Ntoh nau tâm nar rƀŭn lôch, Kruanh Quốc hội Vương Đình Huệ mbơh, jêh du nar pah kan rjăp, ndal, hŏ ƀư jêh ăp nkô̆ nau bah bôk nau nchrăp luh đah 18 nau rgop râng nchră.

 Kruanh Quốc hội rnê prêh, HĐND ăp nkuăl hŏ geh âk nau rgop tâm nau geh dơi nsum bah neh dak, tâm nau hun hao văng sa, rêh jêng bah nkual, lah rjăp, lah kơt năm 2022 hŏ geh nau mhe tâm nau kan bah HĐND ăp gưl ri tât năm aơ lah ma lah rjăp, nau mhe geh nau kan hvi lơn, rêng hvi lơn, nau geh dơi lơn ndrel tâm ban lơn.

Nau kan bah HĐND nar lơn ma săk tam, tâm dăch, rgop nau khlay tâm nau ƀư nau kan hun hao văng sa, rêh jêng. Ăp nkuăl geh nau kan HĐND ueh ri tơm prăk âk ndrel hun hao âk. HĐND ăp nkuăl hŏ mât tâm dăch ma pháp luật, ntrŭnh nau kan ndâk pháp luật, ndâk nau ntrŭnh, mêt uănh ndrel ntrŭnh ƀư ăp nau kan khlay, sŏk phiếu rnơm, ƀư ueh nau kan ntrơn rgâl mrô, tâm nchră ma ba dih; geh âk nau rgâl mhe, nau ntơr ueh tâm nau kan, ngăn lah rơh rƀŭn bah HĐND, nau kan bah ăp ban, rmôt kan bah HĐND nar lơn geh uănh khlay, nau vơt ƀon lan, cử tri ueh lơn nkô̆ nau dơi, ndâk gay ma hun hao yor nau geh hun hao bah nkuăl, nau kan mbơh nau geh uănh khlay.

 Gay dơi geh nau aơ, tĭng Kruanh Quốc hội Vương Đình Huệ, HĐND ăp gưl hŏ mât tâm dăch ma nau rđau bah gưl uỷ, nau ntrŭnh bah Trung ương, Quốc hội, Chính phủ, nau kơl rđau kan bah Trung ương, Chính phủ. Ngăn lah, Quốc hội hŏ ntrŭnh ăp nau ntrŭnh, njêng trong kan, nau dơi gay rgâl mhe nau kan mêt uănh bah HĐND, ăp nau hôm kol bah HĐND ăp n’gor hŏ geh Rnâng kan Quốc hội ơh đah săm ƀŭt tŏng ăp. Êp nê nau joi, rgâl mhe bah ăp nŭih kan nsum, ban bah HĐND, nau kan tâm rgop rjăp đah n’gâng kan ndrel HĐND, tâm rgop đah ăp ntŭk kan n’gâng kan ndrel HĐND, tâm rgop đah ăp ntŭk kan bah nkual, ăp ntŭk kan bah Quốc hội...

Tâm rơh tât, Kruanh Quốc hội Vương Đình Huệ đă, HĐND mât tâm dăch đah nau rđau kan bah gưl uỷ, rnâng kan gưl uỷ đah nau ƀư nau kan bah HĐND, aơ lah nau dơi geh tât nau ƀư nau kan, nau dơi geh jao:

‘Phung hên đă lŏ n’hao lơn tay nau ƀư nau kan bah ntŭk kan ƀon lan săch đă bah n’gor tĭng nau ntrŭnh bah pháp luật gay ƀư ueh lơn ăp nau kan bah năm 2024. Tâm nê, lŏ kơp, ƀư jêh ăp nau ntrŭnh bah pháp luật bah n’gor. Bah nau kan ngăn bah nơm, HĐND lŏ rgop âk lơn, tâm dăch lơn ndrel ƀư nau kan rjăp lơn ân nau ndâk luật ndrel ăp nau ntrŭnh, ngăn lah ăp luật geh tât nau rêh văng sa, rêh jêng bah nkuăl. Tâm năm aơ hŏ geh âk nau ntrŭnh geh nau dơi mra geh uănh ndrel ntrŭnh. Phung hên đă HĐND ăp nkuăl, nsing tâm ăp luật, nau ntrŭnh hŏ geh ntrŭnh gay geh nau nchrăp ntrŭnh du trong tâm dăch ngăn đah ăp nau nchrăp Luật, ngăn lah nau nchrăp Luật neh ntu năm 2024, Luật ƀư nau kan tăch rgâl neh, Luật ngih gŭ, Luật Tài nguyên dak, Luật Căn cước, Luật rmôt kơl râng mât rnă njrăng, đăp mpăn tâm dâng...Tâm ăp luật aơ geh âk nkô̆ nau ngăn jao ân nkuăl”.

 Lah rjăp ân geh ƀư ngăn mơ dơi ƀư ăp luật, nau ntrŭnh bah Quốc hội, Kruanh Quốc hội đă HĐND ăp nkuăl ân geh ƀư nau kan nkra tă bah rnôk aơ, tâm nê geh nau ntrŭnh mpeh 3 bôk nau kan nkô̆ nau kan bah neh dak. Dăch tât, Quốc hội mra ƀư nau kơp uănh ăp nau kan hành chính, ndri ma, HĐND ăp nkuăl ân geh kơp ƀư ăp nau kan hành chính yor n’gor ntrŭnh, jăng lơi ăp nau kan mô kâp geh, nkre kơp uănh tay nau ntuh kơl nsum.

 Kruanh Quốc hội kŏ nkah, HĐND lŏ rgâl mhe ăp ntil nau kan, geh nau rgâl mhe bah rơh rƀŭn bah HĐND lah nau tơm, kơl an HĐND gưl nkual, uănh khlay tât HĐND gưl xã, ntrŭt dăng nau kan tâm rlong, n’hao nau nâp bah ntoh măt HĐND, uănh khlay nau kan ntĭm nti, n’hao nau kan ƀon lan ŭch kơl an tâm nkual, ngăn lah ăp nau kan hôm ntoh luh, ƀư phong lah âk nŭih, jêr, nkre n’hao nau kan rgâl mhe nau tâm mâp ma cử tri./.