Đah trong rƀŏng sŏk nkual ƀon lan rnoi mpôl đê̆ lah rgum tơm bah ăp bôk nău kan n’hŭch ach o, năm 2023 mhe aơ, n’gor Gia Lai hŏ an manh tơm prăk dơh thuk lam rêh jêng kon nuĭh, ntop kơl bar pe jât rnăk  geh prăk ntuh kơl tuch tăm mât rong, nsan hao klaih rlău ach o.

          Lôch âk năm krit jêr đah ach o, rnăk yuh RơLan Siu H’Hằng, gŭ ta ƀon Tu 1, xã Ia Ga, nkuâl Chư Prông hŏ klaih rlău ach o ngăn. Yuh H’Hằng an gĭt, rnăk yuh geh 3ha bạch đàn, n’hanh yuh hŏ geh âk trong nchrăp n’hao tuch tăm. Yơn mô geh tơm prăk, jêng âk năm ân rvah rvăch, ŏ r’ah ma nău rêh mô dơi geh mbơm oi. Đah aƀaơ 3 năm, rnăk yuh dơi ntop kơl manh 50 rkeh prăk bah  tơm prăk manh kơl an rnăk ach o, yuh hŏ ƀư dơi ăp ntil nău he ŭch rŏng. Nơm hăr blău kơp nđăp, aƀaơ, yuh hŏ geh rnoh nsĭt geh bah 40 tât 50 rkeh prăk/ năm bah kơi ntop n’hao tay nău kan tuch tăm:

“Ntơm nơh rnăk mâp  dŭt âk jêr jŏt,  ŭch rvăt ndơ mât rong n’hanh ăp ntil tơm tăm ma mô geh tơm prăk. Lôch tât dơi đah tơm prăk manh bah ngân hàng chính sách, ri manh 50 rkeh prăk, rvăt 1 mblâm ndrôk, tăm tay cà phê, n’hanh mât chăm mir bạch đàn. Aƀaơ, nsĭt geh bah 40 – 50 rkeh prăk/năm”.

Tâm ban kơt nê đŏng, năm aơ rnăk nô Ksor Tứ ta buôn Choanh, xã Uar, nkuâl Krông Pa dŭt rhơn răm  yor hŏ geh jay mhe. Nô an gĭt, đah aƀaơ 3 năm, nơm geh nău ntop kơl manh 40 rkeh prăk bah tơm prăk manh, nô ntuh kơl tăm tao, rvăt tay  ndrôk, gay ntop  n’hao tay nău kan. Lôch 3 năm, nô trok  lĕ rnon, xây geh jay n’hanh 5 mblâm ndrôk. Nô rhơn nđơr nkoch:

“Ntơm nơh, hên rêh tâm jay nkưp nde, truh sat. Ngih dak ntop kơl prăk gay wăng sa, he ƀư dơi jay. Aƀaơ rnăk hên đăp mpăn hôm, he rgum pah kan jan sa  hun hao wăng sa.”

Aƀaơ, lĕ rngôch n’gluh geh an manh bah Ngân hàng Chính sách Xã hội gŭ kan ta Gia Lai ta nkuâl lah rlău 6.700 rmen prăk, đah 153.925 nuĭh manh. Êng năm 2023, Ngân hàng Chính sách Xã hội gŭ kan ta Gia Lai geh n’gluh an manh tât 1.700 rmen prăk, đah rlău 41.500 tơ̆ năch. Tâm nê, rnoh năch lah rnăk  ach o, rnăk ƀon lan rnoi mpôl đê̆ tât dơi đah ăp rnoh manh tĭng Nghị quyết 11/NQ-CP bah Chính phủ kơt an manh rvăt jay gŭ thuk prăk, manh hun hao wăng sa- rêh jêng kon nuĭh an  ƀon lan rnoi mpôl đê̆, lah rlău 13.000 rnăk. Wa Đinh Văn Nghĩa – Groi Giám đốc Ngân hàng Chính sách xã hội n’gor Gia Lai an gĭt:

“Ngân hàng Chính sách Xã hội n’gor way uănh khlay nău an ƀư  ăp bôk nău kan an manh dơh thuk kơl ƀon lan rnoi mpôl đê̆ ta ăp nkuâl. Mpôl hên hŏ kan nsum lhăt đah ăp gưl, ăp  n’gâng kan n’hanh ăp nkuâl gay joi gĭt nău ŭch geh manh n’hanh nău rêh bah ăp rnăk ach o,  rnăk dăch kêng ach o, rnăk ƀon lan rnoi mpôl đê̆ n’hanh rnăk dơi kơl êng ƀa ƀă, gay n’gluh ăp trong nchrăp, rnoh tât geh n’hanh rnoh di tâm pă tơm prăk manh an ăp nkuâl tĭng rnoh jêr jŏt n’hanh nău ŭch geh bah nuĭh ƀon lan tâm di n’hanh geh nău tam”.

       Tơm prăk manh bah Ngân hàng Chính sách Xã hội hŏ rgop ntop kơl ăp rnăk ach o, rnăk dăch kêng ach o n’hanh rnăk ƀon lan rnoi mpôl đê̆ ta Gia Lai nkra dơi ăp nău jêr jŏt tâm nău rêh, hun hao wăng sa, nsan hao klaih rlău ach o jŏ jong nâp dăng../.