Ta rơh tâm nchră, ăp ntoh măt râng âk nau rgop geh nau khlay tâm nau nchrăp Luật neh ntu (rgâl nkra). Rđau kan ăp n’gor Tây Nguyên ndrel n’gor Ninh thuận, Bình Thuận, mbơh, jêh geh nau ntrŭnh mrô 671/NĐ-UBTVQH15 lơ 23/12/2022 bah Uỷ ban Rnâng kan Quốc hội ndrel nau nchrăp bah Chính phủ mpeh nau sŏk nau rgop bah ƀon lan đah nau nchrăp Luật neh ntu (rgâl nkra), ăp nkuăl hŏ ƀư âk rơh rƀŭn, âk ntrong nkoch mbơh nau gay ma nkoch trêng, sŏk nau rgop jru bah ƀon lan.

Ăp nau kan tơm bah nau nchrăp Luật, kơt: Nau rgum, nau nchrăp dŏng neh, nau sŏk lơi neh ndrel nau kan trok tâm dŏng neh, đăng ký neh, pă săm ƀŭt kơp dơn ndrel ăp nau ƀư kan hành chính, mrô mbơh, nau mbơh tât neh, ntrong kan, nau kơl an tơm prăk, rnoh neh, nau dŏng ăp ntil neh, pă, uănh, uănh nau njrăng dŏng, rnăk vâl dŏng neh...geh tâm nchră, mbơh, rgop nau tâm nau ngăn, nau ơm geh neh ntu bah Tây Nguyên.

Ăp nau rgop ân lah, nkuăl Tây Nguyên geh ăp nau êng, ngăn lah mpeh nau ơm yau, nau ntrơn lăp gŭ mhe, lah nkual geh âk rnoi mpôl đê̆, neh bri geh âk...Ndri ma, tâm di đê̆ nkô̆ nau geh nau ntrŭnh ngăn ndrel mô ân geh tâm rkăng đah ăp luật êng. Ngăn lah đah nau mât neh tuch tăm, tăm bri, nau kơl an neh ân nkual rnoi mpôl đê̆, nau ntrŭnh rnoh tâm dăch ma rnoh tăch...Wa Nguyễn Ngọc Sâm, Groi Kruanh UBND n’gor Kon Tum, mbơh:

‘Jêh rnôk ƀư nau ntrŭnh 118 ri n’gor Kon Tum hŏ rgum tay neh ntu geh in, rnoh neh bah công ty mô dŏng ri jao ân nkuăl mât. Rnôk aơ nau jêr ngăn gay ma rklaih nau aơ lah âk nŭih dŏng tâm rnoh neh aơ, dŏng tih nkô̆. Jêh rnôk nchrăp luật neh ntu rgâl nkra ri ân geh nau ntrŭnh ân n’hêl, gay geh ăp nau nchrăp kan gay ma rklaih kơl ăp nŭih hôm dŏng neh, ăp nŭih mô dơi geh dŏng tay, rnoh năm ân manh, mô lah mhâm nau pă”.

Ntoh nau tâm nar pah kan, Kruanh n’gâng kan Tài Nguyên ndrel Môi trường Lê Minh Ngân mbơh, tât rnôk aơ, ăp n’gor tâm lam dak hŏ ntrŭnh nau nchrăp dŏng sŏk nau rgop bah ƀon lan đah ăp nau nchrăp Luật neh ntu (rgâl nkra). Âk nkuăl ntrŭnh ƀư tât gưl xã.

Tĭng wa Lê Minh ngân, N’gâng kan tài Nguyên ndrel Môi trường mra ngăch njoăl nau mbơh rgum nau sŏk nau rgop bah ƀon lan mpeh nau nchrăp Luật bah ăp nkuăl, N’gâng kan ân Uỷ ban văng sa, Uỷ ban pháp luật bah Quốc hội. Bah nê, ăp ntŭk kan bah Quốc hội mra uănh ân rjăp nau djăt, nau mbơh sŏk nau rgop bah ƀon lan bah ntŭk kan nchrăp ƀư. Đăp mpăn rgala nkra Luật nhe ntu tŏng dơi nau ŭch hun hao bah neh dak, tâm di kơt nau ŭch bah ƀon lan ndrel nau kan ma Nau ntrŭnh mrô 18-QĐ-TW lơ 16/6/2022 mpeh “Lŏ rgâl mhe. Ƀư jêh nau kan, nau ntrŭnh, nau dơi ân săk tam, nâp nâl nau mât  ndrel dŏng neh ntu, njêng nau nsôih leo neh dak nơm jêng dak hun hao geh âk prăk” nchrăp luh. Wa Lê Minh Ngân, Kruanh n’gâng kan Tài Nguyên ndrel Môi trường, ngơi:

‘Ân lah rjăp lah rơh sŏk nau rgop bah ƀon lan đah nau nchrăp luật neh ntu rơh aơ lah rnôk rƀŭn rgum chính trị, rêh jêng têh ngăn, geh âk ngăn. Bah nau pah kan đah ăp nkuăl tâm rơh rƀŭn nar aơ ăp nkuăl mbơh kŏ geh ntrŭnh ƀư tât gưl xã, ri đă nơm ân geh lŏ kơl an tât ăp nkô̆ nau geh nau dơi êng nâp bah nkuăl Tây Nguyên. Bộ Tài Nguyên ndrel Môi trường lah ueh ăp nŭih rđau kan bah ăp nkuăl tât đah rnôk tâm nchră nar aơ, đah nuih n’hâm kan prêh, ăp nau rgop nau ntoh nau ngơi geh nchrăp ueh, geh rgum tă bah âk ntŭk gay ma rgop nau ƀư ngăn ân ntŭk ƀư nau nchrăp nkra, nê lah n’gâng kan Tài Nguyên ndrel Môi trường tâm rgop nsum ƀư nau đă bah ƀon lan ndrel ƀư nau mbơh lŏ geh nau rgum mbơh jêh aơ”./.