Lôch 10 năm tĭng ƀư nău ntrŭnh mbrô 40-CT/TW 2014 bah Ban Bí thư mpeh nău n’hao dăng rđău kan bah Đảng đah tơm prăk nta manh, lĕ rngôch tơm prăk n’gluh an manh dja ta Gia Lai kơp tât lĕ khay 6/2024 hŏ geh rlău 7.200 rmen prăk. Bah nê, rlău 156.500 rnăk ach o, dăch kêng ach o n’hanh nuĭh dơi kơl hŏ dơi manh tơm prăk gay tuch tăm, nău rêh dơi n’hao kloh. Bah meng nê, tơm prăk nta dơh lah tơm ndơ khlay gay Gia Lai tĭng ƀư ăp trong nchrăp kan khlay ta thôn ƀon.

Tâm jay hvi 70m² hŏ ƀư lôch jêh rpaih ntô n’hanh dôl nchrăp tâm rơh ƀư lôch jêh ta ƀon Bôn Chơ Ma, xã Ia Trôk, nkuâl Ia Pa, n’gor Gia Lai, yuh Siu Shin Cha, 25 năm  deh, rhơn nđơr. Păng nkoch, jay ntơm geh wăng sa bah rnăk wâl, bah rnăk ach o tât klaih rlău ach o ngăn ngăn. Tĭng yuh Siu Shin Cha, nău geh tât đah rnăk wâl ntơm bah năm 2020, rnôk manh geh 50 rkeh prăk bah Ngân hàng Chính sách Xã hội:

"Nơm geh prăk manh dja ma rnăk geh ndơ ma hun hao wăng sa. Rnăk rvăt tay 2 mblâm ndrôk deh kon mât geh 8 mblâm hôm n’hanh mhe mon tay jay nâp uĕh. Nơm geh prăk tăch ndrôk ma rnăk geh tay prăk tuch tăm, tăm tay mhât, rvăt ndeh công nông."

Trong hăn tât klaih rlău ach o bah rnăk wa Rơ Chăm Hà, deh năm 1962, ta thôn Hbel, xã Ia Kdăm dơi kơl nơm geh tơm prăk nta dơh đŏng. Rnăk 5 nuĭh dơn geh du mblâm jay lah 24m² dơi mon ƀư bah prăk ntop kơl n’hanh 2 sào ba. Ăp ndơ dŏng sa nsing tâm  nău kan hăn thuê rgoh n’gơ. Nsrôih klaih rlău ach o, năm 2021, wa Hà manh 50 rkeh prăk bah Ngân hàng Chính sách Xã hội bah rmôt an manh tơm prăk tâm xã. Păng dŏng tơm prăk nê gay rvăt 2 mblâm ndrôk n’hanh ndăn dŏng neh soih wăr jay tăm pih. Hôm ƀa ƀă păng manh tay neh tăm bum blang gay ntop geh tay. Aƀaơ, wa Hà mô dơn klaih rlău ach o ma hôm geh nău rêh geh gô lơn:

"Bôk năp gâp rvăt 6 mblâm sŭr, tâm rnôk mât khĭt lĕ du n’gul đŏng. Lôch nê gâp hăn rvăt tay tâl bar n’hao rơ̆ 18 mblâm. Rnôk tăch geh  prăk mon jay, rvăt tay 4,4 sào neh gay tuch tăm, geh rnôk tăm ba, tăm mhât. Nsĭt geh nău oi đŏng, geh prăk rvê an oh kon jêh aơ tay đŏng.”

 Wa Trần Ánh Tôn, Giám đốc Ngân hàng Chính sách Xã hội nkuâl Ia Pa, Gia Lai an gĭt: Ta nkuâl Ia Pa, geh bơi 2.200 rnăk  ach o, lơn âk lah rnăk rnoi mpôl đê̆. Gay đăp mpăn 100% rnăk ach o dơi manh  tơm prăk nta dơh, 168 rmôt mpêt nkrem n’hanh manh tơm prăk ta 9 ntŭk an manh hŏ sơch n’hanh ntop kơl nuĭh ach o tât đah tơm prăk manh, lôch jêh siƀŭt. Ntơm bah năm 2021 tât aƀaơ, hŏ geh 6.610 rnăk ta nkuâl klaih rlău ach o nơm geh dŏng di tơm prăk manh nta dơh.

“Jrô kan an manh hŏ rgum rong tơm prăk manh an 3 bôk nău kan hŭch ach  o, ntop kơl rnăk ach o n’hanh dăch kêng ach klaih rlău ach o. Đăp mpăn ăp nuĭh mô geh pah pât tơm prăk, rnôk geh nău ŭch đă n’hanh tŏng geh nău dơi, jrô kan mbra rong an lor rnăk ƀon lan tât tơm prăk ngăch gay ntuh kơl tuch tăm tăch rgâl ta ntŭk. Kơp tât aƀaơ, lĕ rngôch n’gluh an manh bah 3 bôk nău kan klaih rlău ach o ta jrô kan an manh hŏ geh tât rlău 166 rmen  prăk đah 3.900 tơ̆ rnăk manh, âk 36,7% lĕ rngôch tơm prăk geh an manh.”

Tâm 10 năm n’gor Gia Lai  tĭng ƀư nău ntrŭnh 40-CT/TW 2014 bah Ban Bí thư mpeh n’hao dăng nău rđău  kan bah Đảng đah trong kơl manh tơm prăk nta dơh, hŏ geh 156.000 tơ̆ rnăk ach o ta n’gor dơi manh tơm prăk, lĕ rngôch 7.600 rmen prăk. Ntơm bah nê, 55.600 rnăk hŏ klaih rlău ach o. Tơm prăk manh dơh lam rêh jêng kon nuĭh lah tơm ndơ khlay gay Gia Lai rdâk njêng rlău 242.000 trong dak kloh uĕh n’hanh rlău 3.000 mblâm jay an rnăk ach o ta ăp xã dŭt jêr jŏt mha êng. Tĭng uănh năl bah Tỉnh ủy Gia Lai, tơm prăk nta manh lah “Mâng rđăt jôn rbăn” kơl nuĭh dơi nta trong dơh n’hanh nuĭh mô geh jêng ta n’gor hun hao tuch tăm, rgâl geh nău rêh, rgop n’hŭch ach o jŏ jong. Aơ lah tơm ndơ khlay tâm let năp tay đŏng, rgop tâm rdâk njêng ƀon lan mhe, hun hao wăng sa- rêh jêng kon nuĭh nkual ƀon lan rnoi mpôl đê̆ n’hanh mpeh yôk yang n’gor Gia Lai.