Tâm trôm jay “Jay răm Công đoàn” mhe dơi jêh, nô Trần Đình Thu, khối 1, Phường Khánh Xuân, nkual ƀon têh Buôn Ma Thuột (Dak Lak) mô mpôn nău răm, nău rngot. Nău rêh rnăk wâl nô Thu dŭt jêr jŏt, săk nô ƀư mât uănh ta ngih sam ƀŭt THCS Trần Hưng Đạo, nkual ƀon têh Buôn Ma Thuột, prăk khay geh đêt, ur lŏ mô geh nău kan, 2 hê kon jêt dôl năm nti. 16 năm bah năp, rnăk wâl nô gŭ manh jay nsum bah ngih sam ƀŭt. Jêh rnôk ntêm nkrem, manh prăk rwăt neh, nô lĕ dơi Liên đoàn Lao động nkual ƀon têh Buôn Ma Thuột ntop kơl 50 rkeh prăk bah prăk nkrem “Jay răm Công đoàn”. Ban Giám hiệu n’hanh ăp nai tâm ngih sam ƀŭt rgop an manh mô sŏk prăk kon gay nô geh tay prăk ƀư du mlâm jay kloh uĕh, nâp nâl. Nô Trần Đình Thu lah:

Gâp ndơn măt rnăk wâl lah uĕh nău uănh tât bah Liên đoàn Lao động, nsum mpôl nai tâm ngih sam ƀŭt lĕ kơl, an gâp manh prăk n’hanh ntop kơl an gâp dơi ƀư jay aơ, rnăk wâl mô hôm geh dơi nău răm. Tă bah aơ gâp ŭch Liên đoàn uănh mĭn lơn tay ăp nău rêh jêr jŏt kơt gâp.

Năm Giáp Thìn 2024 lah năm bôk năp mê̆ kon yuh Trần Mai Hương Giang, phường Ea Tam, nkual ƀon têh Buôn Ma Thuột dơi wơt tết tâm jay mhe tâm kơl. Yuh Giang nkoch, đah prăk khay bah nai tiểu học, knŭng tŏng ngêt sa nău rêh n’hanh mât 2 hê kon hăn nti. Âk năm bah năp, 3 mê̆ kon rêh knơm tâm jay cấp 4 bah me bơ̆ yuh. Bôk năm 2023, yuh dơi mê̆ bơ̆ an neh n’hanh Liên đoàn Lao động nkual ƀon têh Buôn Ma Thuột ntop kơl du gâl prăk gay ƀư jay. Knơm nĕ, mê̆ kon yuh Giang lĕ geh jay kloh uĕh gay gŭ n’hanh đăp mpăn pah kan:

Oh njuăl lah uĕh tât lĕ rngôch ăp công đoàn viên rgop soan bah nơm kơl an mê̆ kon oh geh jay răm gay gŭ an đăp mpăn.

Mhe dơn 50 rkeh prăk ntop kơl ƀư jay “Jay răm Công đoàn” yor Liên đoàn Lao động n’gor Dak Lak jao an, yuh H’Ngăm Niê, nai ngih sam ƀŭt mẫu giáo Hoa Thủy Tiên, xă Dliê Ya, nkuăl Krông Năng mô dơi mpôn nău răm. Yuh H’Ngăm an gĭt, âk năm bah năp, rnăk wâl yuh rêh tâm jay sat hăt, lĕ djơh, mô đăp mpăn an nău gŭ âm. “Jay răm Công đoàn” tât đah rnăk wâl yuh lah ndơ an dŭt geh nkô̆ khlay, kơl rnăk wâl yuh geh tay n’hâm soan rgâl nău rêh.

Lah uĕh gưl bah lơ lĕ nta an oh sŏk prăk nar aơ. Oh dŭt rhơn, ngăn lah bah sa ơm tât aƀaơ mô geh prăk têh kơt aơ gay ntop kơl ƀư jay. Oh nchrăp ƀư jay nklăp 90 rkeh prăk dơm. Rlău ma prăk ntop kơl, tâm jay nklăp 15 rkeh đah manh tay oh yuh nklăp 20 rkeh.

Bôk nău kan “Jay răm Công đoàn” lah nău ƀư geh nkô̆ ngăn ngên đah nău rêh bah nuĭh pah kan, âk năm bah năp, Liên đoàn Lao động n’gor lĕ nsrôih ntĭm rđău n’hanh ntĭm ăp gưl Công đoàn ƀư nkoch trêng, rgŏ jă ndâk njêng prăk nkrem “Jay răm Công đoàn”. Knŭng kơp êng bah năm 2023 tât aƀaơ, Liên đoàn Lao động n’gor lĕ ntop kơl ƀư mhe n’hanh nkra 129 mlâm jay “Jay răm Công đoàn” đah prăk rlău 5 rmen prăk. Wa Nguyễn Thị Lý, Groi Kruanh Liên đoàn Lao động n’gor Dak Lak an gĭt bah bôk năm tât aƀaơ, lam n’gor lĕ ƀư mhe geh 27 mlâm jay. Ăp khay hôm bah năm, ăp gưl Công đoàn n’gor Dak Lak kuăl jă, ntop kơl tay 73 mlâm jay “Jay răm công đoàn” gay an công đoàn viên, nuĭh pah kan jêr jŏt đah jay gŭ.

Tâm năm tât, Liên đoàn Lao động n’gor mbra ntĭm rđău tay gay mbơh ƀư na nê̆ ăp nkô̆ nău khlay ƀư tĭng trong kan mĭn uănh mât njrăng nău dơi, nău geh tâm di an nuĭh pah kan n’hanh n’hao ăp tơm prăk ƀư tĭng trong kan mĭn uănh uĕh lơn an nuĭh pah kan. Tal 2 lah rgâl mhe tay ăp trong mĭn uănh an tâm di đah nău ŭch, nău đă bah đoàn viên bah dâng, tâm nĕ mbơh ƀư tay ndâk njêng prăk nkrem ntop kơl đoan viên phung pah kan viên chức pah kan ta Dak Lak gay ƀư uĕh bôk nău kan ndâk ƀư jay gŭ chor jay răm công đoàn.

Ăp jay dơi ndâk ƀư đah tơm prăk ntop kơl “Jay răm Công đoàn” ta Dak Lak lĕ kơl âk đoàn viên, nuĭh pah kan geh nău rêh dŭt jêr jŏt dơi đăp mpăn, ntop tay n’hâm soan hao tâm nău rêh./.