơm Y Siêng Niê, ƀon Chiêng Kao, xă Đăk Phơi, nkuăl Lắk hôm e geh nău răm rhơn:

“Hăn răm ngăn, ngêt sa dŭt kah, mât uănh dŭt uĕh. N’gor Nghệ An geh đŏng, n’gor Sóc Trăng geh đŏng, nkuăl Ea Kar aơ, nkuăl Buôn Đôn aơ, nkuăl Ea Súp aơ, nkuăl Cư Kuin aơ ndrel mprơ “5 anh em trên một chiếc xe tăng”, jêh nĕ “nổi lửa lên em”, răm ngăn, măng mprơ đŏng, nkoch nău kăl e, ntŭk aơ gâp lơh, ntŭk ri gâp lơh. Nung nar ri hăn pâl war nkual ƀon têh Buôn Ma Thuột”.

Tâm jay mhe ƀư, nô Y Mực Liêng, kon bu klô bah tahen sôt rmanh Y Hiên Ông, ta ƀon Sruông, xă Bông Krang, nkuăl Lắk an gĭt, mô hôm rwê mih duh jêng nuih n’hâm n’hanh săk soan bah bơ̆ nô uĕh dŭt âk, rnăk wâl đăp mpăn ƀư sa, hun hao wăng sa:

“Bơ̆ geh soan đah cách mạng n’hanh pơk dơi ntop kơl du khay 3 rkeh prăk n’hanh ngih dak ntop kơl tay 50 rkeh prăk, rnăk wâl manh tay gay ƀư jay an bơ̆. Knơm geh ngih dak ntop kơl prăk gay mĭn an bơ̆ n’hanh gŭ âm ăp nar dơi kơl mât uănh săk soan uĕh lơn. Gâp dăn lah uĕh n’gâng kan ƀon lan lĕ hăn chop khâl n’hanh an ndơ an bơ̆”.

Tĭng wa Phạm Thị Lệ Vân, jrô kan Lao động Thương binh n’hanh Xã hội nkuăl Lắk, lĕ rngôch 1489 nuĭh dơi kơl, nuih geh soan ta nkuăl lĕ dơi mât uănh uĕh n’hanh geh rnoh nău rêh âk lơn rnoh rĭng nsum. Aƀaơ nkuăl dôl rgum kơl gay mô hôm rnăk an rêh jêr jŏt.

“Đah nkuăl Lắk ri trong kan nkoch trêng n’hanh trok prăk ntop kơl an nuĭh ri uĕh ngăch, yơn hôm e 12 rnăk geh nuĭh tâm rnăk ach o. Gay nsrôih an 12 rnăk nĕ rklaih ach o ri ƀư sam ƀŭt mbơh tât N’gâng kan Lao động ri geh trong nchrăp bôl dĭng ndơ geh ăp rnăk ri ntop kơl jay, lah geh jay hôm ntop kơl ndrôk mô lah ntil tơm tăm mô lah ntop kơl ndrôm sam ƀŭt ntêm nkrem prăk”.

Tĭng n’gâng kan Lao động Thương binh n’hanh xã hội n’gor Dak Lak, aƀaơ lam n’gor geh rlău 45.000 nuĭh geh soan đah cách mạng, tâm nĕ rlău 10.000 nuĭh dôl geh ntop kơl ăp khay. Tâm ăp năm bah năp, ăp nău ƀư mât uănh an nuĭh geh soan n’hanh rnăk dơi kơl dơi n’gor Dak Lak uănh tât di nuĭh. Êng tâm năm aơ, n’gor lĕ ƀư âk rơh đah bơi 400 nuĭh geh soan hăn rlu rlău rgum, hăn nsong pâl nđaih; ƀư hăn khâl, an ndơ an ăp nuĭh geh soan đah dĭng lĕ prăk rlău 15 rmen prăk. Di 27/7 năm aơ, n’gor an rlău 6 rmen prăk gay mât uănh an nuĭh geh soan n’hanh rnăk wâl dơi kơl.

Bôl ndrĭ, wa Nguyễn Quang Thuân, Groi Giám đốc N’gâng kan Lao động Thương Binh n’hanh xã hội n’gor Dak Lak an gĭt, kơp tât dŭt năm 2022, n’gor hôm e rlău 900 rnăk dơi kơl tâm rnăk ach o tĭng rnoh an ƀư âk trong, rlău 600 rnăk hôm e jêr jŏt mpeh jay gŭ. Năm tât, n’gor mbra rgum ăp tơm prăk gay mô hôm rnăk ach o tâm rnăk dơi kơl n’hanh geh soan đah cách mạng.

“Nsrôih tât lĕ năm 2024 mbra ntơm jêh mkra đah ăp rnăk dơi kơl aƀaơ dôl jêr jŏt đah jay gŭ, tal 2 lah ndơ̆ rklaih luh ach o. Rklaih luh ach o ta aơ geh âk nkô̆ nău, nkô̆ nău mpeh âk trong ri geh âk rnoh ndơ ƀư mbra dơi tâm rgop đah ăp n’gâng kan nău kan tĭng nău bah N’gâng kan nĕ mât uănh gay geh nău kan mkra n’hanh đah ăp rnăk mô hôm geh soan pah kan mô lah mô geh ndơ nkra njêng pah kan ri dăn đă ndơ̆ an ntop kơl nău rêh jêng ăp khay n’hanh ndơ̆ luh săk rnăk ach o. N’gor mbra geh âk trong mkra uĕh ngăn gay mkra kơl ăp rnăk dơi kơl”.