Geh ntŭk gŭ tâm êp nkuăl ƀon têh Gia Nghĩa, xã Dak Nia n’gor Dak Nông ndâk lah ntŭk ƀư nau kan pâl n’aih nsum bah rnoi Bunong Mạ, mât ƀư ueh nau vay ơm kơt tur chĭng, ndâk ăp nau vay ơm. Xã geh ndâk dơi nau kan tanh njuh, tanh dông, sah, ntŭk rgum n’gon ndrănh yăng...ân geh ăp ntil ndơ bah nơm gay ma kơl nau kan pâl n’aih. Rgop tâm nau dơi nê lah nau kan bah đoàn viên druh ndăm ndrel nau kan kơl an ƀon lan, râng ƀư nau mât nau vay ơm, răk kloh ntŭk nti, mât ƀon lan ndrih-kloh-ueh. Ntơm ăp nau kan đoàn, âk druh ndăm rnoi mpôl đê̆ hŏ geh lăp Đảng. Đảng viên H’Don, Groi Bí thư đoàn xã Dak Nia, mbơh:

 ‘Đah nau ƀư lah Groi bí thư đoàn xã ri gâp mro ntoh n’hao nuih n’hâm nsôih kan, ntĭm nti ndrel ƀư tĭng nau mĭn, nau rêh Hồ Chí Minh tâm nau kan, Gâp nkoch mbơh ân ăp đoàn viên druh ndăm êng nsôih gay ma geh lăp đảng kơt gâp”.

            Hôm đảng viên mom Đỗ Thị Hạnh, cán bộ jrâu kan du mpông xã Dak Nia, nkoch:

 ‘Ƀư ueh nuih n’hâm “đảng viên hăn lor, ƀon lan tĭng ba kơi”, gâp kŏ mro nsôih ƀư ueh nau kan tĭng nau leo trong, ƀư rjăp nau ntrŭnh bah ntŭk kan, nau ntrŭnh bah pháp luật ndrel ntrong rêh jêng ăp nar. Êp nê ri tâm ăp nar rƀŭn chi bộ, gâp mro đă, rgop tâm ăp nau mbơh nchrăp kan nau ntrŭnh gay geh rƀŏng ƀư, nau kan, ntrong kan gay ma ndâk nau kan ân khay ba kơi ân ueh lơn”.

 Wa Lê Đình Chung, Bí thư đảng uỷ xã Dak Nia, mbơh, Đảng bộ xã rnôk aơ geh 217 đảng viên rƀŭn tâm 20 chi bộ. Năl nau kan leo trong bah đảng tâm ăp nau kan văng sa, rêh jêng uănh khlay nau ân lăp đảng, ngăn lah tâm nkuăl rnoi mpôl đê̆. N’gul bôk năp aơ, Đảng bộ xã hŏ nglăp geh 3 đảng viên mhe, tâm nê geh 2 hê rnoi mpôl đê̆. Rnôk aơ đảng uỷ dôl ƀư nau kan lôch ân lăp tay du hê đảng viên rnoi Mạ đŏng. Wa Lê Đình Cường, Bí thư Đảng uỷ xã Dak Nia, ngơi:

‘Ăp đảng viên mom ri geh ntĭm nti ăp ntil bah jrâu nti đại học, ndrel rnôk aơ ri Đảng uỷ kŏ pơk trong ân hăn nti jrâu lý luận chính trị, tă bah nê ăp đồng chí ƀư ueh nuih n’hâm ƀư nau kan ueh nau kan geh jao. Ri đảng uỷ kŏ uănh khlay nau kan hun hao đảng viên, ngăn lah hun hao Đảng tâm nkuăl rnoi mpôl đê̆. Ndrel tâm rơh tât ri hên kŏ mra nchrăp ăp nau kan, jao nkô̆ nau hun hao đảng đah ăp chi bộ ndrel ma nau kan bah ăp đồng chí bí thư chi bộ kŏ kơt lah đah ăp đảng viên ƀư nau kan tâm nkuăl”.

  Ƀư ueh nau rđau kan bah Đảng, uănh khlay nau kan hun hao đảng viên tâm nkuăl rnoi mpôl đê̆, hŏ rgop nau leo Dak Nia ƀư jêh bôk nau kan ndâk njêng ƀon lan mhe ntơm năm 2018. Đảng bộ, n’gâng kan tâm nkuăl ndrel ƀon lan dôl nsôih hun hao văng sa rêh jêng gay n’hao nau săk geh du hê bôk nŭih di năm geh rlau 60 rkeh prăk, ndrel tât năm 2025 xã mra mô hôm geh rnăk ach o ôh./.