Ăp nar dŭt năm 2022, yuh Kpă Xê Ra, deh năm 1993, thôn Ia Mua, xã Bầu Cạn, nkuăl Chư Prông hôm nha ndăn ƀư lôch ngih mhe vơt tết, Jay gâl 4, rnoh neh kanŭng 60 mét vuông, yơn yuh lĕ dŭt ŭch. Yor lah vơt năm mhe 2023, geh ngih jay mhe, lah rơh ma rnăk vâl yuh bah rnoh ach o. Khlăy lơn, nău rdâk njêng ngih jay hôm nha an saơ rnăk yuh geh gĭt dŏng prăk manh geh săk rnglăy. Yuh Xê Ra rhơn nkoch.

 “Năm aơ lah năm bôk năp rnăk vâl gâp geh bah ach o. Aơ lah nău geh pah kan bâh 2 hê ur sai, n’hanh nău kơl an bâh rnoh prăk kơl an rnoh manh prăk kon thuk. Gâp mô trok dâl, ma trok mbrơi mbrơi, jêng lah mbra dơi ntuh kơl mât chăm cà phê, n’hao nău pah kan jan sa, gâp dŭt rhơn ngăn”.

Gĭt nău dŏng prăk manh, nô Rơ Mah Bya, deh năm 1972, ta tổ 6 nkuăl têh Chư Prông, nkuăl Chư Prông lĕ dŭt rhơn yor bah ach o. Nô an gĭt, rơh bôk năp nô nănh manh prăk lah ta năm 2008, đah rnoh prăk tŏng rvăt 1 mblâm ndrôk. Saơ mât rong geh săk, rơh manh tay, Rơmah Byă manh 30 rkeh prăk, lôch nĕ 50 rkeh prăk gay ma ntuh kơl mat chăm cà phê, njêng mât bê. Aƀaơ, uănh tay rlău jây năm dŏng prăk manh, nô saơ nău nănh kan bâh nơm bâh âk năm lĕ nsĭt tay săk rnglăy ueh.

 “Gâp manh prăk chính sách âk năm aơ hôm. Bôk năp rĭ manh đê̆, lôch nĕ manh âk, yor gâp saơ rnoh prăk manh dŭt tâm di kơl an rnăk ach o kơt gâp. Ăp năm ba năp, bâh geh rnoh prăk manh, gâp lĕ geh ƀư ngih jay, rong ndrôk, bê n’hanh rvăt năp ndơ dŏng tâm ngih jay”.

Tĭng nău kơp bâh Ngân hàng chính sách xã hội n’gor Gia Lai, lôch rlău 20 năm pah kan, ngân hàng lĕ geh mbơh tơih âk trong kan ntŭk trok manh lam hvi tât rlău 220 xã, ta lĕ rngôch 17 nkuăl, nkuăl têh, nkuăl ƀon têh ta n’gor Gia Lai. Ndrel đah nĕ lah, rlău 3.300 rmôt mpêt nkrem n’hanh manh prăk. Đah nău mbơh tơih têh hvi tât ƀon lan, dăch bên, ăp nău kan ta rmôt mpêt nkrem lah nău kan ntoch jong kơl an rnoh manh prăk an lor bâh ngih dak tât ti nuĭh ach o. bâh 17 bôk nău kan an manh prăk têh, ntŭk kan lĕ mbơh tơih an rlău 225 rbăn rnăk ach o, dăch ach o geh manh rlău 16.800 rmen prăk. Giám đốc ntŭk kan NHCSXH n’gor Gia Lai lê Văn Chí an gĭt, aƀaơ, ngân hàng dôl nsrôih an lor ndơ̆ rnoh prăk tơm prăk ta ntŭk an Ngân hàng chính sách gay manh an rnăk ach o dŏng n’hanh ăp nuĭh dơi kơl.

 “Ngân hàng Chính sách Xã hội n’gor Gia Lai rgum lĕ ăp rnoh nuiđh kan gay ma pơk hvi an manh đah ăp rnăk ach o, ăp nuĭh dơi kơl êng ta ntŭk. Ntŭk kan mbra tâm rgop đah ăp n’gâng kan, ăp rmôt kan chính trị rêh jêng gay ma ndơ̆ rnoh manh tât di đah nuĭh dơn manh. Mât uănh rnoh prăk manh, ntĭm nti, rgŏ jă rnăk manh nănh manh prăk pah kan gay ma hun hao nău pah kan jan sa. Trong ntĭm manh prăk manh an di đah nkô̆ nău, geh săk rnglăy, ntop kơl an nuĭh ach o n’hanh ăp nuĭh dơi manh prăk êng hun hao pah kan jan sa, đăp mpăn nău rêh jêng n’hanh hun hao bah ach o nâp nâl”.

Mbra dơi lah, tâm ăp năm ba năp, rnoh prăk hun hao an manh lĕ n’hao nău geh săk rnglăy, njêng ăp nău rgâl mhe têh đah nău rêh wăng sa rêh jêng ta Gia Lai. Ngăn lah, tâm nkual rnoi đê̆. Tâm let năp tay, aơ hôm nha mbra lah ngoăy tâm âk jrŏng kơl gay ma an ta ntŭk hun hao mbơh tơih geh săk rnglăy ăp nău kơl n’huch ach o nâp nâl, rdâk njêng nkual ƀon lan mhe, nkre lah nuĭh băl hăn ndrel bâh nuĭh ach o, kơl an khân păng hun hao tâm nău rêh jêng, njêng nău rêh let năp tay ueh răm, đăp mpăn tay lơn.