Ta  xã nkual jru ngai Yang Mao, nkuâl Krông Bông (Dak Lak), Công ty Schneider Electric Việt Nam kan nsum đah n'gâng kan ta ntŭk ƀư pă an 60 máy tính cheng ti an Nhih nti THCS Yang Mao n'hanh Thư viện đa năng buôn Kiều xã Yang Mao, pă an học bổng an ăp kon se nti ta buôn Kiều dôl tĭng nti ta ăp nhih nti tâm xã. Rơh pă nklâm ndơ lah du gâl bah bôk nău kan kơl nuĭh geh moh "Mpoh chrat ang Buôn Kiều -Light up Buon Kieu” bah ăp mpôl kan kơl êng nuĭh. Tâm nê, geh 30 máy tính pă an Nhih nti THCS Yang Mao, n'hanh 30 mblâm pă an Thư viện đa năng buôn Kiều, ndrel đah rnoh kơl internet. Rlău  ma nê, mpôl hăn hôm kơl 20 nklâm học bổng an ăp kon se nti ta buôn Kiều, geh nău rêh jêr jŏt yơn geh nău dơi uĕh tâm kơt nti, ăp nklâm ndơ rnoh khlay 1 rkeh prăk.

Nai ntĭm Trần Hữu Phước-Hiệu trưởng Nhih nti THCS Yang Mao, xã Yang Mao, nkuâl Krông Bông an gĭt, ndơ dŏng nti bah ăp kon se nti ta buôn Kiều dŭt jêr jŏt, dơi ăp đơn vị pă an học bổng n'hanh kơl an máy tính mbra nta trong dơh uĕh lơn an nău kan ntĭm n'hanh nti ta nkual dja.

“Nhih nti geh du jrô máy vi tính đŏng yơn dơi ntrŭp bah năm 2013 n'hanh aƀaơ mô hôm dơi dŏng đŏng ôh. Nar aơ dơi pă an máy tính dja ri dŭt uĕh ngăn, mbra ntop kơl uĕh lơn an pah kan ntĭm n'hanh nti bah nhih nti. Ăp kon se mbra dơi  tât đah công nghệ thông tin, pơk joi nău kơt nti ta internet gay ăp kon se nti uĕh lơn tâm let năp tay.”

  Buôn Kiều, xã Yang Mao lah ngoăy tâm ăp buôn gŭ ta nkual jru ngai dŭt jêr jŏt bah nkuâl Krông Bông, n'gor Dak Lak. Lam buôn geh 130 rnăk, 628 nuĭh, rnoh âk rnăk ach o bơi 45%.  Ndrel đah nău mât uănh khlay bah Ngih dak, ăp năm mhe aơ buôn Kiều dơi ăp mpôl lŏng nuih n'hâm kơl rdâk  njêng thư viện đa năng, trong pă an dak dŏng n'hanh ntop kơl kon si ntil, phân poh gay hun hao tuch tăm./.

VOV/Nuĭh rblang: Điểu Thân