Ma âk trong ƀư ngăch rplăch, nsĭt geh nău tam, nkuâl Ea Kar, n’gor Dak Lak hŏ ƀư lôch jêh nău ntop kơl rdâk njêng jay gŭ an ăp rnăk ach o mpeh ntŭk nchrăp kan 1 bah bôk nău  kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang (1719) lvang năm 2021-2030.

Nchuăn ndơ sĭt jay mhe, rnăk yuh H'Bion Buôn Yă, ta buôn Ea Sar, xã Ea Sar rhơn mô dơi nkoch. Yuh H’Bion nkoch, 13 năm aơ, du jay 4 nuĭh gŭ nchep nchop hvi nklăp 20m2 jêng dŭt mô dơh uĕh. Nău wơl geh du mblâm jay hvi lơn dơi bar hê ur sai rvê hôch tĭng mông nar năm khay yơn mô hŏ dơi ƀư yor nău rêh hôm âk jêr jŏt. Rnôk gĭt dơi ngih dak ntop kơl mon jay, 2 hê ur sai yuh hŏ manh nkêh an êng du ding bât nău kan thuê an bu, sĭt kơl ƀư mon jay gay hŭch đêt huach prăk rdâk ƀư jay. Nơm geh kơt nê ma jay bar hê ur sai yuh têh hvi lơn:

“Aƀaơ dơi nghih dak ntop kơl hôm, ur sai hên đăp mpăn pah kan jan sa, rgum hun hao wăng sa, ngăch klaih luh ach o kro ngai.”

Nsum nău rhơn geh jay mhe lôch 13 năm gŭ nde ta jay truh sat, yuh H'Mah Mlô, ta thôn 6, xã Ea Sar, nkuâl Ea Kar nkoch: ur sai yuh hŏ hăn kan thuê bu wăr năm nha hôm sa mô ăp nđăp mô tŏng ơm n’hanh rvê an 2 hê kon hăn nti jêng mô  năn mĭn tât mbra mon geh jay nâp uĕh. Yơn nău mô  nănh wơl geh nê, aƀaơ hŏ jêng ngăn ngăn, nơm geh 44 rkeh prăk Ngih dak ntop kơl n’hanh 40 rkeh prăk manh bah Ngân hàng Chính sách xã hội. Geh jay mhe nâp uĕh, nău rêh bah ur sai yuh H’Mah tâm ban kơt pơk du plơp mhe:

“Ntơm nơh bar hê ur sai gŭ ta jay đar nchiăr reh, mih ri truh mbĕ mô gĭt mhâm ƀư. Ntơm bah rnôk geh n’gâng kan ntop  kơl an ur sai hên nău rêh uĕh lơn, nsrôih pah kan jan sa n’hanh oh kon hăn nti ăp tŏng lơn.”

Tĭng ƀư trong nchrăp 1, bôk nău  kan gưl neh dak 1719, năm 2023, xã Ea Sar dơi rdâk ƀư 36 mblâm jay an ăp rnăk ƀon lan rnoi mpôl đê̆. Tât aƀaơ, jay hŏ ƀư lôch jêh, nuĭh ƀon lan hŏ n’glăp dŏng. Tĭng wa Văn Đình Thìn, Kruanh Ủy ban nhân dân xã Ea Sar, lôch ntop kơl ƀư jay an rnăk ach o, xã dôl tĭng ƀư ăp njuat hăn gay ntop kơl neh gŭ an 44 rnăk mô geh neh gŭ ta ntŭk.

“Tĭng ƀư bôk nău kan ntop kơl neh gŭ an  ăp nuĭh dơi kơl tĭng trong nchrăp 1 ri xã hŏ ra tay đŏng. Aƀaơ xã mô geh tơm neh jêng rƀŏng tât bah xã lah dăp rgum ăp ntŭk tâm ndop gay ntop kơl an ăp nuĭh dơi kơl rvăt neh”.

Trong nchrăp 1 tâm bôk nău kan 1719, n’gor Dak Lak dơi tâm pă rlău 91 rmen prăk gay ntop kơl neh gŭ, jay gŭ, neh tuch tăm n’hanh dak dŏng an ăp rnăk ach o ƀon lan rnoi mpôl đê̆. Tâm nê, nkuâl Ea Kar lah ngoăy tâm du đêt nkuâl ta n’gor  ƀư wat jêh di rnoh ngăch, đah 150 rnăk hŏ geh jay gŭ, 629 rnăk dơi dŏng trong dak ngêt sa. Pah kan ntop kơl neh gŭ, neh tuch tăm dôl dơi nkuâl ntrôl ngăch ƀư đŏng, nsrôih lôch jêh tâm năm 2024 dja.  

Wa Nguyễn Đăng Kai, Groi kruanh Jrô kan rnoi mpôl đê̆ nkuâl Ea Kar an gĭt, gay an ƀư geh nău tam trong nchrăp 1 bah bôk nău kan 1719, lôch rnôk geh trong nchrăp n’hanh ntĭm nti bah Trung ương n’hanh n’gor, Jrô kan hŏ nsŏng kơl an UBND nkuâl nchră trong tĭng ƀư; nkoch gĭt, ntĭm nti ăp xã, thị trấn ra tay, nchih tay săk, ƀư ndơ  nsing gay uănh an  trong kơl…nkre ntrôl dăng pah kan nkoch trêng gay njêng nău tâm ban ŭch bah nuĭh ƀon lan.

“Lor rnôk mpôl hên an ƀư ta ăp rơh hop n’hanh mhâm ƀư ân grêt dêh đah nău  kan, jao di nuĭh gay mât uănh nău kan n’hanh ƀư di rêng, di quy định bah pháp luật. n’hanh hŏ ndơ̆ luh ăp trong nchrăp na  nê̆ ri lĕ rngôch ăp đơn vị, nhih pah kan, ăp nuĭh dơi mât uănh bu ƀư lĕ  n’hâm suan. Nău  kan lĕ nuih n’hâm dja lah gay jêng geh nău dơi.”

Nơm geh  nău lăp kan lĕ n’hâm suan bah n’gâng kan ta ntŭk n’hanh ăp nhih pah kan dơi kan, hang rhiăng rnăk ach o, rnăk dăch kêng ach o mpeh nkual rnoi mpôl đê̆ mpeh yôk yang nkuâl Ea Kar, n’gor Dak Lak, geh jay gŭ, đăp mpăn nău rêh, rgop kơl nkuâl ntrôl ngăch rnôk tĭng ƀư n’hŭch ach o, đăp mpăn lam rêh jêng kon nuĭh./.