Ntơm bah bôk năm tât aƀaơ,  ăp doanh nghiệp ta Dak Lak hŏ plơ̆ geh tay âk siƀŭt ton rvăt ndơ n’hanh sơch lăp âk nuĭh kan. Du đêt công ty n’gluh rnoh prăk khay âk n’hanh ăp trong kơl dơh yơn nha hôm mâp âk jêr jŏt tâm nău sơch lăp nuĭh kan đŏng.

Ta rkŭm công nghiệp Tân An, nkual ƀon têh Buôn Ma Thuột, âk công ty mbơh sơch lăp nuĭh kan ƀư choh bok ao, điện tử, ƀư njêng rsău măt đah rnoh âk. Bol n’gluh ăp rnoh  kơl uĕh mpeh rnoh prăk khay, ndơ nkhôm, ntop kơl nar rlu tâm khay klêh donh yơn âk công ty nha mô hŏ joi  tŏng công nhân. Wa Trần Chí Vĩ, Giám đốc doanh nghiệp choh bok ao Lực Thiêm an gĭt, công ty geh ŭch sơch lăp tay 300 nuĭh kan, yơn mhe sơch geh  nklăp 50 nuĭh kan dơm:

“Rnôk tât khay klêh cà phê, khay klêh tiêu lah công nhân geh neh tuch tăm, khân păng mbra dơi đăng ký gay rlu rlău tâm khay nê gay sĭt kơl nău kan mir ba. Mpŏng lôch khay cà phê khay 6 dja ri sơch lăp nuĭh kan păng mbra dơh ntơ lơn.”

Hôm ta rkŭm công nghiệp Cư Kuin, nô nău mô tŏng nuĭh kan, lơn lah nuĭh kan geh hăr blău ti kan, ƀư âk công ty ân rgâl tay trong nchrăp ƀư njêng tâm ban kơt dơn siƀŭt nchăm đă ƀư bah nuĭh dăn rvăt. Wa Vũ Nguyễn Tường Linh, mât uănh nău kan sơch lăp nuĭh kan bah công ty cà phê Ngon an gĭt, công ty hŏ tâm rgop kan nsum đah ăp nhih nti cao đẳng, đại học ta n’gor gay nchrăp ntĭm nti dơm nău kan, yơn rnoh âk siƀŭt dăn lăp nti mô hŏ dơi geh kơt nău mpŏng ơm:

“Công ty mpôl hên ân sơch lăp nklăp 50 nuĭh kan jâng ti an tât nuĭh kan geh ntĭm nti nău way kan. Nău jêr bah mpôl hên lah mô tŏng mpeh nuĭh kan geh ntĭm nti way kan, lơn lah ăp n’gâng kan kỹ thuật kơt điện, cơ khí. N’hanh nău mha êng bah công ty mpôl hên lah du công ty tă bah dak bah dih ntuh kơl, mpôl hên ân geh tay nuĭh gĭt nău ngơi dak bah dih nê lah nău mpăng đêt bah nuĭh kan ta Dak Lak”.

Nău mô tŏng geh công nhân dôl âk lam n’gor Dak Lak. Wa Nguyễn Thùy Tâm, chuyên viên hành chính nuĭh kan công ty Trung Nguyên Franchising ta Dak Lak an gĭt, công ty hŏ n’hao âk rnoh ndơ kơl yơn jêr sơch lăp nuĭh kan:

“Rnôk khân păng pah kan, khân păng dơi thi n’hao gưl, dơi ký hợp đồng nuĭh  kan ăp tŏng tĭng luật pah kan. Bah meng nê khân păng hôm geh nkhôm KPI, nklâm ndơ sinh nhật, lễ, tết n’hanh lơn lah ndơ kơl jŏ năm kan. Mpôl hên đăng sơch lăp nuĭh kan ta âk ndơ nkoch trêng nău lư đŏng yơn aƀaơ nău ŭch geh sơch nuĭh  lăp kan mô hŏ tŏng geh”

Tĭng nău mbơh bah Ntŭk rgum mbơh joi nău kan ta n’gor Dak Lak, tâm 6 khay bôk năm Ntŭk rgum kan geh rlău 50 tơ̆ doanh nghiệp râng tâm rlău 20 rơh mbơh joi nău kan đah  nău ŭch  geh lăp geh hang rbăn nuĭh kan. Yơn lah, rnoh nuĭh kan dơi geh sơch ngăn  mô  hŏ tât kơt nău mpŏng ŭch. Wa Nguyễn Hoàng Giang, Giám đốc Sở Lao động Thương binh n’hanh Xã hội n’gor Dak Lak rblang năl:

“Sơch lăp nuĭh nti lah nău bôk năp jêr jŏt. Nău tâl 2 lah rnôk lôch ntĭm nti ri doanh nghiệp ân ntĭm  nti tay, mô jêng dŏng tă bah drăp ndơ ntĭm nti mô ăp tŏng geh, nău nti bah nhih nti mô hŏ nkre đah doanh nghiệp khân păng moh ndơ ŭch geh”.

Tĭng wa Nguyễn Hoàng Giang, năm 2024, n’gor Dak Lak nsrôih nta joi geh nău kan an rlău 30.000 nuĭh. Gay dơi tât rnoh dja ,  ăp ntŭk ntĭm  nti nău kan n’hao săk blău ntĭm nti, tŏng an nău ŭch geh bah doanh nghiệp, ntĭm nti tĭng nău đă, nău ŭch geh ngăn ngăn bah doanh nghiệp. Mpeh nuĭh kan ân tiăr  nti, tâm ôp mpeh nău blău kan kỹ thuật, nău hăr ngăch kan n’hanh nsrôih, lor nchrăp joi geh nău kan./.