Ôi nđaơ (12/9) N’gor ủy Dak Lak ƀư rƀŭn nchră n’glôch jêh 20 năm ƀư tĭng trong kan njêng oh nô đah ăp ngih pah kan, ntŭk kan, doanh nghiệp đah ăp ƀon lan rnoi mpôl đêt ta lam n’gor lvang 2014-2024. Ăp ntŭk kan njêng oh nô uănh tât kơl kônh wa jŭt jăng ach o, đah trong ƀư ntop kơl tơm tăm, mpa rong, phân poh, dak si tu ndrung; đă cán bộ tâm rgop đah cán bộ ntrŭt nsôr pah kan ntĭm nuĭh ƀon lan njêng oh nô rgâl ntil tơm tăm n’hanh kỹ thuật mât chăm tơm tăm, mpa rong. Săk rnglăy, ăp ngih pah kan, ntŭk kan ăp gưl lĕ đă rlău 212.000 cán bộ hăn ƀon njêng oh nô, an rlău 200.000 nklâm ndơ, đah dĭng lĕ rnoh prăk 262 rmen prăk n’hanh âk nkô̆ nău ntop kơl êng.

Gay trong kan njêng oh nô hăn lăp ngăn, ƀư tĭng nău rƀŏng, nkô̆ nău, năm tât, wa Nguyễn Đình Trung, Ủy viên TW Đảng, Bí thư N’gor ủy Dak Lak đă ăp ngih pah kan, ƀon lan rgâl mhe nkô̆ nău, trong mkra njêng oh nô đah ƀon rnoi mpôl đêt ta ntŭk ta lam n’gor an tâm di đah nău ŭch hun hao wăng sa, văn hóa rêh jêng tâm nu nău aƀaơ.