Prao khay bôk năm 2023, Ntŭk rgum rhŏ dŏng nău kan Dak Lak dơn geh 6.000 hồ sơ dăn sa prăk bảo hiểm roh nău kan, hao 165 hồ sơ rđĭl đah ndrel khay dja năm 2022. Tâm lĕ rngôch rnoh 6.000 nuĭh ndơ̆ hồ sơ dăn đă sa prăk bảo hiểm roh nău kan, geh 4.200 nuĭh kan ta ăp n’gor êng, 1.800 nuĭh kan ta n’gor nơm. Ntŭk rgum mbơh joi nău kan Dak Lak hŏ năl di hồ sơ n’hanh nsŏng kơl an nhih pah kan geh nău dơi kan n’gluh an 5.700 quyết định geh sa prăk ntop kơl roh nău kan, đah rnoh prăk sŏk ndơ̆ 90 rmen prăk.

Wa Nguyễn Văn Cường, Groi Giám đốc Ntŭk rgum mbơh joi nău kan n’gor Dak Lak an gĭt, nhih pah kan hŏ kan nsum lhăt đah nhih pah kan Bảo hiểm xã hội gay nkra ngăch ăp jêr jŏt, kŏ kol ntoh luh tâm rnôk tĭng  ƀư trong kơl prăk bảo hiểm roh nău kan, đăp mpăn nău dơi an nuĭh kan. Ndrel đah nê, Ntŭk rgum mbơh joi nău kan pah kan, mbơh nti nău kan an nuĭh kan gay khân păng ơm joi geh nău kan tâm di đŏng./.