Luật neh ntu năm 2013 hŏ geh âk nau rgâl gay pơk trong ntrŭt dăng ndrel kơl an ntŭk tăch neh ntu hun hao kơt: Hŏ ƀư jêh nau kan bah ntŭk  kan đah Ngih dak ndrel ăp ding bah nau ntrŭnh, nau nchrăp, nau dŏng neh, nau ntrŭnh mpeh jao neh, ân manh neh gay ma săch nŭih ntuh kơl, nau kan jao neh njêng nau rlong rvăt, ntrŭnh rnoh neh n’hêl rnôk Ngih dak jao neh geh sŏk prăk dŏng neh, ân manh neh, ân ntrơn nau dơi dŏng neh. Nau pă săm ƀŭt kơp dơn nau dơi dŏng neh geh ƀư rjăp, pơk trong ân neh ntu geh leo tăch.

Yơn lah, ngoai tâm ăp nkô̆ nau ƀư tât nau lư, neh hao khlay bah nau mbơh bah ăp nau kan, nau ƀư hun hao nkuăl lah êng ndrel ntŭk ƀư tăch neh ntu lah nsum mô tŏng nau mbơh kloh. Mpeh nau aơ, nŭih ƀư nau kan văng sa, Tiến sĩ Nguyễn Trí Hiếu, ân lah:

 ‘Gay ma hun hao tâm di ntŭk ƀư nau kan ri nau geh tât neh ntu, rnoh tăch ân geh tĭng nau tăch rvăt. Ân geh nchră tât rnoh tăch ân sŏng, kloh. Aơ lah du nau kan khlay yor rơh rlau aơ, nau tăch neh geh âk nau ƀư mô tâm di bah ntŭk tăch rgâl. Ngăn lah geh nau lăp kan bah n’gâng kan tâm nkuăl ndrel tal bar đŏng lah nau geh dơi nsum tâm nê đŏng”.

Tâm nau ngăn, neh tuch tăm dak nơm hôm tĭng nau kan văng sa jê̆, mô nâp, tâm nkah, tâm rgop ƀư nau kan tuch tăm, ê nkra, tăch rgâl hômâk nau nkol, nau râng ndrel ntuh kơl bah ntŭk kan ân tuch tăm, ƀon lan mô âk. Nau đă rnôk aơ đah nau ntrơn rgâl Luật neh ntu lah ntrŭnh nau đă ndrel pơk trong rgum neh ân geh ƀư kloh gưl kan, nau dơi, nau kan bah ntŭk ƀư nau mât Ngih dak tă bah Trung ương tât nkuăl tâm nau rgum, ân nau ntrơn dŏng neh, sŏk lơi neh, jao neh, an manh neh, pă săm ƀŭt kơp dơn nau dơi dŏng neh, ntrŭnh bư rnoh ân tâm di. Groi Giáo sư, Tiến sỹ Đinh Trọng Thịnh, Giảng viên Học viện tài chính mbơh nau:

"Bonh đă nau nchrăp rnoh tĭng nau tăch ân tât du nkô̆ nau lah ân đăp mpăn nau dơi ân dŏng neh ntu tâm di ma ntŭk leo tăch rvăt. Gay đăp mpăn rgum nau dơi dŏng neh gay ma ntuh kơl hun hao, tŏng dơi nau ŭch hun hao văng sa tâm ăp rơh. Mpeh nau jŏ jong, ân geh bonh đă nau ntrơn nau dŏng neh gay ma njêng neh ntu rgum gay ƀư nau kan rgâl mhe kŏ kơt lah tâm nau hun hao tuch tăm”.

Tĭng nau đă bah ăp nŭih nchră kan, Luật neh ntu (rgâl nkra) rnôk aơ ân geh rklaih ăp nau nkol, nau mô nâp bah hun hao ntŭk jao nau dơi dŏng neh kơt: Hôm âk nau tăch rgâl ê geh đăng kí, rnoh nau ƀư nau kan ê geh nkoch mbơh kloh rnoh ntrơn tăch ngăn, hôm nau têm neh, in lơi neh mbrơi nau leo dŏng. Du nau kan khlay geh ndŏ luh ân geh nau ntrŭnh tât nau kan bah ntŭk kan mbơh nau tât nau rgum, nau ngăch ƀư ăp nau kan hun hao ntŭk ntu, ăp nau kan tăch neh ntu, ngăn lah ăp nau kan têh, nau tơm khlay bah nkual gay mbơh kloh nau, rdâng nau mbơh tih nau, têm neh gay ma tăch khlay. Wa Trần Văn Lê, Giám đốc Công ty TNHH tuch tăm ndrel tăch rgâl Phương Linh, mbơh:

"Nau kan rnôk aơ geh tât neh gŭ. Neh gŭ geh dơi leo nsĭt nau geh prăk ân Ngih dak ngăn, yơn gay ma n’hao rnoh neh gŭ nê lah nau jêr. Lah Ngih dak uănh nê lah nau geh sŏk soay ri nê lah nau ueh, uănh aơ lah ndơ nơm geh têm. Đah nau mĭn lah du ntŭk ƀư nau kan tăch rgâl, râng nau tâm tăch nth ntu tâm âk ntŭk, gâp mĭn lah nơm ân uănh tâm âk ntrong, yơn nkô̆ nau rƀŏng tât lah neh nê geh leo nsĭt rnoh soay ndrel leo nsĭt nau ueh jêng ân mpeh 3 ding đŏng lah nŭih neh neh, nŭih dŏng neh ndrel nau geh ân Ngih dak, ân geh tâm ban nau dơi tă bah ăp nŭih aơ”.

Du nau kan êng đŏng lah ân geh rgâl mhe ntrong kan pă gay ma ntrơn rgâl neh, ntŭk tăm tơm jŏ năm, blau neh ân tâm nkuăl têh gay n’hao nau geh prăk soay ân ngih dak, nkre lah kơl an ân nŭih geh bu sŏk lơi neh geh jao neh mô lah rvăt ngih tâm blah neh hŏ geh nbu sŏk nsĭt. Ƀư jêh nau kan mât têm neh, bah ăp nau kan geh ntŭk têm nkremlơi neh ntu, rgum ăp tơm ndâk nkra ƀư ăp nkuăl gŭ gay ma pă ntŭk gŭ mhe ân ƀon lan geh neh bu sŏk lơi lor ma trok tâm ân geh đăp mpăn nau rêh ân ƀon lan./.