Ngoai tâm ăp nau kan geh cử tri An Giang uănh kơl nê lah nau kan ntĭm nti. Âk cử tri ngăn ngên uănh kơl an nau kan ntĭm nti, ngăn lah đah nau rgâl mhe tâm rơh rlau aơ. Âk nau ân lah, rơh rlau aơ, nau ntrơn mhe ntĭm nti leo tât nau dơi bôk năp, nau dơi ntĭm nti phổ thông geh n’hao prêh, nâp, n’huch nau jâk.

Đah nau ntĭm nti phổ thông, âk cử tri ân lah: Nau rgâl mhe ntĭm nti  rnôk aơ hŏ ndrel dôl ntoh âk nau nkol, bôk nau kan ntĭm nti mhe tâm ăp ngih săm ƀŭt, ăp gưl mô jru ndrel mô tâm ban, ndrôm săm ƀŭt mô geh kơt ơm, mô knŭng ƀư nau jâk ân me mbŏ kon se, ma ƀư mpŭng đŏng. Êp nê, ăp kon se hôm mô tŏng ntŭk pâl...Rnoh kon se ăp jrâu hôm âk, tă bah nê mô geh ƀư jri nau kan đah nai ndrel kon se, ri ma nau ntĭm nti ê geh dơi kơt nau ŭch...Cử tri Nguyễn Văn Tùng, nkuăl têh Vĩnh Bình, nkuăl Châu Thành, ngơi:

‘Kon se nti rnôk aơ, geh 50% nau ntĭm nti mô blau. Gâp đă đah Quóc hội, ntŭk kan ntĭm nti ân geh nau kan, nau nchrăp ntop tay nau ntĭm nti lor, mbơh nau blau tâm nau rêh kon nŭih hăn lor, gay jêh aơ ăp kon se nkre geh nau blau nkre gĭt nau. Nau ntrơn rgâl săm ƀŭt nti, ăp nŭih mĭn njêng, bác học, tiến sĩ hŏ mĭn gay ma nchih njêng du ndrôm săm ƀŭt gay ma nkoch mbơh ăp nau ueh ân ăp rơh mom, yơn nti knŭng du năm lah nchlơi hôm, ndri lah mpŭng ngăn, roh hoach ân me mbŏ, u che. Ndri ma, gâp đă Quốc hội, Ntŭk kan ntĭm nti săch du ndrôm săm ƀŭt, yơn ndrôm săm ƀŭt nê ân geh dơi dŏng tât jŏ jong”.

Mpeh nau kan tuch tăm, cử tri ân lah, rnoh phân, ndơ dŏng tuch tăm hao khlay, tâm rnôk rnoh ba ndrel ăp ndơ tuch tăm mô hao. Cử tri An Giang đă, Chính phủ ân ơm geh nau nthoi, tăch ndơ kơl an ƀon lan gay ƀư dơi ndrŏng tă bah lŏ, mir nơm. Êp nê, nau hun hao tuch tăm ƀư nsum, ngăn lah ƀư nsum đah nŭih kan lŏ mir ndrel ntŭk kan tăch rgâl ê nâp, mô nkol, ri ma ê geh săk rnglay, nŭih ƀon lan ê geh dơi âk tă bah nau ƀư kan nsum aơ. Cử tri Trần Văn Đức, xã Vĩnh Chánh, nkuăl Thoại Sơn, n’gor An Giang, ngơi:

 ‘Ăp nŭih kŏ gĭt Đồng bằng sông cử Long lah ntŭk tăm âk ba bah lam dak, ma An Giang lah tơm bah nkuăl Đồng bằng sông Cử Long, yơn rnôk aơ lah geh âk ba ri rnoh thuk mro. Tâm xã kŏ bonh đă ƀon lan ntrơn rgâl tơm tăm, mpa rong, yơn ngăn lah tăm byăp mô âk yơn mô gĭt ntŭk ma tăch. Ba ri mô khlay, ndơ tăm ri tăch mô lĕ ma phân ri khlay ngăn. Đă Chính phủ ndrel ăp ntŭk kan, n’gâng kan geh nau kơl an ƀon lan ƀư nau kan tuch tăm bah nkuăl Đồng bằng sông Cử Long, ma ngăn n’gor An Giang geh nau kơl an”.

Mpeh nau kan aơ, Groi Kruanh dak Võ Thị Ánh Xuân đă, An Giang đah nau dơi lah du n’ghor geh nau dăng tâm nau kan tuch tăm, rđau kan n’gor An Giang, nkuăl Châu Thành ân lŏ mĭn, gĭt nau tât, ndăn nau dơi gay hun hao tuch tăm ngăch, tam ndrel nâp, njêng ăp nau geh âk lơn, gay ƀon lan dơi geh ndrŏng tă bah grăp ba nơm tăm:

 ‘Geh tât nau kan tuch tăm. Gâp saơ lah tât rnôk aơ, ăp nau ntrŭnh, ntrong kan bah Đảng, Ngih dak, kơp n’ăp ma  tu tơm ƀư nau kan...kơt lah hŏ geh, rnôk aơ knŭng hôm nơm ntrŭnh ƀư mhâm geh, nơm mhâm geh nau blau bah bôk nau kan aơ leo tâm ƀon lan mhâm nau ƀư gay ƀon lan hao ƀư nau kan văng sa tuch tăm, geh nau dơi ƀư tơm bah grăp phe nơm, ŭch ƀư tơm ri ân geh nau blau. Ŭch kônh wa nơm ndrel n’gâng kan ndrel mĭn gay n’hao nau dơi bah nŭih tuch tăm. Mpeh nau kan ntĭm ntui, bah nau rgâl mhe aơ ân geh du nau ntrơn rgâl, ri ngăn lah nơm ân geh dơi du rnôk rgâl mhe, lôch nau nê ri mra geh đăp mpăn đŏng”.

Tĭng Groi kruanh dak Võ Thị Ánh Xuân, ăp cử tri mbơh ăp nau kan nê lah ăp nau mĭn rvê bah rđau kan Đảng, Chính phủ, Quốc hội ndrel n’gor. Rmôt kan ntoh măt bah Quốc hội n’gor An Giang kơp dơn ăp nau đă bah cử tri ndrel tâm ăp nau kan mra lŏ geh ăp nau đă tâm ăp rnôk tâm nchră ân tâm di./.