Xã Ea Tiêu, nkuăl Cư Kuin, n’gor Dak Lak rnôk aơ geh bơi tât 5.400 rnăk tâm 18 rnoi, rêh tâm 21 thôn, ƀon. Tâm nê, rnoi mpôl đê̆ geh bơi tât 40%. Tâm ăp năm rlau aơ, nŭih ach o bah xã geh kơl an 175 ngih tĭng nau ntrŭnh 167 bah Chính phủ, đah rnoh 6,9 rmen; 72 mlâm ndrôk ntil, nkra 4 ngih mhe.

Ntoh nuih n’hâm tâm rnglăp, nŭih ƀon lan tâm xã pah kan, hun hao tuch tăm, nsum n’hâm ndâk ƀon lan mhe. Rnơm nê, tât rnôk aơ ƀon lan geh nau rgâl, rlau 98,6% rnoh rnăk tâm xã geh ngih nâp, 98% rnoh rnăk geh ndeh hon-đa, rlau 90% rnoh rnăk geh dŏng dak kloh, 100% rnăk geh dŏng điện ƀa ƀơ. Xã geh rlau 4000 rnăk geh kơp dơn tŏng rnăk vâl văn hoá, 18 thôn, ƀon geh kơp dơn văn hoá. Ăp nau vay ơm tâm ƀon lan geh mât kơt: Nau vay tur chĭng, tanh njuh.

Tâm nar rgum, tâm nau khuh n’gôr ndrel nau njroh mprơ ăp rnoi, ăp ntoh măt ndrel nkah ăp nau vay bah mặt trận Tổ quốc Việt Nam, ngêt ndrănh yăng ndrel ƀư nau tâm rlong: peh ba, put măt tur chĭng, ndăt ƀao bố ndrel tâm têk rse. Geh tât tă bah ơm tâm nkuăl bu rgum râng pâl, wa H’Bel Knul, tâm ƀon Kram, xã Ea Tiêu nkoch: Nar rgum lah rnôk ma ƀon lan tâm ăp ƀon bah xã tâm mâp, tâm n’ur ndrel tâm rlong nau ueh ơm, njêng nau ueh, nau rhơn:

            ‘Nau khuh n’gor bah nar rgum geh kônh wa rgop râng, âk nau rhơn. Ăp nau kan geh ƀư nau vay ơm bah rnoi nơm kơt lah njroh mprơ, tur chĭng, tâm têk rse, kdăt bao bố, peh ba ri nơm kŏ râng lĕ ro”.

Tĭng wa Chu Thanh Tấn, Kruanh Uỷ ban MTTQ Việt Nam nkuăl Cư Kuin, nar rgum tâm rnglăp ăp rnoi jêng nau vay geh ƀư ƀa ƀơ ăp năm tâm khay 11 bah nkuăl. Bah nê ăp thôn ƀư nau kan nsum ndrel rgum nau kơl an tâm nau rêh kơl nŭih mâp nau jêr, mô dăng:

‘Rđil đah ăp năm ri nau khuh n’gôr bah nar rgum aơ ueh lơn, âk thôn ƀư lơn, nau ƀư ueh lơn. Kônh wa râng âk, geh nau râng nthoi rnôk ăp rnoi rêh ndrel pah kan tâm nkuăl geh nau râng tŏng, rnoh tâm ban ndrel ăp nau kan kơl an kŏ geh ăp gưl kan kơl an âk lơn”.

 Râng nar rgum, wa Bùi Văn Cường, Tổng thư kí, Kruanh Jrâu kan Quốc hội rnê prêh ngăn nau tă geh ma n’gâng kan ndrel ƀon lan xã Ea Tiêu geh dơi tâm rơh rlau aơ. Ntoh nau rnơm ndrel ŭch ƀon lan lŏ tâm rnglăp, rnơm tâm nau rđau kan bah Đảng ndrel Ngih dak, ntoh nau nau nkah njrăng, lơh rai nau mhik bah phung rlăng ăp rnoi. Aơ lah nau lah rjăp ndrel nau rêng nuih n’hâm bah nar tâm rnglăp ăp rnoi tâm ƀon lan:

 “Đah du nau khuh ueh bah âk mpưm kônh wa ăp rnoi mpôl đê̆ bah Việt Nam nơm, đah du nuih n’hâm tâm rnglăp, ngăn lah tâm rnôk nkuăl Cư Kuin lah du nkuăl geh nau tât tâm lơ 11/6. Ndri ma nau kan, nau ƀư ndrel nau rhơn răm bah kônh wa lơn lah du nau kan ueh, bah nê ƀư rjăp tay nau tâm rnglăp ăp rnoi”.

 Rơh aơ, wa Bùi Văn Cường ndrel Y Thanh Hà Niê Kđăm pă prăk ndâk ngih rƀŭn thôn 10 xã Ea Tiêu ndrel 2 xã Cư Êwi, du ngih rnoh 300 rkeh, pă ndơ ân thôn, ƀon, rnăk geh dơi kơl, nŭih bu rnơm tâm nkuăl Cư Kuin. Uỷ ban MTTQ Việt Nam nkuăl Cư Kuin kŏ pă prăk nkra 9 ngih kơl an ân ăp rnăk ach o bah ăp xã.

 Nau ƀư nar tâm rnglăp ăp rnoi tâm nkuăl ƀon lan jêng nau ueh, leo nau kan Mặt trận tât ma kônh wa ƀon lan, rƀŏng tât ăp rnăk ndrel ăp nŭih. Nkô̆ bah nar rgum lah gay ndâk, ƀư nâp ndrel ƀư ueh nau vay ƀư tơm bah ƀon lan, n’hao n’hâm dăng bah rmôt tâm rnglăp ăp rnoi ndrel n’hao nau dơi bah MTTQ Việt Nam tâm rnôk mhe./.