Ndơn nau nê, rơh rlau aơ, phe hao khlay, nkre lah nau ueh ân ntŭk tăch phe bah Việt Nam, leo nau rhơn ân ƀon lan. Yơn lah, aơ lah nau rvê bah nŭih dŏng ndrel mô âk tâm rnôk tăch luh phe. Wa Lê Thị Song An, rmôt kan Long An, ôp:

‘Rnoh ba hao khlay ri ma âk nkuăl rvăt ba gay ma têm âk ngăn, ƀư roh nau tăch âk, ntrŭt rnoh phe hao khlay mô tâm di ndrel nê lah nau rvê bah nŭih rvăt dŏng, công nhân rnôk rnoh phe hao khlay. Nau aơ ƀư nau n’huch rnôk tăch luh, njêng nau geh tâm rgop nâp đah ƀon lan ndrel ntŭk kan. Ndri ma, wa đă Kruanh n’gâng kan nkre ntrŭt dăng nau tuch tăm, tăch luh nkre đăp mpăn ndơ sa bah neh dak tĭng nau rđau kan bah Thủ tướng Chính phủ”.

Kruanh n’gâng kan Lê Minh Hoan mbơh, bah rnôk aơ 10 năm ri nau kan ri neh dak nơm nklăp rlau 4 rkeh ha. Rnôk aơ tĭng nau kơp, rnoh neh tăm ba hôm 3,39 rkeh ha. Tĭng nau ntrŭnh bah Quốc hội ndrel nau ntrŭnh bah Chính phủ lah nau dŏng mro 5 rkeh ha neh. Kruanh n’gâng kan ƀư kloh, nau aơ lah đăp mpăn ndơ sa ndrel gay nau hun hao văng sa rêh jêng kŏ geh neh ruch tăm, tâm nê geh neh tăm ba. Kruanh n’gâng kan Lê Minh Hoan mbơh, nau tăm ba tâm nau rgum neh ndrel yor N’gâng kan ntŭk ntu ndơn ƀư. Tâm nau rgum bah ăp nkuăl geh nau ntrŭnh tât neh tăm ba, năn kloh nkuăl tăm ba:

‘Tâm rnôk hun hao văng sa, rêh jêng ăp nkuăl ân geh ƀư nâp rnoh neh tuch tăm, rnôk ntrơn rgâl neh tăm ba hôm âk nau khuch ba kơi kơt rnoh geh ba, nau geh bah ƀon lan kŏ kơt lah nau tăch...N’gâng kan tuch tăm ndrel hun hao ƀon lan mra ƀư nâp đah ăp nkuăl gay mbơh nau tât rnôk geh ntrơn, rnôk ntrơn đah nau nkah njrăng đah hun hao ndrel mât neh tăm ba”.

Du đê̆ nau ân lah, đăp mpăn dnơ sa bah neh dak ndrel nau ndâk văng sa, đăp mpăn ndơ sa ân ăp ntrong, mô rgum tâm nau geh ơm, ma đăp mpăn ndơ sa, đă Kruanh n’gâng kan mbơh nau ntrŭnh mhâm ƀư? Ơh nau aơ, Kruanh n’gâng kan Lê Minh Hoa, mbơh:

 ‘Đăp mpăn ndơ sa mô di lah ba ma ăp ntil ndơ tuch tăm njêng ndơ sa ân kon nŭih rêh ndrel ma ndơ sa mpa rong, bum kao play kŏ njêng. Nau kan ân geh dŏng ndơ bah nơm an geh n’hao nau rêh bah kônh wa đah âk nau kan neh dak gay geh tŏng nau dŏng, mô di lah đă kônh wa tăm mbo mir ma ăp nau nê ân geh tât jŏ jong. Nê lah nau geh ndrel nau rêh bah ăp nau kơl an bah 3 bôk nau kan ndrel nau kơl an bah N’gâng kan tuch tăm ndrel hun hao ƀon lan mhe nau rêh tâm nâm neh mât bri gay n’hao nau geh”.

 Ơh nau tât nau rgop ƀư tăch ndơ tăm bah wa Phạm Hùng Thắng, rmôt kan bah Hà Nam, Kruanh n’gâng kan Lê Minh Hoan kơp dơn, ƀư nau rgop lah nau kan bah ntŭk kan tuch tăm  gay rgâl nau kan ơm, jê̆, dah ƀư bah kan tuch tăm. Nau kan geh ƀư ân n’hao nau nâp bah nau kan aơ tâm rơh tât. Tâm nê, N’gâng kan mra ƀư nsum ma nkuăl gay ndâk nau kan tâm ban ndrle ƀư ueh lơn ndrel ma ăp ngih săm ƀŭt, ngih khoa học, ăp ntŭk kan tuch tăm ƀư ân geh nau hun hao nâp nâl lơn. Ntoh nau tâm nar ôp ndrel ơh nau ôp bah rơh rƀŭn tal 25 bah Uỷ ban Rnâng kan Quốc hội, kraunh Quốc hội Vương Đình Huệ mbơh nau hôm kol ndrel ji nuih bah ƀon lan geh năn uănh, rklaih:

‘Gâp rnơm lah, đah ăp nau kan ma ăp N’gâng kan hŏ ton, đah nau nsôih bah rmôt kan Chính phủ, nau hăn ndrel bah Quốc hội, ăp rmôt kan ntoh măt Quốc hội, nau kan mât ƀư nau dơi bah Bộ Tư pháp mra geh âk nau rgâl ngăn, hao du nhoat mhe, hăn ngăn tâm nau ngăn lơn, ngăn lah tâm rnôk nau đă nau kan lơn ma prêh tĭng nau ntrŭnh bah mrô 27 bah Trung ương Đảng, ntŭk kan tuch tăm rlet nau jêr, ntul rlong, lŏ lah nau ndră ân nâp bah jâng văng sa, njêng nau kan khlay gay rƀŏng tât nau kan tuch tăm ueh, tâm rnglăp đah lam ntur neh ndrel rdâng đah nau rgâl mhe trôk nar”./.