Đah trong rƀŏng "Mô an geh du hê nuĭh ntlơi êng bah kơi", tâm ăp nar dja, n'gâng kan ta ntŭk, ăp mpôl kan nsum mpôl n'hanh ăp doanh nghiệp, nuĭh lŏng nuih n'hâm ta Dak Lak dôl ƀư âk bôk nău kan pă nklâm ndơ Tết an ăp rnăk geh nău rêh jêr jŏt. Nău kan dja hŏ kơl an hang rbăn rnăk ach o ta Dak Lak geh tay ndơ răm mƀak rnôk Tết tât năm mhe sĭt.

Dơn nklâm ndơ rnoh khlay 1 rkeh prăk n'hanh phiếu rvăt ndơ 0 đồng tă bah Liên đoàn Lao động n'gor Dak Lak pă an, nô Y Krich Êban, xã Ea Tul, nkuâl Cư M’Gar lah công đoàn viên Công đoàn cơ sở Ntŭk rgum mât dak kloh uĕh n'hanh rgum ndŏk ƀon lan n'gor Dak Lak nkoch, lôch bar năm geh nău tât khuch bah nuh srê COVID-19, nô n'hanh âk nuĭh kan mâp jêr jŏt tâm nău rêh. Nklâm ndơ dja geh dŭt khlay, kơl rnăk nô wơt Tết Quý Mão răm mƀak, uĕh lăng lơn:

"Mô dơn êng du hê gâp ma lĕ rngôch ăp nuĭh kan mâp jêr jŏt lơn, geh nuĭh ri roh nău kan, geh nuĭh ri lap kơt gâp dơi Sở Nông nghiệp ký ton nău kan jŏ jong. Rnăk dŭt jêr jŏt ngăn, rnôk dơn geh nklâm ndơ dja ri rnăk dŭt rhơn nđơr tâm khay Tết năm aơ"

Đah oh Y Hổ H’Mok ta buôn Kom Leo xã Hòa Thắng, nkual ƀon têh Buôn Ma Thuột, du bôk ndeh wah jâng tă bah Hội Chữ thập đỏ nkual ƀon têh Buôn Ma Thuột rgŏ jă ăp nuĭh lŏng nuih n'hâm pă an nklâm ndơ rnôk Tết dja lah nklâm ndơ dŭt geh nkô̆ khlay ngăn. Ndeh wah jâng mbra kơl oh lăp tât năm mhe mô hôm kâp dâk ơm gay hăn jâng tât nhih nti Tết dja Y Hổ mbra rdeng oh he ma ndeh wah jâng mhe gay hăn pâl đah ăp băl tâm ƀon:

"Ntơm nơh mô geh ndeh wah jâng gâp hăn nti rgănh ngăn, dơn geh ndeh wah jâng gâp dŭt rhơn, gâp nsrôih kơt nti gay mô hât dơm ăp nuĭh kơl".

  Tâm jay mhe mon têh hvi, nđik uĕh, nô Trịnh Thế Hậu, ta phường Thiện An, thị xã Buôn Hồ an gĭt, nô geh 23 năm pah kan tâm n'gâng kan ntĭm nti; dah âk năm rlău aơ rnăk wâl jêr jŏt, săk nô nơm hôm geh ji klơm ân săm dŭt roh huach âk prăk jêng mô geh ndơ ma ƀư mon êng jay ma hôm gŭ nsum n'hanh me bơ̆. Năm 2021 nô Hậu geh ur geh kon, gŭ jay nsum jêng lhăt nchep. Saơ nău  rêh jêr jŏt bah nô Hậu, khay 10 năm 2022 công đoàn n'gâng kan ntĭm nti Dak Lak hŏ ntop kơl nô Hậu 50 rkeh prăk gay ƀư jay n'hŭt răm công đoàn. Di tâm rnôk Tết jay hŏ ƀư lôch jêh n'hanh n'glăp dŏng.

"Rđĭl đah ăp năm bah năp nơh ri năm aơ rnăk mpôl hên geh jay mhe ri dŭt rhơn mƀak, đăp mpăn gŭ pah kan đŏng. Wơt Tết tâm nău rhơn mƀak bah ur sai lah nkre geh oh bê mhe nkre geh jay gŭ mhe nău pah kan đăp mpăn n'hanh dơi geh nău mât uănh khlay bah công nhân viên chức nuĭh kan ri mpôl hên lah uĕh nău kơl bah lĕ rngôch ăp băl ndrel kan".

Tĭng wa Nguyễn Quang Thuân, Groi Giám đốc Sở Lao động n'hanh Thương binh xã hội n'gor Dak Lak, nkhêp geh rnôk Tết Nguyên đán Quý Mão 2023, UBND n'gor Dak Lak ntêm an 76 rmen prăk gay pă nklâm ndơ an ăp nuĭh, ăp mpôl kan ntoh lư. Hang rbăn nklâm ndơ ntop kơl rnăk ach o, rnăk dăch kêng ach o n'hanh nuĭh kan geh nău rêh jêr jŏt dơi ăp nsum mpôl, doanh nghiệp n'hanh ăp nuĭh way hăn kơl ndơ̆ tât ti nuĭh ƀon lan tâm rnôk dja.

"Năm aơ n'gor rđău đă an ăp nkuâl, thị xã, nkual ƀon têh; ăp xã, phường, thị trấn mbra ƀư tay ăp nău kan gay pă nklâm ndơ an ăp nuĭh ach o ta n'gor, êng n'gor ri njêng 8 mpôl hăn  pah kan gay ôp khâl ăp nuĭh dơi kơl n'hanh chop khâl ăp nuĭh gŭ kâp chăm Tết. Bah meng tơm prăk bah n'gor ntop kơl ri n'gor hŏ rđău đă an Hội chữ thập đỏ, Mặt trận n'hanh ăp nsum mpôl êng ƀa ƀă nsrôih rgŏ jă  ăp doanh nghiệp, ăp nuĭh kan ta n'gor gay mât chăm an  nuĭh ach o gay mô geh du hê nuĭh ntlơi êng bah kơi".

Ăp nklâm ndơ geh nkô̆ khlay ndơ̆ tât ti nuĭh geh nău rêh jêr jŏt tâm rnôk Tết hŏ kơl an khân păng răm tay nuih n'hâm, ntop tay suan ntrôl gay khân păng nsan hao tâm nău rêh n'hanh mpŏng năm mhe geh âk nău rhơn mƀak lơn./.

Nam Trang/Nuĭh rblang: Điểu Thân