Âk năm bah năp nê, wa BNướch Ngang, tâm tổ dân phố A Duông, nkuăl têh Prao, nkuăl Đông Giang, n’gor Quảng Nam lah rnăk ach o. Ăp nar wa BNướch Ngang hăn tâm bri tăm tơm bum blang, tơm prit nkŏ, điều...nau rêh hôm jêr. Jêh nê, wa BNướch Ngang geh n’gâng kan tuch n’gor Quảng Nam ndrel n’gâng kan nkuăl Đông Giang kơl kon ntil ƀư văng sa mir, bri. Rnôk aơ, wa BNướch Ngang geh 4 ha tơm sâm ba kích ônh, 5 ha tơm keo, dổi ndrel quế. Êng nê, wa hôm rong br, rong sur...ăp năm nsĭt geh văng sa ntơm 150 tât 200 rkeh. Wa BNướch Ngang lah du hê Đảng viên leo trong tâm âk nau kan. Wa rnôk aơ lah Kruanh Tổ dân phố A Duông, nkuăl têh Prao, nkuăl Đông Giang. Wa dŏng âk mông hăn tâm mâp, tâm nchră ndrel ntĭm kônh wa rnoi Cơ Tu hun hao văng sa. Ntă nŭih jêr, ŭch kơl kon ntil, wa Bnướch Ngang kŏ kơl đŏng:

            ‘Gâp lah đảng viên ri ma leo trong ân ƀon lan tâm Thôn nơm. Nau kan văng sa bah gâp săk tam prêh ngăn, kônh wa dôl kơt tĭng nti. Ăp tŏ rƀŭn thôn ndrel vay ƀa ƀơ ntĭm kônh wa mpeh nau tăm ăp ntil tơm ndrel mât chăm tơm si, mpa rong. Ŭch n’gâng kan tâm nkuăl lŏ kơl an âk lơn ân ăp rnăk geh neh tuch tăm gay kon ntil tăm, kơl geh kan pah ndrel geh prăk đăp mpăn”.

Wa BNướch Ngang vay nkoch trêng, bonh đă kônh wa ndâk nau rêh văn hoá mhe, jut nau rlu mâl ơm. Wa A Lăng Minh, rnoi Cơ Tu tâm nkuăl têh Brao nkoch, bah năp nơh, rnăk wa ach o ngăn, geh wa BNướch Ngang tât ntĭm nti nau pah kan, mât rong ndrel tăm tơm ri ri ma nau rêh ueh ơm:

‘Đảng viên Bnướch Ngang hăn leo trong lor hun hao văng sa bah nkual. Êng nê hôm ntĭm kônh wa mât rong mpa, tăm tơm sâm ba kích ônh ri ma nau rehe bah kônh wa đăp mpăn rklaih ach o”.

Âk đảng viên mom tâm nkuăl Đông Giang, n’gor Quảng Nam hŏ n’hao nuih n’hâm leo trong, janh mĭn, janh kan, rklaih ach o. Đảng viên mom A Tiêng Nấu tâm nkuăl têh Prao, nkuăl Đông Guang kŏ lah du ntoh mhô. Rnôk aơ, wa A Tiêng Nấu hŏ rong sur, kik, djar, geh ntu rong ka ndrel tăm tơm sầu riêng, tơm lòn ƀon...

Wa Nguyễn Hữu Sanh, Kruanh rmôt ƀon lan kan lŏ mir Đông Giang, n’gor Quảng Nam mbơh, âk đảng viên ta aơ kŏ geh ntoh nau kan leo trong tâm nau kan tuch tăm, hun hao văng sa. Hŏ geh âk nŭih ntoh lư tâm nau kan văng sa blau kơt wa BNướch Ngang, A Tiêng Nấu...khân păng ntoh nuih n’hâm “đảng viên hăn lor, ƀon lan tĭng ba kơi”, lah nŭih leo n’hâm rêng rjăp tâm nau kan hun hao tuch tăm, jut n’huch ach o:

‘Đảng viên hăn lor tâm nau kan hun hao văng sa. Ngăn lah đảng viên rmôt kan lŏ mir leo trong ƀư ăp nau kan văng sa, ngăn lah hun hao văng sa mir tăm, văng sa mât rong, njêng ăp nau kan geh rnoh khlay mpeh văng sa kơl an kônh wa ƀon lan rklaih ach o ƀư sâm geh ndrel rtklaih ach o nâp nâl”.

Ăp năm, rmôt kan lŏ mir n’gor Quảng Nam tâm rgop ma ăp ntŭk kan, nkuăl, kơl an 1.500 đảng viên bah rmôt nŭih kan lŏ mir manh prăk, pă kon ntil tăm, tơm tăm, mpa rong, kơl an ăp đảng viên hun hao văng sa. Wa Hồ Quang Bửu, Groi Kuanh UBND n’gor Quảng Nam mbơh: âk đảng viên mô knŭng ƀư văng sa blau ma hôm nsôih kơl an âk nŭih geh nau rêh jêr jŏt gay pah kan jan sa, n’hao nau geh, đăp mpăn nau rêh, rgop nau ndâk njêng ƀon lan mhe:

‘Rnôk aơ, du đê̆ đảng viên tâm ăp nkuăl yôk bu hun hao văng sa ueh ngăn, bu râng tâm nau ƀư pah kan jan sa rlet âk ndrel ƀư nau leo trong lor ân ƀon lan kơt tĭng. Ngăn lah, bu tăm sâm ndrel tăm tơm dak si leo nsĭt nau văng sa prêh. Lah tâm nkuăl yôk geh âk Đảng viên leo trong kơt aơ ri nau rêh kônh wa ƀon lan geh rgâl âk ngăn”./.