Mpơl nău way “Ngêt dak nkah gĭt tu tơm” bah rnoi nuĭh, ăp nar dja, druh ndăm Dak Lak hŏ an ƀư âk nău kan ngăn ngăn gay mpơl nuih n’hâm nkah gĭt đah ăp nuĭh râng tâm lơh tâm su, n’groh nting mham khĭt să rlă lŭ yor ma nău đăp mpăn, dah rŏng bah neh dak.  

Dơn geh siƀŭt mpêt nkrem rnoh khlay 5 rkeh prăk tă bah Tỉnh đoàn Dak Lak kan nsum đah ăp nuĭh lŏng nuih n’hâm pă an, wa Võ Thị Thuận, nuĭh thanh niên xung phong ơm ta thôn Tân Hòa, xã Tân Lập, nkuâl Krông Buk rngot rhơn. Hŏ rlău 70 năm deh, ăp nar păng hôm joi rchŏk gay joi nău rêh. Tâm trôm jay tâm rŏng băl tahen, păng nkoch:

          Ta xã kan nsum đah druh ndăm ƀư an du mblâm jay tâm rŏng đŏng, ăp nuĭh rgop du đêt gay ƀư dơi du mblâm jay rnôk nê rnoh khlay nklăp 80 rkeh prăk. Rơh dja ri khân păng an du siƀŭt mpêt nkrem dja.

          Hôm đah wa Trần Văn Hùng, tahen ơm ta thôn 15, xã Tân Hòa, nkuâl Buôn Đôn, dŭt rhơn lah ăp nar đoàn viên druh ndăm tâm xã tât khâl mô lah râng ntop kơl jik mir ba. Nkoch bri đah ăp băl mom, păng hôm nkah ăp năm khay kăl e ndrel n’hanh băl mpôl hăn chŏl lor trong hăn tâm lơh yor ma nău đăp mpăn dah rŏng neh dak. Nơm geh nău ntop kơl bah druh ndăm ăp rnăk kơt păng dơi rgŏ  jă lĕ ma nuih n’hâm n’hanh drăp ndơ.

           Mpôl hên lơn âk ƀư nău kan mir ba ri ăp oh nô đoàn viên druh ndăm tât kơl nar luh kan, tâm jă tât kơl ƀư 1- 2 nar, ăp nar rlău jât đoàn viên, kơl an rnăk wâl. Kơp lĕ ma rnôk mpôl hên kop ji, geh nău tât rmoh rmanh mô lah ăp rnôk hop hành nar nkah ndray ri đoàn viên druh ndăm tât n’hanh geh ăp nklâm ndơ kơl an năn ngăch đŏng.

N’gor  Dak  Lak aƀaơ geh bơi 60.000 hồ sơ nuĭh dơi kơl, tâm nê geh bơi 45.000 hồ sơ nuĭh geh n’hâm suan, rnăk wâl nuĭh geh n’hâm suan n’hanh rlău 14.000 hồ sơ nuĭh dơi  kơl êng ƀa ƀă kơt druh ndăm xung phong. Ăp khay, n’gor Dak Lak kơl an  rlău 10.000 nuĭh dơi kơl đah rnoh prăk rlău 21 rmen prăk.

Nkhêp nkah ndray 76 năm Nar tahen ơm khĭt rmanh, n’gor Dak Lak hŏ ƀư hăn khâl, pă nklâm ndơ ăp nuĭh dơi kơl, nuĭh geh n’hâm suan đah lĕ rngôch rnoh prăk dŏng ƀư 15 rmen prăk; leo 55 nuĭh geh n’hâm suan đah cách mạng ntoh lư bah n’gor hăn uănh pâl ăp n’gor miền Trung n’hanh miền Bắc; leo 240 nuĭh geh n’hâm suan đah cách mạng hăn rlu rlău sĭt dăng n’hâm suan ta ntŭk rgum mât chăm an nuĭh geh n’hâm suan miền Trung

         Mpơl nău way “Ngêt dak nkah gĭt tu tơm", tâm bah ri aơ, mom ndăm Dak Lak hŏ geh âk nău kan na nê̆, ngăn ngăn rƀŏng tât ăp rnăk dơi kơl, tahen ơm khĭt rmanh tâm n’gor. Nê lah ăp nău kan kơl êng tâm trong gŭ rêh, pah kan jan sa mir ba, rgŏ jă tơm ndơ rdâk njêng hang rhiăng mblâm jay tâm rŏng băl tahen, pă an hang rbăn nklâm ndơ, siƀŭt mpêt nkrem rgop kơl ăp rnăk bah ir jêr jŏt. Êng 6 khay bôk năm  aơ, lam n’gor hŏ ƀư bơi 300 nău kan nkah gĭt n’hâm suan, ngêt dak kah gĭt tu tơm, nkre đah ăp nău kan sĭt mpeh tu tơm, ntĭm nti nău way ơm cách mạng an druh ndăm rchong.

        Lơn lah tâm khay 7 ăp năm, ta ăp nkuâl geh âk nău  kan tĭng khay “Nkah gĭt n’hâm suan”, “Ngêt dak nkah gĭt tu tơm” tă bah Tỉnh đoàn rgŏ jă. Yuh Phan Thị Trinh, Groi Bí thư Tỉnh đoàn Dak Lak an gĭt.

          Ăp ntŭk kan đoàn tâm dâng tĭng ƀư  ăp nău  kan nkah gĭt n’hâm suan, ngêt dak nkah gĭt tu tơm gay ntĭm nti an đoàn viên, druh ndăm rchong kon se jê̆ mpeh nău way ơm cách mạng, n’hao êng săk rnoi nuĭh, nău dơn kan bah druh ndăm aƀaơ. Ăp ntŭk kan đoàn ri leo ƀư ăp nău kan chop khâl n’hanh pă nklâm ndơ ăp rnăk dơi kơl, nuĭh geh n’hâm suan đah cách mạng, me Việt Nam dăng janh, geh ăp nău kan nkra tay ăp ndah rup, ndah nchih săk nkah gĭt ăp tahen ơm khĭt, leo ƀư mpoh jrêng nkah gĭt ăp tahen ơm khĭt tâm măng 26/7 du rơh tâm lam n’gor.

          Tĭng Sở Lao động - Thương binh n’hanh Xã hội n’gor Dak Lak, let năp tay, n’gâng kan mbra ntrôl dăng tay lơn đŏng tâm pah kan nkoch trêng gay rơh mom ndăm gĭt wât mpeh nău way ơm rlăch ndăng bah ăp tahen ơm khĭt dăng janh, ăp roh yot têh kuâng bah rơh u che he kăl e. Ntơm bah nê ntô̆ n’hao ăp nău way ơm uĕh lăng bah rnoi nuĭh, nkre ƀư jăp lơn  đŏng pah kan “Nkah gĭt n’hâm suan". Bah meng nê lah an ƀư năn ngăch, geh nău tam ăp trong kơl dơh bah Ngih dak, nta trong dơh gay nuĭh geh n’hâm suan n’hanh rnăk wâl rgâl geh nău rêh, năl di tay n’hanh ntô̆ n’hao nău way ơm cách mạng bah rnăk wâl, rnoi deh keh na. Ƀư jăp pah kan dja lah trong rƀŏng tât mât chăm rnăk dơi kơl, nuĭh geh n’hâm suan đah cách mạng geh rnoh rêh dah mô lah rlău nuĭh ƀon lan ntŭk he ntŭk gŭ rêh.