Tĭng uănh rơh ôp nau bah ntoh măt Quốc hội đah Kruanh n’gâng kan Uỷ ban Dân tộc Hầu A Lềnh tâm rơh rƀŭn tal 5, Quốc hội XV, cử tri tâm lam dak lah, Kruanh N’gâng kan hŏ rgum ơh ăp nau ma ntoh măt Quốc hội uănh khlay, mbơh ăp nau kan hôm nkol, ê dơi, nkre đă nau rklaih ăp nau kan ê dơi bah nơm. Geh tât nau ƀư bôk nau kan bah neh dak “hun hao văng sa, rêh jêng nkuăl rnoi mpôl đê̆ ndrel gôl yôk”, cử tri Trương Thế Vinh, cán bộ ƀư nau kan tâm nkuăl Ia Grai, n’gor Gia Lai ân lah, cán bộ dôl mâp nau jêr rnôk ƀư kan. Cử tri Trương Thế Vinh, mbơh nau:

‘Geh âk nau ntrŭnh bah n’gor ê năn rđil đah nau ntrŭnh bah nau kan, ngăn lah tâm ntŭk ê geh nau ntĭm mbơh kloh. Ngăn lah, bôk nau kan mrô 1 kơl an ngih gŭ, neh gŭ, neh tuch tăm tĭng nau ntrŭnh mrô 4 bah Thủ tướng Chính phủ ri kơl an neh gŭ đah rnoh 44 rkeh/rnăk ndrel neh tuch tăm 22 rkeh/rnăk ri jêr mơ dơi geh ntrŭnh. Neh tuch tăm ân kônh wa ri lah rnoh khlay ngăn, đah rnoh prăk nê ndrel tơm prăk ân manh ri kônh wa mô dơi tŏng rvayw neh gay ma tuch tăm, nkra ngih”.

Wa Lâm Tấn Bình-cử tri rnoi Chăm, tâm xã Hiệp Phan, nkuăl Bắc Bình, n’gor Bình Thuận mbơh, tâm rnôk bôk năp nchră nau bah Quốc hội, Kruanh n’gâng kan ơh nau sŏng ngăn, ăp nkô̆ nau, ngăn lah nau ntrŭnh, ntrong kan bah Đảng ndrel Ngih dak geh tât nau kan bah N’gâng kan ndrle nau tâm rgop ma ăp N’gâng kan, ntŭk kan neg. Cử tri Lâm Tấn Bình mbơh ăp nau jêr, nau kol ma Kruanh n’gâng kan Hầu A lềnh hŏ mbơh geh tât nau kan, ngăn lah nau pă prăk ntuh kơl hun hao văng sa rêh jêng ân nkual nroi mpôl đê̆:

‘Đah nau kan bah Kruanh n’gâng kan kŏ ndŏ nau kan ân ntrong dăch tât mhâm ƀư gay ân ƀon lan gĭt dơi ndrel geh ndơn saơ nau ntrŭnh, ntrong kan bah Đảng ndrel Ngih dak ntuh kơl tâm di ndrel tâm di nau đă mpeh nau geh, nau rêh bah ƀon lan rnoi mpôl đê̆ gôl yôk ân kloh kơt Kruanh n’gâng kan hŏ lah rjăp rnôk mbơh nchră tâm rơh ôp nau kêng măng aơ”.

Bah năp Quốc hội, Groi Thủ tướng Chính phủ Trần Lưu Quang mbơh, tât lôch khay 5/2023, tơm prăk bah năm 2022 ân nau kan aơ geh 58% prăk ntuh kơl hun hao, tơm prăk năm 2023 geh 17% tơm prăk ntuh kơl hun hao. Tâm rnôk hôm 2 năm n’gul gay ƀư rơh 1 bah nau kan aơ, rlau ma nê, âk kônh wa rnoi mpôl đê̆ hôm jêr. Groi Thủ tươgs mbơh nau kol tâm nau ƀư lah yor âk ntil săm ƀŭt ntrŭnh âk ri ma tâm rkăng, lơh jêr ân nau pă tơm prăk trung ương. Groi Thủ tướng lah rjăp, tâm rơh tât gay doh rklaih, ƀư jêh nau kan pháp lý nâp gay Bôk nau kan geh pă prăk tâm di nau đă:

‘Nau khlay lah nơm mra ntrŭt dăng nau pă gưl ân nkuăl gay ăp đồng chí ƀư tơm nau kan. Ăp nau ma knŭng geh nkual mơ gĭt mhâm ƀư ân tâm di. Nuih n’hâm nsum lah nsôih gay ma lŏ rklaih ăp nau kan lŏ geh ntoh tay, mhâm ƀư gay dơi rklaih nau aơ ân tâm di nau ntrŭnh ndrel tâm di nau đă bah ăp nŭih ŭch”.

Lôch rƀŭn nchră đah nau kan rnoi mpôl, Kruanh Quốc hội Vương Đình Huệ kơp dơn rơh rƀŭn ntoh nuih n’hâm kan, sŏng ndrel ndâk njêng. Nchŏng kloh nau kol, nau ê dơi, ngăn lah nau mbrơi ƀư ăp Bôk nau kan bah neh dak. Du đê̆ nau ntrŭnh ntĭm hôm mbrơi mô lah mô tâm ban, ê kloh, ê geh n’hêl, Kruanh Quốc hội đă tâm rơh tât ntrŭnh ƀư ăp nau kan gay ma tâm ban, năn ăp nau ntrŭnh, ntrong kan khlay mpeh nau kan bah rnoi mpôl ân lvang năm 2021-2030. Rgum ăp tu tơm gay ntuh kơl hun hao văng sa, rêh jêng nkual rnoi mpôl đê̆ ndrel gôl yôk, tâm nê, rgum tâm nkuăl jêr jŏt, rmôt rnoi mpôl đê̆ hôm jêr ndrel jêr geh êng./.