Jêh 3 năm mhal tih plơ̆ sĭt ƀon Tôr 1, xă Glar, nkuăl Đăk Đoa, khay 10/2023 mhe rlău, nô Trôl lĕ dơi rmôt an manh prăk bah xă, ndrel n’gâng kan ƀon lan tâm ban ŭch mbơh n’hanh kơl manh 50 rkeh prăk. Geh prăk, nô janh an 10 rkeh rwăt 2 mlâm ndrôk, nkre gay sŏk ăch, nkre mât deh kon. 40 rkeh hôm ƀa ƀă, nô ntuh kơl, nkra tay 2 ha cà phê. Nô an gĭt, gâp dŭt rhơn yor dơi uănh tât, kơl an:

Gâp lah nuĭh tih pháp luật, yơn hôm e dơi uănh tât n’hanh kơl gâp. Gâp mbra dŏng prăk aơ gay ƀư cà phê. Gâp mpŏng lap gay trok ơm ngăn an ngih dak.

Mô ru ih cà phê ta jâng gung, yuh Lê Thị Tuyết Nhung ta đội 2, thôn 3, xă Nam Yang, nkuăl Đăk Đoa an gĭt, 2 tấn cà phê aơ, yuh rwăt bah kônh wa tâm xă, knơm tơm prăk manh bah Ngân hàng chính sách. Tă aơ 2 khay, jêh rnuĭh mhal plơ̆ sĭt jay, yuh rvê mô gĭt ntơm tay, yor nău mĭn prêng rvê, nkre yor mô geh prăk ƀư sa, ri dơi n’gâng kan ƀon lan n’hanh rmôt công an kơl ƀư ăp sam ƀŭt, mbơh yuh manh rnoh prăk 100  rkeh prăch chính sách. Đah nău ngăch, yuh lĕ dŏng prăk aơ gay tăm n’hanh rwăt tăch cà phê tâm yan năm mhe. Yuh Nhung an gĭt:

Gâp mĭn dŏng prăk tăm cà phê, tal 2 lah an prăk rwăt tăch ăp nar. Gâp nsing nơm đah tơm prăk aơ, gâp mbra ƀư uĕh. N’hanh mpŏng tơm prăk aơ êp tât dơi ntop kơl an ăp nuĭh tâm ban kơt gâp gay geh prăk an ƀư”.

Thiếu tá Trần Thị Luận-Groi đội trưởng Đội Thi hành án hình sự n’hanh ntop kơl tư pháp, mât uănh pah kan plơ̆ tâm rnglăp tay nsum mpôl, công an nkuăl Đăk Đoa an gĭt: Jêh rnôk Nău ntrŭnh 22/2023/QĐ-TTg bah Thủ tướng Chính phủ dơi mbơh ta n’gor, bah khay 10 tât khay 12/2023, Công an nkuăl Đăk Đoa lĕ nsrôih tâm rgop đah Ngân hàng Chính sách kơp, năl gay ntop kơl an nuĭh jêh mhal mplơ̆ sĭt đah ƀon lan tâm 5 năm plơ̆ ma aơ.  Tă bah nĕ, lĕ geh 45 nuĭh dơi ntop kơl prăk tâm năm 2023, đah rnoh prăk rĭng bah 70 tât 100 rkeh prăk/du hê. Nchrăp tâm năm 2024, nău kan aơ mbra dơi ƀư tay, ƀư ntŭk nsing, kơl nuĭh lĕ tih nsing nơm tâm rnglăp nsum mpôl, n’hanh hao ƀư tơm tâm nău rêh:

Gâp uănh lah dŭt âk đah Ngân hàng chính sách ntop kơl, lơn lah ăp cán bộ an manh prăk dŭt n’hâm, ƀa ƀơ groi nđôi rmôt manh prăk, ntop kơl nkra jêh sam ƀŭt rhăch nău. Geh nuĭh jêh sam ƀŭt rhăch nău tâm 1, tât 2 nar, ăp cán bộ kơl nkra jêh an ngăch sŏk prăk an ăp nuĭh gay hun hao nkra njêng”.

Ăp khay dŭt năm 2023 mhe rlău, ta lam n’gor Gia Lai hôm geh âk nuĭh jêh mhal gŭ ndrung plơ̆ sĭt ƀon lan dơi ntop kơl prăk bah bôk nău kan. Wa Nguyễn Triều Quang-Groi Giám đốc Ngân hàng Chính sách Xã hội n’gor-an gĭt: ƀư tĭng di trong mô an geh nuĭh ntlơi bah kơi bâh bôk nău kan, bah n’gul khay 10/2023, ngân hàng ntơm mbơh ƀư an manh.

Tâm rlău 1 khay, lĕ an prăk rlău 4 rmen prăk, an bơi 100 nuĭh geh tŏng. N’hêl na nê̆ an saơ, tơm prăk aơ dơi dŏng gay ntuh kơl nkra njêng lŏ mir, tăch rgâl jêt n’hanh nti nău kan. Tâm năm tât, ndrel đah nău mbơh ƀư tay an manh, ngân hàng tâm rgop ndrel ban nău kan nsum mpôl, n’gâng kan ƀon lan uănh mĭn, ntrŭt nsôr, kơl gay nuĭh manh dŏng prăk săk rnglăy nta âk an khân pơng hao tâm nău rêh.

Năm bah năp, Ngân hàng Chính sách Xã hội lĕ tâm rgop rjăp đah ăp rmôt chính trị rêh jêng jao an n’hanh n’gâng kan ƀon lan, công an, gĭt nu nău, kơp uănh nău ŭch đah nuĭh jêh mhal gŭ ndrung. Năm tât, ngân hàng gĭt tay nu nău, ƀư trong nchrăp bah UBND n’gor gay ƀư tĭng bôk nău kan aơ uĕh ngăn.

Bôk nău kan an manh đah nuĭh jêh mhal gŭ ndrung tĭng nău ntrŭnh mrô 22/2023/QĐ-TTg lơ 17/8/2023 bah Thủ tướng Chính phủ bôk nău kan kơl nuĭh. Nău ơm mbơh ƀư n’hanh ƀư săk rnglăy ta n’gor Gia Lai lĕ rgop mât uĕh nuih n’hâm nĕ, kơl ăp nuĭh lĕ tih geh ntŭk nsing nâp đăp mpăn nău rêh n’hanh dơi hao./.