Ƀư tĭng nau ntrŭnh mrô 45/QĐ-TTg lvang năm 2019-2021, 19 ntŭk nkra báo, tạp chí râng nkô̆ nau ndrel nau rƀŏng nkoch trêng, vay mbơh nau mhe ndrel nkô̆ nau nkoch mbơh, n’hao nau ueh bah nau nchih, nkoch, rup, mbơh ngăn nau rêh bah nkuăl rnoi mpôl đê̆ ndrel gôl yôk, ueh, kloh, tâm di đah nau vay, nau mĭn, nau ơm bah ăp rnoi...Êp ăp nau săk tam ngăn tâm nau nkoch trêng, hôm geh  du đĕ nkuăl jêr, kơt: Nŭih ƀon lan geh kơl an ri ngăn lah tâm nkuăl jru, ngai, nkuăl trong hăn hôm jêr, ngih vâl gung trong kan mô nâp, ri ma pă ăp n’ha báo hôm mbrơi, ngăn lah rnôk mih, n’ach. Nkô̆ nau nchih ê geh tâm ban đah ăp nkuăl, ăp nau kan, du đê̆ nau nkoch ê tâm di đah nau blau, nau gĭt ndrel nau ŭch bah kônh wa. Nau kan tâm rgop tâm nau ƀư đah ăp ntŭk kan Trung ương ndrel nkuăl ê geh rjăp. Du đê̆ nkuăl, ngăn lah xã, thôn ê geh mât ueh n’ha báo, nau mêt uănh ê ƀa ƀơ...

            Kruanh Uỷ ban Dân tộc Hầu A Lềnh nkoch mbơh, nau ŭch ntuh kơl ngăn nkualư rnoi mpôl đê̆ ndrel nkuăl yôk têh ngăn, yơn nau ƀư hôm nkol, khuch ngăn tât nau pă tơm prăk. Đah nau kan rlong ƀư pă Radio ân nkuăl rnoi mpôl đê̆, nkuăl jêr, n’har bri, wa Hầu A Lềnh mbơh:

            ‘Bôk nau kan aơ geh Thủ tướng Chính phủ ntrŭnh ân ƀư tâm năm 2017 tât 2018 Thủ tướng Chính phủ kí nau ntrŭnh jao tơm prăk, yơn jêh jao tơm prăk tât khay 8/2019, Uỷ ban Dân tộc mơ ƀư jêh nau kan, ma jêh lôch geh dơi bôk năp, mô geh ntŭk ŭch ntuh kơl tŏng nau kan ơm. Nkre tâm rnôk nê, Uỷ ban Dân tộc dôl mbơh đah Quốc hội ntrŭnh nau kan rgum hun hao văng sa, rêh jêng nkuăl rnoi mpôl đê̆ ndrel nkuăl yôk, tâm nê rgum ndơ dŏng uănh, djăt ân nkuăl roi mpôl đê̆ tâm 10 nau kan, kơt lah nau kơl an êng ê geh ƀư, năm 2020-2021, N’gâng kan tơm prăk mô jao prăk ƀư nau kan aơ ôh, ri nơm kâp nau ntrŭnh jao prăk bah ntŭk kan tơm. Tât rnôk aơ, hŏ jao prăk ân ăp nkô̆ nau hôm, tâm nê geh rgum 10, Uỷ ban Dân tộc rđau ăp ntŭk kan kơp ndrel uănh ƀư nau kan aơ đah tơm prăk bah năm 2022”.

            Rnôk aơ, âk nkuăl rnoi mpôl đê̆ ndrel gôl yôk ndrel geh nau rđau ƀư ăp nau kan pă du đê̆ n’ha báo tâm Bôk nau kan bah neh dak hun hao văng sa, rêh jêng nkuăl rnoi mpôl đê̆ ndrel gôl yôk, lvang năm 2021-2030, rơh I: Ntơm năm 2021-2025. Tĭng nê, UBND ăp n’gor jao Ban Dân tộc n’gor ƀư tơm, tâm rgop nsum đah ăp ntŭk kan, UBND ăp nkuăl ƀư tơm kơp, ăp năm ndâk nau uănh nau pă n’ha báo tâm n’gor, đăp mpăn tâm di nŭih, tŏng ndrel năn tĭng nau ntrŭnh. Rgum moh săk nŭih geh kơl, rnoh n’ha báo tât xã, thôn, ngih săm ƀŭt ndrel ăp ntŭk kan chính trị-rêh jêng, Nŭih geh bu rnơm tâm nkual rnoi mpôl đê̆ ndrel ăp nkuăl bah n’gor tĭng ăp ntil n’ha báo geh kơl an tâm nau ntrŭnh 45 bah Thủ tướng Chính phủ. N’gâng kan nkoch mbơh nau ƀư tơm, rđau, uănh nau jao, pă ăp n’ha báo ân năn gay ma đăp mpăn, tâm di nŭih, tâm di ntŭk. Rnâng UBND ăp nkuăl n’hao nau tâm rgop đah ăp rmôt kan chính trị, rêh jêng: Geh nau dơi mât, dŏng, pơk trong ân ăp đoàn viên, rmôt geh răk, uănh, djăt, nkre dŏng gay ma nkoch trêng, mbơh tâm ăp nar rƀŭn...

            Mhe aơ ngăn, Uỷ ban Dân tộc tâm rgop nsum đah ăp ntŭk kan, n’gâng kan tâm Trung ương ndrel UBND ăp n’gor, nkuăl ƀon têh ƀư tâm nchră trực tuyến lam dak rgop Bôk nau kan “Lŏ ƀư ăp nau pă du đê̆ ntil n’hao báo ndrel mĭn nau rgâl nau kan mbơh nau tâm di đah nau geh bah nkuăl rnoi mpôl đê̆ ndrel gôl yôk, nkuăl jêr jŏt” lvang năm 2023-2025.

