Rơh rƀŭn nchră djăt ndơn kan 12 n’gor, nkuăl ƀon têh mbơh tơih mpeh nău geh sŏk nău tâm rgop nău nchrăp Luật neh ntu rgâl mhe bâh ăp nuĭh ƀon lan, ăp nău kŏ văk tâm trong pah kan.

Ăp ntŭk tâm rgop na nê̆ ta ăp bôk nău kan, nkô̆ nău kan, rnoh kan bâh nău nchrăp luật, ăp nău dăn đă rgâl mhe ăp nkô̆ luật, ăp nău jêr jŏt kŏ văk bâh nău ngăn tâm nău rêh. Ăp ntŭk an lah tâm nar tâm nchră, sŏk nău tâm rgop bâh nuĭh ƀon lan gleh, jêr dơi geh joi gĭt vât na nê̆, dơn ngoăy tâm ƀon lan. Ăp đại biểu rgum ƀư kloh 4 nău têh. Ngoăy lah an geh ƀư kloh nău mĭn kan, an geh uănh năl na nê̆ nău dơi, dơn kan, nău leo kan. Nău khlăy tal 2 lah nău nchrăp kan, năy tal 3 lah rnoh khlăy neh, trong kan uănh năl neh ntu n’hanh nău tal poăn lah mplơ̆ sŏk neh, ntrơn ntŭk gŭ, ntŭk gŭ mhe. Lĕ rngôch ăp đại biểu dăn đă an geh uănh năl rnoh khlăy neh, mbơh rnoh khlăy na nê̆.