Tâm 11 khay bah năm 2022, rmôt kan bah n’gor Kon Tum hŏ saơ 83 nau tih Luật mât njrăng bri, sŏk kân rlau 419m3 si ăp ntil, rnoh neh bri geh khuch rlau 32 ha. Tâm rơh rƀŭn ôp nau HĐND n’gor Kon Tum, Wa Trần Bá Tuấn ntoh bar rơh geh tih tâm nkuăl Ia H’Drai ndrel Sa Thầy đah nau khuch ma rhiăng m3 si, wa lah rjăp geh nau ƀư lhơ bah ntŭk mât kan, pah kan mô nâp ndrel mô lah kơl ân phung ntŭng kăl si:

            ‘Đah rnoh si sŏk âk kơt nê ri lah nơm ƀư ueh nau kan tâm rgop, uănh năl kloh nau mât nau kan bah ăp ntŭk kan, rmôt kan tâm nê lah nŭih tơm bri, kiểm lâm, n’gâng kan...ri mô dơi geh du đê̆ nŭih ma dơi lăp ngăn tâm bri gay ma ntŭng kăl si đah rnoh âk kơt nê. Ndrel lah ntŭng kăl si kơt nê ri ntŭk trong bu nchăn leo. Hôm ơm ăp trạm ăp ntŭk kan đŏng ri nơm ân geh năl nau kan ndơn tih bah ăp trạm ƀư nau kan kơt nê ri mhâm ƀư?”.

            Ơh nau bah năp HĐND n’gor, wa Nguyễn Hữu Pháp, Groi Kruanh UBND n’gor Kon Tum lah rjăp ân geh ăp nau tih Luật ntŭng kăl si yor nau rđau kan, rđau đă bah ăp gưl uỷ, n’gâng kan du đê̆ ntŭk ê geh kơl an tâm di, nau kan bah du đê̆ cán bộ ƀư nau mât njrăng bri ê nâp, hôm ƀư tha tha, lhoi tâm nau kan mât njrăng bri, kơl an nŭih ntŭng kăl si, nchuăn rdeng si tih dôih, nau kan kơl an tâm nau mât njrăng bri hôm âk nau ê dơi, nau nâp tâm nau mât kan bah du đê̆ nŭih tơm bri ê geh nâp...Mpeh nau mât njrăng bri, wa Nguyễn Hữu Tháp, mbơh:

            ‘UBND n’gor mra lŏ rđau ăp ntŭk kan ndrel ăp nkuăl ma ngăn lah gưl nkuăl ndrel gưl xã gay ma mât dơi bri. N’hao nau mât nau kan bah tơm bri ndrel rmôt mât njrăng bri. N’hao lơn tay nau kan mêt uănh, nkân njrăng dơi ngăn lah ăp yan ƀư mir. Uỷ ban n’gor mra ndâk nau nchrăp gay ma n’hao nau kan mêt uănh, ndrel rđau ngăn ăp nkuăl ntơm bah nkuăl tât xã ndrel ăp rmôt kan gay ma saơ, năn rklaih ndrel ngăn lah mhal ân rjăp ăp nŭih geh nau tih”.

            Wa Nguyễn Hữu Tháp, Groi Kruanh UBND n’gor Kon Tum kŏ lah rjăp, rđil đah rơh năm 2021 nau tih Luật mât njrăng bri tâm n’gor hŏ n’huch n’ăp ma rnoh tŏ, rnoh neh khuch ndrel rnoh bri geh ntŭng kăl. Tâm năm, n’gor mhal 63 tŏ tih, mhal hình sự 17 tŏ ndrel dôl ma mêt uănh 23 nau tih. Mpeh nau mhal kỷ luật ri hŏ mhal 27 nŭih, tâm nê geh 16 rđau kan ngih phat dôih ƀon lan ăp gưl leo luh nau mhal 4 tŏ, mhal 20 nŭih đah rnoh 347 khay gŭ ndrung, 65 khay geh bu mêt uănh nchâp đă ndrel mhal mô geh leo lăp krŭng 60 khay./.