Ăp năm mhe aơ, mpet jâk mât njrăng bri nar lơn ma hô rnôk ndơ kơl đêt, klach rvê way rŭ hôch dôl kâp ndŭ ƀư ăp năm ta Gia Lai hôm geh tay bar pe jât nuĭh mât njrăng bri rlu kan.

 Tĭng rnoh n'glĕ an, gay mât njrăng 10.000 ha bri ta xã Ia Mơr, nkuâl Chư Prông, Ban mât njrăng bri tu dak nching sial Ia Mơr ân geh 17 nuĭh kan. Yơn lah, tâm âk năm aơ, lam đơn vị dơn geh 12 nuĭh mât njrăng bri dơm. Pah kan mô kơp măng nar ta ăp ntŭk duh hô mpeh nău tih luật mât njrăng bri bah n'gor, yơn rnoh prăk khay bah cán bộ, nuĭh kan ta aơ nklăp 5 tât 7 rkeh prăk/nuĭh/khay dơm. Wa Đinh Văn Khẩn - Kruanh Ban mât njrăng bri tu dak nching sial Ia Mơr, 1 tâm rnoh 5 nuĭh bah ƀan, nchih siƀŭt dăn rlu kan tâm năm 2022, yơn mô hŏ dơi nkra rlu, an gĭt:

“Pah kan mât njrăng bri aƀaơ duh jêr ngăn, ta Ƀan mât njrăng bri Ia Mơr lơn ma hôm duh jêr lơn đŏng, dăch kêng Thuỷ lợi Ia Mơr. Geh 3 n'hong dak me ƀư njok lĕ rngôch tâm bri, hôm nuĭh ƀon lan saơ kơt nê̆ ri ŭch geh neh tuch tăm. 2 hê nuĭh rlu kan hôm. Aƀaơ ma rlu ri  mô geh nuĭh kan".

Dŭt ŏ r'ah, prăk khay đêt, nuĭh kan mât njrăng bri hôm way tâm mâp đah nău klach rvê. Wa Đinh Mạnh Phong- Kruanh Ƀan mât njrăng bri tu dak nching sial Chư Sê an gĭt, aƀaơ, rĭng ăp nuĭh kan mât njrăng bri dơn mât njrăng 1 tiểu khu, tâm ban đah 1000ha bri. Bri yôk yang way tâm ngai đah nkual ƀon lan gŭ, bri lĭng dak rngot. Mpôl ntŭng lơh si plơng lơh tay, yơn mpôl mât njrăng bri đêt nuĭh rbăn lhơ:

“Du đêt oh nô geh mpôl ntŭng lơh si ntêt nkri, khuch tât nuih n'hâm pah kan. Nău dơi kan bah ăp ƀan mât njrăng bri đêt ngăn, dơn geh ban saơ lôch nê hăn mbơh gĭt tay dơm. Kơt ntŭk gâp kan, tĭng nău way ri ndơ nsoh, ndơ rnă săk ri sŏk ta đơn vị, tơm sŏk geh wăng sa dŭt đêt, ân tâm ntêr ntop dơm".

Ta n'gor Gia Lai aƀaơ geh 22 ƀan mât njrăng bri, đah bơi 500 cán bộ, viên chức, rđĭl đah rnoh ŭch geh nuĭh mât njrăng bri ri hôm mô tŏng rlău 200 nuĭh. Nuĭh mât njrăng bri hŏ mô tŏng hôm, yơn 2 năm aơ, geh rlău 20 nuĭh hŏ dăn rlu kan ngăn, bar pe jât nuĭh êng ƀa ƀă geh nău ŭch dơn rlu kan tâm ban kơt nê đŏng.

Wa Nguyễn Văn Hoan- Groi Giám đốc Sở Nông nghiệp n'hanh Phát triển Nông thôn an gĭt, n'gâng kan hŏ n'gluh an ƀư âk trong nkra gay kân jâng nuĭh mât njrăng bri, yơn lơn âk gay tâm rgŏ jă kan nsum dơm:

“Ta năp măt, mpôl hên rgŏ jă cán bộ công nhân viên rŏng đah nău kan, krêp dêh gay đăp  mpăn pah kan mât njrăng bri, nkre nta trong dơh an tâm pleh cán bộ công chức pah kan ta nkual jru ngai sĭt dăch lơn gay bah ir roh mông nar hăn ngai, nta trong dơh an oh nô tât đah ăp trong kơl mhe gay oh nô đăp mpăn pah kan". 

Aƀaơ, Sở Nông nghiệp n'hanh Phát triển Nông thôn Gia Lai nsŏng kơl tay an UBND n'gor dăn đă trung ương mĭn uănh, rgâl di trong kơl, rgâl dơh uĕh ntŭk pah kan đah mpôl mât njrăng bri./.

VOV Tây Nguyên/Nuĭh rblang: Điểu Thân