Tâm năm 2022, Prăk nkrem ntop kơl ƀon lan kan lŏ mir Dak Lak hŏ rgum geh rlău 5 rmen prăk, n'hao lĕ rngôch tơm prăk tât rlău 52 rmen prăk kơl ƀon lan kan lŏ mir hun hao  tuch tăm mât rong rgop jut jăng ji ngot n'hŭch ach o.  Bah tơm prăk nkrem ntop kơl ƀon lan kan lŏ mir, ăp gưl Hội nông dân n'gor Dak Lak hŏ an bơi 2.500 rnăk manh rlău 52 rmen prăk gay ntuh kơl hun hao wăng sa rnăk wâl.

Ndrel đah nê, Hội kan nsum đah Ngân hàng Chính sách xã hội, Ngân hàng Nông nghiệp an rlău 15 rbăn rnăk ƀon lan kan lŏ mir manh đah tơm prăk n'gluh an manh rlău 600 rmen prăk. Nkre tĭng ƀư nsing nơm an manh đah ăp doanh nghiệp kơl ƀon lan kan lŏ mir rvăt bar pe jât rbăn tấn phân  poh, ndơ siăm mât rong tĭng trong tâm mbrơi, đah lĕ rngôch rnoh khlay rlău 70 rmen prăk. Gay dŏng saơ luh ntil tơm prăk manh, tâm năm 2022, Hội nông dân Dak Lak ndrel hăn tay đah kônh wa tâm rnôk mât chăm, mât rong, nsrôih an ƀư ăp nău kan ntop kơl ƀon lan kan lŏ mir tât đah rgâl mhe khoa học, công nghệ; nkoch n'hơ, tăch ndơ geh ƀư tuch tăm mât rong. Nkoch mpeh nsĭt geh bah tơm Prăk nkrem  ntop kơl an ƀon lan kan lŏ mir, wa Lại Thị Loan, Kruanh Hội nông dân n'gor Dak Lak an gĭt:

“Bah tơm prăk nkrem hŏ geh dŭt âk rnăk ƀon lan kan lŏ mir tâm rgop kan tuch tăm  mât rong n'hanh njêng dơi ăp rmôt tâm boh, ăp hợp tác xã ăp chi hội nghề nghiệp. N'hanh mô dơn hun hao wăng sa ăp rmôt nuĭh lăp kan nsum tâm ăp trong nchrăp kan ma hôm kơl ăp hội viên êng ƀa ƀă wăr kiău ma mpeh nar luh kan, mpeh rgâl nău mĭn trong kan n'hanh hŏ kơl an âk hội viên ƀon lan kan lŏ mir nsan hao klaih rlău ach o. Bah tơm prăk nkrem ntop kơl ƀon lan kan lŏ mir tĭng ƀư geh nău dơi ăp trong nchrăp kan rgâl mbrô lôch nê rgâl bah trong ntĭt leo tuch tăm mât rong jê̆ chrai jêng tâm rgop kan tuch tăm mât rong têh đŏng".

VOV Tây Nguyên/Nuĭh rblang: Điểu Thân