Nar 8/3, UBND n'gor Dak Lak ƀư Tâm nchră sŏk nău rgop ƀon lan đah trong nchrăp Luật neh ntu (rgâl nkra). Âk nău rgop mpeh jao neh, an manh neh, nău ŭch dŏng neh, sŏk mplơ̆, trok tâm, ntop kơl đă ntrơn du ntŭk gŭ mhe rnôk ngih dak sŏk mplơ̆ neh hŏ dơi ăp nuĭh ntơh măt n'gluh nău rgop. Tĭng ăp nuĭh ntơh măt, nău ngăn geh tâm rêng kan sŏk mplơ̆ neh jêr jŏt, nchiăng khan jêng tât geh ăp rơh lah phong jêr, âk nuĭh, lơn âk lah tă bah mô hŏ quy định na nê̆ mpeh trong ntop kơl trok tâm neh, mô hŏ geh nău tâm ban ŭch tâm trong kan nsum ƀư.

Yor kơt nê̆, rêng ƀư siƀŭt trok tâm, ntop kơl, ntrơn ntŭk gŭ mhe, sŏk mplơ̆ neh ân geh nău tâm ban, mbơh kloh rvah, di ngăn n'hanh nău dơn kan mbơh rblang, đăp mpăn tâm ban geh ngih dak, doanh nghiệp n'hanh ƀon lan. An nău rgop mpeh pơk hvi tơm neh gay njêng geh hvi neh tuch tăm, neh tăm bri ma trong an manh n'hanh tăch rgâl, ăp nuĭh ŭanh năl aơ lah nkô̆ mhe nta trong dơh tâm trong tĭng ƀư têh hvi, rnoh hvi neh tuch tăm. Yơn lah Luật ân quy định kloh lơn đŏng mpeh ăp nuĭh dơi an manh mô lah tăch rgâl. Ta rơh tâm nchră, ăp nuĭh rgum an nău rgop mpeh leo tĭng ƀư dăp rgum, trong nchrăp dŏng neh; ăp quy định geh tât pơk hvi tơm neh ntêm; mpeh đăng ký neh ntu, pă an siƀŭt kơp dơn nău dơi dŏng neh n'hanh ăp siƀŭt ƀư, rgum prăp nău lư, mbơh gĭt neh ntu.