Rlău 3 khay aơ, tât 6 mông bah nar ngoăy tât nar 6 ăp pơh, jrô ntĭm răk-nchih ta Ngih sam ƀŭt Tiểu học Ngô Quyền (phường Chi Lăng, nkual ƀon têh Pleiku lŏ ang ŭnh n’hanh nteh nău răk samƀŭt bah ăp nuĭh nti. Jrô nti geh 30 nuĭh ta ƀon Ia Lang, phường Chi Lăng, nkual ƀon têh Pleiku. Jêh rnôk nchih ăp rplay samƀŭt ma nai nchih ta nsưng nchih, yuh H’Thiếu, du hê nuĭh me 3 kon râng jrô nti aơ, nkoch:

“Bah năp đaơ, rnăk wâl gâp ach o, bơ̆ roh ơm, rnăk wâl mô geh ndơ mô an jêng gâp mô dơi hăn nti, jêng mô gĭt rplay samƀŭt. Mhe aơ, dơi kruanh thôn, phường n’hanh mpeh ngih samƀŭt tât ntrŭt đă, gâp nsrôih hăn nti gay gĭt rplay samƀŭt. Ăp nar bôk năp râng hăn nti rplay samƀŭt dŭt jêr jŏt, yơn gâp ŭch gĭt răk, gĭt nchih, jêng nsrôih nti”.

Ta jrô nti, wa H’Lung (57 năm deh, gŭ ndrel ta ƀon Ia Lang, phường Chi Lăng dôl nti nchih ăp mrô dơh. Wa H’Lung nkoch, yor săk lĕ ranh, jêng dơi djăt dơn mô âk ăp nuĭh mom lơn tâm jrô nti, ndrĭ yơn đah nău nsrôih mô an săk nơm geh rlŭk mâl, wa lĕ gơih tât jrô nti. Aƀaơ wa lĕ gĭt răk, dơi nchih săk nơm.

“Gâp mô gĭt rplay samƀŭt, mô gĭt kơp, dơi hăn nti gĭt rplay samƀŭt, nchih êng săk nơm răm ngăn, lah uĕh nai lĕ ntĭm an gâp n’hanh an ăp nuĭh”.

Tĭng nai Dương Thị Kiếu-Ngih samƀŭt Tiểu học Ngô Quyền, phường Chi Lăng, nkual ƀon têh Pleiku, jêh uănh nđôi bôk năp bah ngih samƀŭt an saơ, ƀon Ia Lang geh nklăp 100 nuĭh mô gĭt rplay samƀŭt. Rnôk dơi rgŏ jă tât jrô nti âk nuĭh hôm e đit, prêng lĕ têh săk, du đêt nuĭh êng prêng yor nơm mô dơi kăr. Yơn lah, jêh rnôk tât jrô nti du đêt nar, ăp nuĭh jêng bên ŭch, tâm jă tât jrô nti âk lơn.

“Jrô nti dŭt âk lah nuĭh têh ranh, mô geh dơi tât jrô nti, rnôk tât ta aơ rplay samƀŭt đah khân pơng dŭt jêr ndrĭ yơn khân pơngf dŭt ŭch nti bôl bri nđik, mô lah mih ri khân pơng tât jrô nti tŏng ăp. Aƀaơ nchih ăp nuĭh lĕ dơi nchih 100%, mpeh răk ma răk blău ri dơi răk rlău 50%”.

Tâm ban ma nĕ, Ngih samƀŭt Tiểu học Lê Lai (xă Chư Á, nkual ƀon têh Pleiku) lah ngoăy tâm 7 ntŭk ntĭm nti ta lam nkual ƀon têh dơi săch ƀư nău kan ntĭm răk n’hanh nchih an nuĭh ƀon lan nkual rnoi mpôl đêt tĭng bôk nău kan rƀŏng tĭng lam dak hun hao wăng sa rêh jêng nkual rnoi mpôl đêt n’hanh nkual yôk lvang 2021-2030.

Nai Lê Minh Tùng-Hiệu trưởng Ngih sam ƀŭt Tiểu học Lê Lai an gĭt, ngih sam ƀŭt lĕ tâm rgop đah UBND xă Chư Á n’hanh ăp thôn ƀon, kơp uănh rnoh nuĭh rnoi mpôl đêt mô gĭt răk nchih tâm rnoh năm deh 15 tât 60, gay rgŏ jă kônh wa râng nti.

“Ngih samƀŭt lĕ ndâk njêng rmôt rgŏ jă nuĭh nti bah 15 tât 60 năm deh hăn jrô nti n’hanh tât aƀaơ geh 23 nuĭh nti jrô mô gĭt rplay samƀŭt. Bôk nău kan jŭt jăng mô gĭt rplay samƀŭt dơi pă ƀư 2 lvang, lvang 1 geh 3 kì, tâm ban đah 42 pơh, tâm ban du kì lah 315 tiết ntĭm, lvang 2 ƀư jêng 2 kỳ, tâm ban đah jrô 4 n’hanh jrô 5 ri lôch nti”.

Êng tâm năm aơ, n’gâng kan ntĭm nti Gia Lai mbra tâm rgop đah Ban Dân tộc n’hanh ăp ntŭk kan geh tât tâm ôp an UBND n’gor pă an prăk sĭt ăp ntŭk gay pơk 217 jrô an rlău 6500 nuĭh. Wa Nguyễn Văn Đông-Kruanh jrô kan ntĭm nti Tiểu học, Mầm non, N’gâng kan ntĭm nti n’gor Gia Lai, an gĭt:

Băng: “Aơ lah bôk nău kan nsĭt tay nău rêh an nuĭh rnoi mpôl đêt lah nsum n’hanh Gia Lai lah êng dơi n’hao nău gĭt blău gay bah nĕ rklaih ach o, n’hao uĕh nău rêh bah nơm. Aƀaơ bôk nău kan aơ lĕ dơi pă an ăp nkuăl, nkual têh, nkual ƀon têh, du đêt ntŭk kan lĕ rgum nuĭh nti gay nuĭh nti ƀư bên đah nău nti. Tâm năm tât bôk nău kan mbra dơi pơk hvi n’hanh mbơh ƀư ntĭm nti âk ta ăp ntŭk”.

Tĭng trong nchrăp ƀư tĭng bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk lvang 2021-2025, n’gor Gia Lai ƀư 735 jrô nti răk-nchih an bơi 23.500 nuĭh ta 176 xă.