Nau geh kơl an phe ân ăp rnăk tăm bri bah dih sŏk si tâm n’gor Kon Tum rnôk aơ ê geh ƀư. Aơ lah nau kan geh ntoh măt HĐND n’gor Kon Tum gưl XII kơl an, ôp nau tâm rơh rƀŭn tal 7 dôl geh tâm nkuăl ƀon têh Kon Tum. Wa Ka Ba Thành, Bí thư nkuăl uỷ Tu Mơ Rông ntoh nau ji nuih yor nau aơ tâm Bôk nau nchrăp 3 Bôk nau kan neh dak hun hao văng sa rêh jêng nkuăl rnoi mpôl đê̆ ndrel gôl yôk, rnôk aơ n’gor ê geh dơi ƀư:

            ‘Nau kan aơ lvang năm 2021-2025 rnôk aơ dĭng lĕ 2024 jêh ri dĭng jŏ mơ geh ƀư? Gâp đă kơl an nau rđau đă nkô̆ nau aơ ân kônh wa rnoi mpôl đê̆ ndrel rnăk rnoi Yoăn jêr jŏt dơi geh nau geh kơl an nau kan ndrel nau kan aơ ơm lăp tâm nau rêh”.

            Năm 2024 rnoh kơl an tăm bri bah n’gor Kon Tum tĭng nau nchrăp lah rlau 2.100 ha, ndrel nau ŭch kơl an phe ân ăp rnăk râng mât bri, tăm bri rlau 1000 tấn. Tĭng wa Nguyễn Hữu Tháp, Groi Kruanh UBND n’gor Kon Tum, nkô̆ ê geh dơi ƀư rnôk aơ lah nau nkol geh tât nau ntrŭnh tâm Điều 22, Thông tư mrô 12 lơ 20/9/2022 bah N’gâng kan tuch tăm ndrel hun hao ƀon lan:

            ‘Nau nkol ta aơ lah rnôk aơ ê geh nau ntrŭnh n’hêl gay năl rnoh kơl an phe tĭng rnoh neh tăm, rnoh nŭih tâm di ma nau ngăn geh bah nkuăl. Ê geh nau ntrunh mpeh ntŭk kan geh nau uănh năl ân ƀư bôk nau kan pă phe mât ndrel hun hao bru. Ê geh nau ntrŭnh geh nau dơi mbơh rnoh phe tâm nkuăl gưl n’gor, gưl nkuăl ndrel ntŭk kan geh nau dơi mbơh”.

            Geh tât nau nkol mhe nkah, dơi gĭt n’gor Kon Tum hŏ geh âk nau mbơh bah ăp N’gâng kan, ntŭk kan Trung ương đă mbơh gay ma doh rklaih. Yơn lah, tât nrôk aơ ăp N’gâng kan, ntŭk kan Trung ương kŏ ê geh nau mbơh ngăn ri ma n’gor ê geh ƀư nau kơl an phe ân rnăk râng tăm bri ndrel hun hao bri bah dih tơm si. Âk nau đă bah ăp ntoh măt HĐND n’gor Kon Tum ân lah, nau ntrŭnh, nau kan geh yơn mbrơi lăp tâm nau rêh, khuch ngăn tât nkô̆ nau văng sa, rêh jêng kŏ kơt lah nau rgâl nau rêh bah ƀon lan.

            Kŏ tâm rơh rƀŭn aơ bah HĐND n’gor Kon Tum, nau kan rnăk ƀon lan rnoi mpôl đê̆ mô geh neh gŭ ndrel nah tăm dôl ƀư nchră ak. Âk nau mbơh bah ntoh măt ân lah, geh nau mô tâm ban đah nau mbơh ndrel nau ngăn bah nau rêh ƀon lan. Tĭng nau mbơh bah UBND n’gor Kon Tum, nchrăp tâm 6 khay bôk năm 2024, rnoh rnăk rnoi mpôl đê̆ geh neh tâm n’gor ndrel neh tăm lah 99,3%. Yơn wa Phan Thị Thuỷ, Kruanh Ban văn hoá-xã hội ntoh nau hôm rvê đah rnoh geh kơp ndrel rnoh nau rêh bah ƀon lan:

            ‘Nau ngăn dôl geh, du ngih geh 2,3 rnăk tâm nê. Kŏ knŭng lah sa, gŭ pâl yor lah mô geh neh tuch tăm. Mbơh ngăn lah kơt nê. Ân geh kơp ngăn mhâm ƀư gay rklaih du gưl yơn mô nơm tĭng rnoh mbơh nkoch ri jêr ngăn”.

            Ntoh măt HĐND n’gor Kon Tum ân lah, nau kan rklaih neh tuch tăm, neh gŭ ân nŭih rnoi mpôl đê̆ mô knŭng kơl an rnăk ach o đăp mpăn nau rêh ma hôm n’hao nau rnơm tâm nau rđau kan bah Đảng, Ngih dak; rgop nau n’hao, ƀư nap nau tâm rnglăp ăp rnoi, mât đăp mpăn chính trị, rêh jêng nkuăl ƀon lan rnoi mpôl đê̆, nkual n’har bri bah neh dak. Yor ri, nau ƀư kan aơ ân geh mât đăp mpăn, tâm di ma nau dôl geh. Wa Xiêng Thanh phúc, lah rjăp, wa mô geh nau rnơm tâm rnoh mbơh bah n’gor, knŭng geh 1% rnoh rnăk mô geh neh gŭ ndrel neh tuch tăm:

            ‘Gâp mô rnơm ôh tâm rnoh aơ. Nau mĭn bah êng săk gâp saơ ê geh nau ngăn, hôm saơ vĭ vĕ ơm. Nau ngăn nơm saơ nkuăl rnoi mpol đê̆ ăp ntŭk kŏ mô geh tŏng neh. Jêh ri neh tuh tăm mô tŏng âk. N’ăp ma ƀon lan geh nau dơi ngăn tâm xã Đăk Nông ri hôm âk rnăk mô geh neh gŭm, neh tuch tăm. Phung he mhâm ƀư hăn tât rnoh geh mbơh ngăn”.

            Nau mbơh tă bah n’gâng kan bah n’gor Kon Tum ân saơ, rlau 20 năm rlau aơ, bah nau ƀư nau ntrŭnh, nau kan bah Đảng, Ngih dak, n’gor kơl an neh gŭ ndrel neh tuch tăm ân rlau 16.100 rnăk rnoi mpôl đê̆. Rnôk aơ, lam n’gor hôm bơi tât 3.900 rnăk rnoi mpôl đê̆ mô geh neh gŭ, neh tuch tăm./.