UBND n’gor Dak Nông mhe rblang dăn HĐND n’gor mĭn uănh an ký 622 nău tâm ton gay manh nkra bah nău mô tŏng nai ntĭm nti. Tĭng Sở Nội vụ n’gor Dak Nông, năm nti 2023-2024 lam n’gor mô tŏng 1021 biên chế nai ntĭm nti, tâm nê, gưl mầm non mô tŏng 235 nuĭh, gưl tiểu học mô tŏng 324 nuĭh, gưl THCS mô tŏng 260 nuĭh n’hanh gưl THPT mô tŏng 202 nuĭh. Nău mô tŏng nai ntĭm nti hŏ khuch dŭt têh tât nău ntĭm n’hanh nti, lơn lah ta nkual jru, nkual ngai, nkual rnoi mpôl đê̆.

Gay manh nkra bah nău mô tŏng dja, UBND n’gor Dak Nông mhe mbơh rblang dăn HĐND n’gor mĭn uănh ký ton 622 nai ntĭm nti, jŏ ký ton lah 12 khay. Wa Nguyễn Thị Thu Hường, Giám đốc Sở Nội vụ n’gor Dak Nông an gĭt, bol mô tŏng rlău 1 rbăn nai ntĭm nti yơn dăn ký ton 622 nai ntĭm nti lah ƀư tĭng nău Nghị định 111 năm 2022 bah Chính phủ. Mpeh jŏ jong, n’gor mbra dăn đă tay đah trung ương gay ntop biên chế an n’gâng kan ntĭm nti ta n’gor, đăp mpăn rnoh âk tĭng quy định.