Kêng măng 22/2, Hội đồng Ntop kơl Prăk nkrem ntop kơl kon se n'gor Dak Lak ƀư Tâm nchră mbơh lôch jêh tĭng ƀư trong ntop kơl kon se năm 2022 n'hanh an ƀư trong nchrăp ntop kơl an kon se năm 2023. Năm 2022, Prăk nkrem ntop kơl kon se n'gor Dak Lak hŏ rgŏ jă geh bơi 8 rmen prăk, ntop kơl rlău 9.000 tơ̆ kon se. ăp nău kan ntop kơl lah: Nău kan mât chăm n'hâm suan n'hanh ndơ sa sĭt săk suan an kon se kơt bôk nău kan sơch but săm lor an kon se geh nău ji play nuih ơm bah ndŭl me, but săm ăp ntil nău ji mpeh măt n'hanh phăt dơm dak si.

Nău kan ntop kơl ntĭm nti kơt rdâk njêng jrô nti n'hanh pă an ndơ dŏng ntĭm nti, pâl rlưn an kon se ta nkual jru ngai, pă an học bổng an kon se geh nău rêh jêr jŏt gơih nti, pă an ndeh wah jâng n'hanh ndơ dŏng nti an kon se nti; nău kan mât njrăng kon se kơt: ntop kơl kon se geh nău tât rmoh rmanh, rmok dak, bu lơh dong, ntưp nău ji jŏ bah, kon đơi lĕ me n'hanh bơ̆, ntop kơl an kon se geh me bơ̆ khĭt tă bah nuh srê COVID – 19 n'hanh rdâk njêng jay tâm rŏng an kon se geh nău rêh jêr jŏt, kon đơi...Nkhêp geh rnôk dja, kruanh rđău kan n'gor Dak Lak dăn đă ăp gưl, ăp n'gang kan geh tât ân ndrel hăn Prăk nkrem ntop kơl kon se n'gor gay buăt nthoi, nkoch mbơh ăp bôk nău kan, ăp nuĭh ntuh kơl, ăp mpôl kan bah dih chính phủ gay n'hao âk tơm ndơ ntop kơl an kon se.