Năm aơ 37 năm deh, 13 năm đảng n’hanh hŏ geh rlău 7 năm ƀư Kruanh Hội Liên hiệp bu ur xã, đảng viên Y Chon, rnoi Giẻ- Triêng đah nău dơn kan bah he hŏ tâm rnglăp, rgum rlău 900 hội viên tĭng kơn rgâl trong mĭn, trong kan rdâk njêng Hội n’hanh nsum mpôl ta xã n’har bri Đăk Dục, nkuâl Ngọc Hồi, n’gor Kon Tum nâp dăng.

      Hội Liên hiệp bu ur xã n’har bri Đăk Dục, nkuâl Ngọc Hồi, n’gor Kon Tum geh 9 Chi hội đah rlău 900 hội viên. Rlău 7 năm ƀư Kruanh Hội Liên hiệp bu ur xã, yuh Y Chon an gĭt, gay ăp hội viên đah 98% oh yuh lah nuĭh rnoi mpôl đê̆ Giẻ- Triêng nsrôih râng pah kan Hội, săk yuh nơm ân leo lor, hăn  dâk bôk năp tâm lĕ rngôch ăp trong kan bah Hội tâm ban kơt pah kan chính trị, rêh jêng kon nuĭh bah nkuâl. Ndrel đah nê lah tât tĭng thôn ƀon, dăch dêh gĭt kloh nău ŭch rŏng, nău jêr jŏt bah tĭng hội viên.  

        Bah năp ndơ geh ƀư tuch tăm mâp âk jêr jŏt tâm trong hăn tăch, năm 2019 yuh Y Chon hŏ rgŏ jă oh yuh njêng Hợp tác xã Dục Nông đah 7 nuĭh lăp kan nsum, way nta joi nău kan an 45 hội viên bu ur ntop geh tay ntơm bah 80- 100 rkeh prăk/năm. Ntơm bah nău mĭn dja đŏng “Rmôt tâm rgop mât sŭr bêk rvanh” dơi njêng nta joi geh nău kan đăp mpăn an âk hội viên. Yuh Y Chon lah rjăp, aơ lah ăp nău nsrôih leo ntơm njêng nău kan dŭt geh nău dơi bah oh yuh hội viên bu ur ta ntŭk:  

“Aƀaơ mpôl hên hŏ geh ăp ndơ gay ma tăch. Mpôl hên mô dơn tăch ăp sŭr mblâm, puăch sŭr rêh mô lah sŭr ntil đŏng ôh ma mpôl hên ƀư puăch sŭr nê jêng puăch sŭr pâr năk ŭnh n’hanh mpôl hên hŏ sơch ndơ  geh ƀư dja gay tâm rlong ndơ  geh ƀư OCOP gưl n’gor n’hanh geh 3 sao. Tât aƀaơ ndơ geh ƀư bah mpôl hên hŏ geh âk nuĭh ŭch rvăt lơn lah ăp rnôk Tết ri ndơ geh ƀư bah mpôl hên mô tŏng an tăch”.

          Ntơm bah chông cờ bôk năp Y Chon, ăp trong ntĭt leo bah Hội Liên hiệp bu ur xã Đăk Dục rdâk njêng, kơt: “Ƀư tĭng kơt Wa”, “Trong kao si”, “Mpêr nđĭr”, “Njêng ndŏk jêng prăk”… nsĭt tay nău dơi ngăn ngăn rgop rgâl trong mĭn, trong kan bah nuĭh ƀon lan ntŭk n’har bri. Ma trong ntĭt leo “Bu ur nsum ti ndrel Tahen n’har bri mât njrăng ƀư tơm rnă njrăng n’har bri nkre đah mât njrăng ndơ mpêt khlay, bri dak’’, yuh Y Chon nsrôih nkoch trêng, rgŏ jă hội viên n’hanh nuĭh ƀon lan n’hao nău gĭt êng tâm nău râng mât njrăng bơi 8km trong n’har bri neh dak kâng n’har đah Lào n’hanh rnă njrăng đăp mpăn ta ntŭk:

