Giàng Mý Só lah ngoai tâm 5 kon se geh nau rêh jêr jŏt, geh Đồn Biên phòng Huổi Luông, nkuăl Phong Thổ, n’gor Lai Châu ndơn rong ndrel kơl an 500 rbăn/khay. Mon Só nkoch: Năm aơ oh nti jrâu 5, lah mô geh tahen biên phòng rong ân ri mra mô geh hăn nti, mô gĭt play săm ƀŭt ôh.

‘Nau rêh rnăk mom ri jêr ngăn, mô geh phe sông, geh ăp kônh tahen Biên phòng kơl an hăn nti, kơl prăk 500 rbăn/khay, gâp sŏk prăk nê gay ma rvăt săm ƀŭt, ndơ dŏng nti ndrel têm gay ma rvăt phe sa. Ăp kônh tahen kơl an gâp nsôih hăn nti ân ăp tŏng”.

 Thiếu tá Nguyễn Hữu Kiểm, Chính trị viên Đồn Biên phòng Huổi Luông mbơh: Năl bôk nau kan “Kơl an oh hăn nti” ndrel “kon rong tahen biên phòng” lah du nau kan geh nau ueh. Ndri ma, ntơm rnôk ƀư rmôt kan hŏ nkoch trêng, bonh đă cán bộ tahen rgop kơl ndrel kuăl jă nau rgop bah ăp rmôt, ăp nŭih gay ma ndơn rong ndrel kơl kon se.

Ndrel ma nau kơl prăk, tahen hom đă cán bộ hăn kơl an rek ba, pâk mbo. Nkre rgop đah n’gâng kan uănh ăp rnăk kon se geh nau rêh jêr jŏt, ach o mô geh ndơn rong gay ma kuăl jă nau kơl an đah ăp ntil ndơ sa, prăk tâm rnôk lăp năm nti, nar Quốc tế thiếu nhi 1/6, mô lah Trung thu...

Aơ lah ngoai tâm âk nau kan ma tahen Biên phòng Huổi Luông ƀư tĭng nau ntrŭnh mrô 01 bah Bộ chính trị mpeh nau ƀư nau ntrŭnh 05 tât nau ntrŭt dăng ntĭm nti ndrel ƀư tĭng nau mĭn, nau kan, nau rêh bah Hồ Chí Minh. Thiếu tá Nguyễn Hữu Kiểm mbơh:

            “Êp aơ ngăn rmôt kan hŏ ƀư nau kan ƀư nâp trong n’har ndrel hŏ geh 82 rnăk geh ƀư bah Hồ Thầu đah rlau 3km trong n’har ndrel ăp nau kan ngăn lah hên hŏ jao ân ăp mrôt ndrel ăp đảng viên leo trong lor ăp nar, ăp pơh tât ăp rnăk gay nkoch trêng, bonh đă ndrel mbơh nau ŭch, nau mĭn bah kônh wa, nkre ntĭm kônh wa ƀư nau kan tơm tăm, kon rong mhe hun hao văng sa”.

Đah nau kan mât rlau 13 km trong n’har ndrel 15 n’gâng, geh 21 ƀon, gay ƀư dơi nau ntĭm nti ndrel kơt tĭng nau Wa lăp tâm nau ngăn, săk tam, Đảng uỷ, Ban rđau kan Đồn Biên phòng Huổi Luông hŏ ƀư rjăp nau ntĭm nti ndrel pah kan tĭng nau Wa đah ăp nau kan ngăn ndrel ƀư tât ăp cán bộ, đảng viên, tahen gay đăng kí ntơm 1-2 nkô̆ nau kan. Đại uý Tẩn Lở Tông, Đồn Biên phòng Huổi Luông, nkuăl Phong Thổ, n'gor Lai Châu, nkoch:

‘Gâp nơm jêh geh bu ntrŭnh mbơh, ntĭm nti, ƀư tĭng nau kan, nau rêh bah Hồ Chí Minh, tâm nau kan mât njrăng trong n’har bri hŏ kơl nchră nau ân Đảng uỷ, Rnâng kan rđau rmôt gay ma ƀư ueh nau kan noch mbơh, nkân rjăp ân trong n’har bri. Gâp hŏ nkoch mbơh, bonh đă kônh wa ƀư nau mât nkuăl n’har bri. Bah nê kônh wa hŏ n’hao nau gĭt ndrel ƀư kơt tĭng rjăp lơn”.

Ăp năm rlau aơ, Đồn biên phòng Huổi Luông hŏ nchrăp tâm rgop ma ăp n’gâng kan nkuăl tâm nau nkoch mbơh ân ƀon lan n’hao nau ndâk ndrel mât n’har bri, kơl an âk rnăk vâl hun hao văng sa, kơl an kon se geh nau rêh jêr jŏt geh hăn nti.

Ntơm bah nau kan ntĭm nti ndrel ƀư tĭng nau Wa tâm Đồn Biên phòng Huổi Luông leo tât nau rnơm ân kônh wa ăp rnoi tâm nkuăl n’har bri, ƀư lơn ma ueh rup gui bah ăp tahen grat ndrih, rgop nau ndâk rmôt kan ueh, nâp ăp ntil, ƀư jêh nau kan mât neh ntu, n’har bri bah neh dak./.