Tĭng ƀư trong leo tâm rlong “Kơl an nuĭh ach o- mô an geh du hê nuĭh ndul êng bah kơi”, tâm ăp năm aơ Ủy ban Mặt trận Tổ quốc Việt Nam n’gor Dak Lak an ƀư âk nău kan ngăn ngăn gay tâm kơl nuĭh ach o nsan hao đăp mpăn nău rêh, tâm nê  geh nău tĭng ƀư bôk nău kan ntop kơl jay tâm rnglăp. Âk jay mhe rgâl an jay truh sat, hŏ kơl an ăp nuĭh ach o jêr jŏt saơ răm nuih n’hâm lơn tâm nău tâm rŏng bah nsum mpôl lam ƀon  lan.

Rnăk yuh Vũ Thị Thúy ta thôn Ea Bring, xã Băng Adrênh, nkuâl Krông Ana mâp dŭt âk jêr jŏt. Sai way geh kop ji mbro, săk nơm hôm mô geh nău kan đăp mpăn, jêng nău rêh sa mô ăp nđăp mô tŏng. Năm 2021 rnăk yuh Thúy dơi Ủy ban Mặt Trận Tổ quốc Việt Nam nkuâl Krông Ana ntop kơl 50 rkeh prăk gay rdâk njêng jay tâm rnglăp. Ndrel đah rnoh prăk manh, nău kơl mpeh nar luh kan bah ƀon lan, jay mon gưl 4 rnoh khlay rlău 100 rkeh prăk hŏ ƀư lôch jêh. Lôch geh jay đăp mpăn yuh Thúy hŏ manh tay tơm prăk thuk bah ngân hàng chính sách xã hội gay ntuh kơl rvăt năp ăp ndơ dŏng kan tuch tăm, kon si ntil ndơ mât rong.

“Bar hê ur sai ŭch ƀư geh du mblâm jay yơn rnăk jêr jŏt ngăn. Dơi pah kan Mặt trận, ăp nsum mpôl kơl rnăk gâp geh du rnoh prăk gay ƀư jay têh hvi kloh uĕh, lôch nê gâp dơi geh nău kơl bah hội bu ur kơl gâp du rnoh prăk gay sĭt mât rong đŏng. Gâp hŏ dăn klaih rlău ach o gay rong tay an ăp rnăk êng ƀa ƀă yor gâp hŏ dơn geh ndơ ntop kơl dŭt âk, gâp dăn lah uĕh ngăn.”

Wa Lãnh Như Biểu ta Buôn Ea Pri, xã Ea Wer, nkuâl Buôn Đôn lah nuĭh dơi gŭ rêh đăp mpăn tâm jay tâm rnglăp lôch âk năm ach o jêr jŏt. Lơn lah ntơm bah rnôk geh n’glaih chong, n’hâm suan djôr, jay tâm rnglăp nâp nâl, răm mƀak, lơn ma khlay đah păng:

“Ntơm nơh gŭ ta jay huyêt jê̆, truh sat yor nău rêh jêr jŏt mô dơi ƀư jay jêng mih sial păng truh, aƀaơ Mặt trận kơl ƀư jay dja ri gâp dŭt rhơn lah uĕh mpeh Mặt trận, dăn lah uĕh ngăn.”

Wa Mai Tri Phúc, Groi kruanh Ủy Ban Mặt trận Tổ quốc Việt Nam nkuâl Buôn Đôn an gĭt, nkuâl geh 18 rnoi nuĭh oh nô ndrel gŭ rêh, tâm nê ƀon lan rnoi mpôl đê̆ âk rlău 47%. Wăng sa bah nkuâl lơn âk lah tuch tăm, yơn tă bah neh ntu kro ntang, jêng nău rêh bah kônh wa mâp âk jêr jŏt, rnăk ach o âk, rnoh  rnăk mô hŏ geh jay nâp uĕh âk đŏng. Ăp năm rlău aơ Ủy Ban Mặt trận Tổ quốc Việt Nam nkuâl Buôn Đôn hŏ n’hao dăng pah kan nkoch trêng, rgŏ jă ndăn nău kơl, ndơ kơl bah lam rêh jêng kon nuĭh gay kơl an ăp nuĭh ach o tâm nkuâl geh  tay ăp mblâm jay têh uĕh:

“Lơn âk  kônh wa ach o đŏng, jêng nkô̆ nău jay gŭ truh sat ri dŭt jêr, tơm ndơ ri mô tŏng geh. Ăp năm mpôl hên nkhêp geh khay 11 lah khay kan an nuĭh ach o gay n’hao trong leo kan gay n’hao nău nkoch trêng n’hanh rgŏ jă lam trong kan chính trị lăp kan gay mhâm ƀư ndơ ndơ geh kơl dŭt âk”.

Nơm geh nău tât râng bah ăp rơh kơn ƀon lan n’hanh nsum mpôl doanh nghiệp, ntơm bah năm 2021 tât aƀaơ n’gor Dak Lak hŏ rgŏ jă geh bơi 60 rmen prăk. Ndrel đah rlău 7 rmen prăk bah prăk nkrem an “nuĭh ach o” Trung ương n’hanh ăp n’gor êng njuăl ntop kơl Dak Lak, hŏ geh rlău 1.138 mblâm jay tâm rnglăp dơi rdâk njêng n’hanh nkra; 173 rnăk dơi ntop kơl prăk rvăt lŭ loih choih xi măng, kon si ntil…Nơm geh kơt nê̆, lvang năm 2021-2023 rnoh rnăk ach o ta n’gor Dak Lak hŏ rĭng hŭch 1,64-1,81% năm, tâm nê rnoh âk rnăk ach o tâm ƀon lan rnoi mpôl đê̆  rĭng hŭch 3,33%-3,66%. Wa Y Giang Gry Niê Knơng, Kruanh Ủy Ban Mặt Trận Tổ quốc Việt Nam n’gor Dak Lak an gĭt:

 “Nău rđău kan bah gưl ủy ăp gưl hôm ăp mpôl kan đảng tâm dâng n’hanh lơn lah nău kan nsum bah n’gâng kan ta ntŭk n’hanh lơn lah nău nsum ti, rgop suan bah lĕ rngôch ƀon lan tâm rdâk  njêng jay tâm rnglăp an kônh wa. Jay mhe dŭt geh nkô̆ khlay đah ăp rnăk ach o, ƀư an nuih n’hâm khân păng gơih nđơr tâm pah kan jan sa; tâl bar đŏng lah an nuĭh ƀon lan saơ dơi trong kan bah ngih dak tâm pah kan jut jăng ji ngot n’hŭch ach o, lăp nsum đah rgŏ jă bah Chính phủ ri n’gor Dak Lak rgŏ jă trong leo rdâk njêng jay tâm rnglăp an rnăk ach o tâm let năp tay đŏng.” 

Ăp mblâm jay “tâm rnglăp” răm mƀak nău tâm rŏng dơi ƀư lôch jêh an ăp rnăk ach o ta Dak Lak lah nklâm ndơ geh nkô̆ hôr khlay bah ăp gưl n’gâng kan n’hanh nău nsum suan bah lam mpôl an rnăk ach o jêr jŏt mpeh jay gŭ. Nê hôm lah tơm ndơ nđơr têh, nsĭt tay nău rhơn, mƀak, kơl rnăk ach o đăp mpăn pah kan jan sa, tuch tăm mât rong, hun hao wăng sa rnăk wâl, nsan hao klaih rlău ach o jŏ jong./.