            Tâm rơh rƀŭn, ăp ntoh măt lah: Nau ntrŭnh 45/QĐ-TTg lah nau kơl an rgop nau nkoch nau ntrŭnh bah Đảng ndrel Ngih dak, lah nau tâm nchră gay kônh wa kơt tĭng nti, lŏ mbơh nau kônh wa gay ma rgala, ntop, ndâk nau kơl ân nkuăl rnoi mpôl đê̆ ndrel gôl yôk. Tâm rơh tât, ŭch ăp n’gâng kan, ăp nkuăl ân geh n’hao nau nâp, rgâl nau kan, leo tât ăp nau ma nŭih ƀon lan ŭch đah nau ntrŭnh bah Đảng ndrel Ngih dak. Mât tâm dăch nau ntrŭnh bah Đảng, Quốc hội, Chính phủ gay ƀư kơl an ƀon an, uănh nau ŭch bah kônh wa moh nau ŭch.

            Ban Dân tộc ăp nkuăl kŏ đă Uỷ ban Dân tộc lŏ kơl mbơh nchră đah Thủ tướng Chính phủ pă mô sŏk pră`k ăp ntil n’ha báo ân nkuăl rnoi mpôl đê̆ ndrel gôl yôk lvang năm 2022-2025; n’hao rnoh báo ân ăp rmôt kan chính trị, rêh jêng thôn, áp, ăp ngih săm ƀŭt Dân tộc nội trú, Nkre pơk ân âk nŭih geh kơl an ân ntŭk kan rnoi mpôl đê̆ ăp gưl, cán bộ ƀư nau kan rnoi mpôl gưl xã (ngăn lah ăp ntŭk ƀư báo mĭn, ƀư jru, ƀư du nau kan”.

            Tĭng wa Hoàng Thị Hạnh, Kruanh N’gâng kan, Groi ntŭk kan ƀư tơm bah Uỷ ban Dân tộc, rnôk aơ Uỷ ban Dân tộc hŏ đă ăp nau rgâl mhe mpeh nkô̆, nau kan mbơh nau tâm di đah nau dơi bah nkuăl rnoi mpôl đê̆ ndrel gôl yôk, nkuăl jêr ngăn. Mpeh nkô̆ nau, ăp nau nchih nsing tâm nau đă, nkô̆ nau bah báo nơm ŭch ƀư ăp nkô̆ nau ân ăp nŭih geh kơl an, gay rklaih nau leo ăp nau mbơh tma kơt, âk lir, jêr rdâng, jĭ jong, n'huch ngăn  nau bư dil, mpŭng tơm prăk. Mpeh nau mbơh nau: đă ndâh App ƀư trang điện tử mpeh rnoi mpôl đê̆ ndrel gôl yôk gay ma mbơh nau geh rgum tă bah nau mbơh, ăp nkô̆ tât nŭih răk. Êp nê, nau mbơh bah ăp báo geh dŏng nau dơi geh răk êng đah nau ngơi yoăn ndrel du đê̆ nau ngơi rnoi mpôl đê̆ gay mbơh nau năn tât nkuăl hăn ro jêr, tât ăp nŭih ƀon lan, ntŭk mât mbơh nau bah điện thoại, máy tính ndrel ăp ndơ uănh-djăt êng:

            ‘Nau nkoch mbơh bah nơm ân geh ƀư rjăp, ntrŭt dăng lơn tay, nơih gĭt lơn tay, tâm dăch lơn tay, tâm di đah nau vay ơm bah kônh wa, gay bu mra geh nau nkoch mbơh. Ndrel nau nkoch mbơh geh tă bah bar đah aơ mô geh nau tih ma păng geh tă bah play nuih nơm ŭch. Nkoch mbơh mpeh báo ngơi, báo rup ndrel ăp ntŭk kan êng, nau kơl an  bah ăp ntŭk nkoch mbơh nau aơ lah ntŭk ƀư rêng ngăn, ngăn ngên, ndrel tât nkuăl rnoi mpôl đê̆ hôm geh tay du nau kan nê lah nau ngơi, nau ngơi Yoăn ri lah du nau ơm, yơn gay ma jru lơn, tâm dăch lơn ndrel ân bu rgum âk lơn ri rnôk aơ ntŭk kan ntoh rup Việt Nam, Radio Việt Nam geh ăp kêng nkoch mbơh nau ngơi bah rnoi mpôl đê̆, hôm e lah ăp báo in ân geh ƀư âk nau kan êng, ngăn lah rup, nau ngơi”.

            Ndăn nau hun hao bah ăp ntil báo chí âk ntrong, âk ntil, tâm rơh tât, nau ntrŭnh pă báo ân kônh wa rnoi mpôl đê̆ ân geh lăp tâm nau ngăn, rklaih nau dôl geh bah ăp ntil n’ha báo mbrơi tât ty nŭih răk, roh nau mhe, “kâp jŏ” tâm ăp ntŭk tă geh tâm du đê̆ ntŭk. Mô êng mbơh nau tât kônh wa rnoi mpôl đê̆, ma nau kan hôm ân geh kơl an nŭih răk tâm dak ndrel dak ba dih geh tay nau dơi gay ma gĭt mpeh ăp nkuăl rnoi mpôl đê̆ du ntrong ngăch, tơm, jru, tâm di, săk tam bah nau nkoch mbơh geh n’hao prêh./.      

            Thu Hà/VOV4