Ăp năm aơ, hŭch ach o jŏ jong lah ngoăy tâm ăp nău dơn kan khlay bah nkual ƀon têh Pleiku, n’gor Gia Lai.

Tĭng ƀư bôk nău kan bah Ban Chấp hành Đảng bộ nkual ƀon têh Pleiku khoá XII “mpeh ntrôl dăng tay pah kan n’hŭch ach o jŏ jong gay n’hao săk geh nău rêh ƀon lan, lơn lah ta ăp ƀon lan rnoi mpôl đê̆ ta ntŭk”, ntơm bah bôk năm 2021 tât aƀaơ, nkual ƀon têh kan nsum đah ăp nhih pah kan, đơn vị, UBND ăp xã, phường rgŏ jă ăp doanh nghiệp, ăp nuĭh lŏng nuih n’hâm, prăk nkrem “an nuĭh ach o nkual ƀon têh" n’hanh bah xã ntop kơl 95 rnăk rdâk njêng mhe n’hanh nkra jay gŭ đah lĕ rngôch rnoh prăk rlău 4,7 rmen prăk; ntop kơl kon ntil, phân poh, tơm prăk tuch tăm 1,2 rmen prăk; kơl 252 rnăk ach o, dăch kêng ach o, mhe klaih rlău ach o manh tơm prăk rlău 13,8 rmen prăk. Wa Trần Tấn Quang, Kruanh Jrô kan wăng sa nkual ƀon têh Pleiku, an gĭt, rnoh rnăk ach o ta nkual ƀon têh âk rlău 0,24%, đah 149 rnăk. Nkual ƀon têh dôl gŭ mĭn tay, an ƀư tay âk trong leo wăng sa tâm di gay n’hao săk tam bah pah kan dja.