Gay đăp mpăn tâm ban nau pă tăch ndơ, kơl an ƀon lan rvăt năp, UBND n’gor Dak Lak ntrŭnh ƀư bôk nau kan đăp mpăn rnoh tăch ăp ndơ tâm dŭt năm 2023 ndrel Tết năm mhe Giáp Thìn 2024. Rnôk tăch ndơ aơ geh ƀư ntơm lơ 1/12/2023-29/2/2024. Ăp ntil ndơ geh tăch tâm ban rnoh lah: Ndơ sa, dak ngêt (puăch sur, kik djar, tăp kin djar, dak ngi, sĭk, bột ngọt ndrel ăp ntil ndơ ê nkra, bum byăp play) sah ônh, gas.

Aơ lah ăp rmôt ntil ndơ geh dŏng âk, geh rnôk mô tŏng, geh rnôk hao khlay. N’gor Dak Lak hŏ bonh đă geh 11 ntŭk kan, siêu thị, ntrong tăch ndơ râng nau kan đăp mpăn tâm rnok dŭt năm 2023 ndrel Tết năm mhe Giáp Thìn 2024. Nchrăp rnoh prăk dŏng ân nau têm ndoh ndơ tăch tâm rnôk tết lah rlau 473 rmen, tŏng bơi tât 27% nau dŏng ndơ bah ƀon lan tâm rnôk lah geh nau mô tŏng./.