N’gul khay 7, Quảng Trị duh kơt ŭnh. Mpôl tahen ơm Trung đoàn Pháo cao xạ 241 geh 160 nuĭh plơ̆ tay ntŭk tâm lơh kăl e mpoh nhang nkah gĭt nuĭh tâm rmôt. Ta Rup ndah nkah gĭt bah Trung đoàn ntăm ta nghĩa trang liệt sĩ nkuăl Hướng Hóa, ăp nuĭh tahen kăl e nkah gĭt kuh mbah, nkah gĭt ăp đồng chí, rmôt nuĭh lĕ khĭt tâm nău kan mât njrăng, kơp dơn neh dak. Tâm rnoh 400 cán bộ, tahen tâm Trung đoàn Pháo cao xạ 241 khĭt ta ntŭk tâm lơh Quảng Trị, tât aƀaơ âk nting hôm e gŭ tâm dak diăng, dak sor, tâm bri krŏng. Wa Nguyễn Hùng Tiến, tahen ơm Trung đoàn 241 an gĭt: Bah năm 2013, ăp tahen ơm Trung đoàn 241 lĕ rgop soan ndâk ntăm ruh ndah ta Nghĩa trang liệt sĩ nkuăl Hướng Hóa n’hanh ăp năm ăp tahen ơm bah ntŭk kan lŏ hăn sĭt nkual neh tam aơ mpoh nhang nkah gĭt oh nô:

“Mpôl hên saơ geh nău kan bah ăp nuĭh hôm e rêh yor oh nô mpôl hên khĭt ri mpôl hên joi đah ăp trong gay dơi rsơl plơng. Tâm rnoh oh nô đồng chí bah mpôl hên dŭt âk nuĭh mô dơi sĭt nĕ lah nău rngot. Yor nê, N’gâng ntăm aơ dơi ƀư jêng yor n’hâm soan dak rhak, prăk n’hanh lơn lah nuih n’hâm bah ăp nuĭh hôm e rêh”.

Ăp năm kơt nĕ, di tâm 27/7, rnăk wâl nô Phạm Việt Phong lŏ rtŭt kho ao bah nkual ƀon têh Ninh Bình lăp Nghĩa trang Quốc gia Trường Sơn mpoh nhang nkah gĭt wa bah nơm lah tahen khĭt Phạm Văn Trọng. Tahen khĭt Phạm Văn Trọng lah tahen bah Binh đoàn 559, khĭt ta neh Quảng Trị năm 1972, rnôk tŏng 22 năm deh. Ăp năm, nô Phong n’hanh rnăk wâl lăp Quảng Trị chop khâl, mpoh nhang ăp tahen khĭt, mpơl nuih n’hâm nkah gĭt đah ăp tahen janh dăng khĭt:

“Nuĭh bên bah oh hôm e gŭ ta neh Quảng Trị, oh lah nuĭh bên dơm mât uănh môch bah wa. Gâp geh nău rêh nar aơ geh âk nuĭh lĕ hŭk nting mham gŭ ta neh Quảng Trị kơt nĕ. Oh hăn ta aơ uănh saơ nghĩa trang aơ lah dŭt uĕh hôm. An wa bĭch ta aơ oh chop mât ƀư brah huêng phan ndrel Neh dak”.

Ăp nar aơ, ta nghĩa trang liệt sĩ ta n’gor Quảng Trị, âk Mpôl đại biểu kruanh Đảng n’hanh Ngih dak n’hanh nuĭh bên ăp rnăk wât tahen lĕ khĭt tât mpoh nhang, nkoch nău nkah gĭt hô ăp tahen janh dăng lĕ khĭt yor nău kan rklaih đăp mpăn rnoi nuĭh, kơp dơn neh dak. Ăp rwang nkao rih n’hanh nhang mpơl nuih n’hâm nkah gĭt dŭt têh bah năp huêng phan ăp nuĭh kon ntoh lư bah neh dak. Wa Nguyễn Duy Tiến, 83 năm deh, tahen ơm bah Binh đoàn 559 plơ̆ sĭt ntŭk tâm lơh kăl e Quảng Trị ŭch mâp tay oh nô tâm rmôt:

“Ăp rơh plơ̆ tay ntŭk tâm lơh kăl e kơt aơ tâm nuih n’hâm bah mpôl hên dơi nkah gĭt tay lĕ rngôch. Lor lah mâp oh nô đồng chí, rmôt bah nơm tât mông aơ. Đah ăp oh nô lĕ khĭt, mpôl hên tât nkah gĭt an oh nô. Năm aơ, mpôl hên ƀư nkah gĭt. Djiăt du tơ̆ dơi hăn ntŭk tâm lơh kăl e lah tâm nuih n’hâm mpôl hên ŭch mâp tay oh nô”.

Lôch tâm lơh tâm su, rlău 53.000 tahen khĭt lĕ gŭ ta 72 nghĩa trang têh jêt ta play neh Quảng Trị tam. Nkah gĭt n’hâm soan bah ăp tahen lĕ khĭt, Đảng n’hanh Ngih dak uănh khlay mro trong kan ntuh kơl dăp rgum, nkra ăp nghĩa trang liệt sĩ. Aƀaơ hin, ăp nghĩa trang jêng ndơ ƀư văn hóa brah phan, nkah gĭt ăp tahen janh dăng lĕ khĭt, nkre ntĭm nti an rơh druh ndăm. Wa Lê Nguyên Hồng, Giám đốc N’gâng kan Lao động-Thương binh n’hanh Xã hội n’gor Quảng Trị an gĭt: Di 27/7 năm aơ, n’gor Quảng Trị wơt bơi 15.000 nuĭh bên, năch pâl nđaih, ăp mpôl tahen ơm hăn mpoh nhang. Lơn lah, bah khay 7 năm 2022 tât aƀaơ, UBND n’gor Quảng ƀư wơt ăp mpôl tât chop Nghĩa trang liệt sĩ ngih dak Đường 9 n’hanh Nghĩa trang liệt si ngih dak Trường Sơn tâm măng.

“Mpôl hên rhŏ ăp mpôl tât chop n’hanh măng ri mpôl hên saơ nău bôk năp Quảng Trị dŭt duh, hăn tâm măt nđik lơn. Tal 2, măng ri mbra geh nuih n’hâm lơn, hăn tâm nghĩa trang uĕh tam lơn n’hanh măt uănh saơ uĕh lơn. Ƀon lan tahen lam dak tât chop ăp nghĩa trang tahen Trường Sơn n’hanh Đường 9 n’hanh mpôl hên geh nuĭh kâp mro an rhŏ nău chop khâl bah ăp rmôt ăp nuĭh bên tahen khĭt”.

Khay 7, tĭng rmôt nuĭh joi tât ăp Nghĩa trang Trường Sơn, Nghĩa Trang Đường 9, Thành cổ Quảng Trị... mpoh nhang, n’ông nkao ta dak me Thạch Hãn mpơl nuih n’hâm ryơk nkah gĭt ăp tahen janh dăng lĕ khĭt kăl e.