Tĭng wa Y Thanh Hà Niê Kđăm, Kruanh Hội đồng Dân tộc bah Quốc hội, Groi Kruanh rmôt kan mêt uănh bah Quốc hội mbơh, nau tă geh dơi bah ăp nau kan neh dak (ndâk njêng ƀon lan mhe, n’huch ach o nâp nâl ndrel hun hao văng sa, rêh jêng nkuăl rnoi mpôl đê̆ ndrel gôl yôk) ntơm geh du đê̆ nau ngăn, ngih vâl gung trong văng sa, rêh jêng nkuăl ƀon lan, gôl yôk geh rgâl ueh. Êp nê hôm âk nau kol, nau ê dơi ƀư jêh nkô̆ nau pă tơm prăk Trung ương tât năm 2025 ân 3 bôk nau kan bah neh dak lah dŭt jêr.

            Geh tât ăp ntrong kan ntrŭt dăng nau pă tơm prăk ntuh kơl, ăp nau kan bah neh dak gay n’hao săk tam nau dŏng tơm prăk, ăp nau rgop ân nkô̆ nau hun hao ndrel ƀư jêh ăp nau kan gay kơl an hun hao văng sa ndrel nau rêh, tâm rơh rƀŭn dŭt năm mhe rlau, HĐND n’gor Dak Lak, wa Võ Ngọc Tuyên, Giám đốc N’gâng kan nchrăp kan-ntuh kơl n’gor Dak Lak mbơh:

            ‘Tâm rơh tât, hên mra uănh khlay tât ăp nkô̆ nau kan bah neh dak. Geh nau tâm rgop ngăn đah n’gâng kan nchrăp kan ndrel ntuh kơl ndrel ăp ntŭk êng. Bôk nau kan bah neh dak mpeh nau ndâk njêng ƀon lan mhe lah n’gâng kan tuch tăm, n’huch ach o nâp nâl lah N’gâng kan Lao động, bôk nau kan hun hao văng sa nkuăl rnoi mpôl đê̆-gôl yôk lah Ban Dân tộc ri hên mra tâm nchră tâm Rnâng kan rđau kan bah neh dak gay geh nau tâm ban ndrel mêt uănh lor ma jao nau nchrăp tâm bôk năm gay ntrŭnh ƀư pă tơm prăk ân năn”.

            Tâm rơh rƀŭn aơ, HĐND n’gor Dak Lak ntrŭnh nau mpeh nau jao nkô̆ nau, nau nchrăp tơm prăk ntuh kơl hun hao tă bah tơm prăk Trung ương ndrel tơm prăk n’gor ƀư Bôk nau kan bah neh dak hun hao văng sa, rêh jêng nkuăl rnoi mpôl đê̆ ndrel gôl yôk tâm năm 2024 lah 660 rmn prăk.

            Kŏ tâm nar rƀŭn dŭt năm 2023 bah HĐND n’gor Gia Lai, wa Phạm Minh Trung-Giám đốc Sở Tài nguyên Môi trường n’gor aơ đă ăp nkuăl tâm rgop ngăch ƀư ăp nau kan gay pă neh ân nŭih ƀon lan tâm bôk nau kan bah neh dak hun hao văng sa, rêh jêng nkuăl rnoi mpôl đê̆:

            “Mpeh jao neh, ân nŭih rnoi mpôl đê̆ tâm bôk nau kan bah neh dak mpeh nau hun hao văng sa, rêh jêng nkuăl rnoi mpôl đê̆, UBND n’gor hŏ jao ân N’gâng kan ntŭk ntu gŭ âm kơl mbơh, nchră ntĭm êng mpeh nau gŭ. N’gâng kan hŏ geh nau ntĭm mbơh êng ân ăp nkual. Đă ăp nkuăl geh nau kan, ndâk nchih moh gay ma geh ân dŏng kan, ntrŭnh ƀư”.

            Đah nuih n’hâm nchrăp, sŏng, mô der, năn ndơn saơ ăp nau jêr, nkol, Quốc hội lŏ hăn ndrel ma Chính phủ gay jou luh ăp nau kan ân tâm di lơn, ngăn lah rnôk ƀư 3 nau kan bah neh dak lvang năm 2021-2025 knŭng hôm 2 năm đŏng lah lôch. Rơh rƀŭn tal 6, Quốc hội gưl XV nchră nau ntrŭnh mpeh nau mêt uănh ƀư 3 bôk nau kan bah neh dak. Wa Rơ Chăm H’Phik, rmôt kan bah n’gor Gia Lai, đă:

            ‘Nau ntrŭnh geh nau kan ndal ndrel năn, tâm di ngăn đah nuih n’hâm ƀon lan, ngăn lah mra dơi doh rklaih ăp nau tơm ngăn dôl geh nkol tâm rnôk ntrŭnh ƀư 3 bôk nau kan bah neh dak”.

            Aơ lah rơh bôk năp, du nkô̆ nau geh mêt uănh gưl prêh geh rgum lĕ 3 bôk nau kan bah neh dak geh nau khlay bah neh dak. Ntoh nau tâm nar rƀŭn, Kruanh Quốc hội Vương Đình Huệ lah rjăp, mêt uănh đah nuih n’hâm ƀư kan rjăp jŏ jong lah nau ndâk ndrel rdâng, tâm nê ndâk lah lah nau tơm gay ma geh nau dơi nar lơn ma ueh:

            ‘Quốc hội tâm ban nau ân Chính phủ ndal ndâk, mbơh Quốc hội tâm roeh rƀŭn êp ngăn nau nchrăp nau ntrŭnh mpeh nau rlong trong kan, nau ntrŭnh geh êng ndrel nau pă gưl ân gưl nkuăl ntrŭnh ƀư roh kan, nau ƀư, nau ntop dŏng tơm prăk ngih dak gay ma ntrŭnh ƀư ăp Bôk nau kan bah neh dak”.

            Ndrel ma nau nchră nau ntrŭnh mêt uănh gưl prêh mpeh nau ntrŭnh ƀư ăp nau ntrŭnh bah Quốc hội mpeh ăp Bôk nau kan bah neh dak, Quốc hội kŏ hŏ jao ân Chính phủ mbơh ma Quốc hội tâm rnôk rƀŭn êp aơ ngăn du nau ntrŭnh ueh ngăn mpeh nau pă gưl kan, nau dơi kan, jao nau kan, n’huch ăp nau dŏng săm ƀŭt hành chính gay ma năn doh rklaih nau jêr nau kol, kơl an nau ntrŭnh ƀư Bôk nau kan bah neh dak geh săk tam, jêh tâm di nar, pơk nau rnơm ndrel nau rêh ueh lăng bah ƀon lan./.