        “Săk nơm lah nuĭh mât bôk gưl Hội lah nuĭh deh luh n’hanh têh jêng ta nkual n’har bri, gâp gĭt kloh mhâm ƀư gay mât njrăng dơi n’har bri. Gâp nkoch trêng, rgŏ jă oh yuh mô ƀư tĭng ăp nkô̆ nău djơh bah mpôl mhĭk djơh. Mpôl hên way kan nsum đah Pôih n’har bri Dục Nông gay ƀư jăp pah kan nkoch trêng rgŏ jă an ăp oh yuh hội viên I dơh djăt tĭng tâm mpôl mhĭk djơh, hôm kônh wa ƀon lan geh băl mpôl ta Lào ri mpôl hên way ŭanh khlay đŏng”.

        Ăp  nău kan geh nău tam bah Hội Liên hiệp bu ur xã Đăk Dục dôl nar lơn ma năl dơi nău khlay kan, ntŭk gŭ kan bah oh yuh bu ur tâm rdâk njêng rnăk wâl hơm răm n’hanh râng pah kan nsum. Ntơm bah rnoh tơm prăk rlău 28 rmen prăk Hội Liên hiệp bu ur xã Đăk Dục dâk nchăm manh Ngân hàng chính sách xã hội, ntop đah nău way ƀư kơi năp nti, ndơ̆ rgâl khoa học kỹ thuật, ntĭm nti nău kan đah nkoch mbơh, nta joi nău kan… bơi 590 rnăk hội viên bu ur ta xã Đăk Dục hŏ rgâl geh wăng sa. Lơn lah geh 22 hội viên bu ur tơm rnăk ach o dơi Hội kơl hŏ klaih rlău dơi ach o jŏ jong. Wa Y Phương, Kruanh Hội Liên hiệp bu ur n’gor Kon Tum rnê âk ăp nău rgop bah yuh Y Chon đah pah kan Hội ta xã n’har bri Đăk Dục, nkuâl Ngọc Hồi:   

Yuh Y Chon lah ngoăy tâm ăp cán bộ Hội lah nuĭh rnoi mpôl đê̆ dŭt ngăch prăl, nsrôih uĕh, nănh mĭn, nănh ƀư. Yuh way gŭ mĭn, kơt nti, pơk ŭanh siƀŭt rđău đă gưl bah lơ n’hanh ndăn nău rđău đă bah gưl ủy, kan nsum lhăt đah n’gâng kan ta ntŭk n’hanh ăp n’gâng kan, nsum mpôl bah xã rƀah gĭt nău lư bah hội viên bu ur gay an tĭng ƀư nău kan bah Hội n’hanh nsĭt tay nău tam ngăn ngăn wăch rgum, tât âk mpưm dơi hội viên bu ur râng”.

       Ntơm bah nău nđơr, rah rơch, dơn kan đah pah kan Hội bah yuh Y Chon, ăp trong leo kan bah Hội Liên hiệp bu ur xã Đăk Dục nar lơn ma wăch rgum nar lơn ma âk mpưm oh yuh bu ur n’hanh nuĭh ƀon lan tâm xã râng. Hội Liên hiệp bu ur xã hŏ n’glăp tay 210 hội viên mhe geh tât 100% trong nchrăp ndơ̆ luh; nkoch mbơh 16 hội viên ntoh lư an Đảng mĭn uănh, n’glăp an… êng yuh Y Chon nơm dơi Ban Chấp hành Đảng Bộ xã Đắk Dục ntăm an Giấy khen geh săk Đảng viên lôch jêh ngăch prăl nău dơn kan mbro; dơi n’gâng kan, nsum mpôl ăp gưl ntăm an âk Bằng khen, Giấy khen. Khay 6 mhe aơ yuh Y Chon rhơn n’hao dơi lah 1 tâm 5 nuĭh bah n’gor Kon Tum dơi hăn thủ đô Hà Nội râng Tâm nchră mpư rnê, rhơn n’hao nuĭh ntoh lư lam dak nkhêp nkah ndray 75 năm Nar Kruanh Hồ Chí Minh luh nău kuăl jă tâm rlong. Tâm nchră tă bah Hội đồng tâm rlong- nkhôm rnê Trung ương ƀư./.