Tổng thư ký, Kruanh Văn phòng Quốc hội Bùi Văn Cường mbơh, tâm 3 khay bôk năp, ăp ntŭk kan râng nchră, kơl ƀư dơi 02 rơh rƀŭn bah Quốc hội, 08 rơh rƀŭn bah Uỷ ban Rnâng kan Quốc hội, uănh nchră ndrel rgop nau đah 02 luật, 04 nau ntrŭnh bah Quốc hội, 66 nghị quyết bah Uỷ ban Rnâng kan Quốc hội; ƀư rơh rƀŭn ntoh măt Quốc hội pah kan gay tâm nchră, rgop nau 08 nau nchrăp Luật mbơh Quốc hội uănh tâm rơh rƀŭn tal 7, Quốc hội gưl XV.

 Nau nchră, kơl ƀư ăp nau ndâk pháp luật lŏ geh kơl an lor, uănh khlay, ƀư nâp geh n’hao, mât tâm dăch ma nau rgum mrô 19 bah Bộ Chính trị, Bôk nau ndâk luật, pháp lệnh năm 2024, nau ntrŭnh mrô 81-bah Uỷ ban Rnâng kan Quốc hội. Êp nê, ntop 19 nau kan ndâk pháp luật mhe tâm nau nchrăp mrô 81 gay năn ƀư ăp nau ntrŭnh bah Đảng ndrel tŏng dơi nau đă ngăn.

Ăp nau tâm nchră ma bah dih năl nau kan bah Đảng, Ngih dak, geh ƀư ueh, ngăn ndrel săk tam tâm ăp nau kan, bar ding ndrel âk ding. Nau kan ntoh măt, nŭih kơl an, nau mĭn njêng khoa học lŏ geh ƀư ueh, nar lơn lăp tâm nau rêh.

Tâm 6 khay aơ, ăp nau kan bah Quốc hội ƀư jêh săm ƀŭt mbơh tât Quốc hội nchră ta rơh rƀŭn tal 7 đah 09 nau nchrăp luật, du nau ntrŭnh, ƀư jêh, nâp ăp nau mbơh gay ndŏ Quốc hội rgop mpeh 11 nau nchrăp luật hŏ geh tâm bôk nau kan ndâk luật, pháp lệnh.

Jêh rnôk djăt nau rgop tâm rơh rƀŭn, Kruanh Quốc hội Vương Đình Huệ rnê prêh nau kan tâm khay 3 ndrel 3 khay bôk năm, ăp ntŭk kan bah Quốc hội hŏ ƀư rnoh nau kan têh, khoa học; mât tâm dăch nau nchrăp bah Đảng đoàn Quốc hội, nkre ƀư ueh ăp nau ntoh mhe; nau kan bah ăp ntŭk kan geh nau dơi nâp, tâm dăch ma nau ngăn, tâm dăch ma rđau bah Ban Bí thư, tâm di nau ntrŭnh bah pháp luật.

            Nau kan bah Quốc hội ƀư ăp tâm nau kan ndâk pháp luật, uănh ndrel ntrŭnh nau kan khlay bah neh dak, nau kan kơl an, tâm nchră đah ba dih, nau tâm nchră, mêt uănh, rđau nau kan bah HĐND, ƀư rơh rƀŭn bah Quốc hội, rơh rƀŭn bah Uỷ ban Rnâng kan Quốc hội, ăp ntŭk kan bah Quốc hội, ăp nau dơi tâm nau ƀư kan chính trị...Rnoh kan, nau nâp bah nau kan tŏng dơi nau đă dă nau ngăn, tâm di ma nau ŭch bah cử tri ndrel ƀon lan. Ntoh măt bah Uỷ ban Rnâng kan Quốc hội, Kruanh Quốc hội Vương Đình Huệ rnê prêh ăp nau tă dơi geh ma ăp ntŭk kan bah Quốc hội geh, ăp cán bộ công chức hŏ mro nsôih, kan ueh, tŏng dơi nau geh dơi nsum bah Quốc hội. Tâm rơh tât, Kruanh Quốc hội Vương Đình Huệ, đă:

 ‘Mpeh nau kan bah khay 4, tâm 6 khay, nau tơm lah nchrăp ƀư kơl an ân rơh rƀŭn Trung ương 9; rơh rƀŭn Quốc hội tal 7 ndrel bah năp nê, rơh rƀŭn tal 32, 33 bah Uỷ ban Rnâng kan Quốc hội. Gâp đă jêh rơh rƀŭn aơ, Tổng thư ký, Kruanh Văn phòng Quốc hội mĭn, djăt nau tâm rơh pah kan gay ma rgum dĭng lĕ ăp nkô̆ nau ntơm bah rnôk aơ tât lôch khay 6. Đah ăp nau ntrŭnh bah pháp luật ndrel nau ntrŭnh geh nau dơi quy phạm pháp luật ân geh kơp leo tâm bôk nau rƀŭn nchră bah Uỷ ban Rnâng kan tal 32,33 tĭng du đê̆ nau kan. Tal bôk năp, ăp nkô̆ nau ntơm bah rnôk aơ ân tât lôch khay 6, kơl an lor ân rơh rƀŭn tal 7, Quốc hội gưl 15. Tal bar, ăp nau nchrăp luật ndrel nau ntrŭnh, lah ê geh tâm Bôk nau kan bah Quốc hội ntrŭnh ri ân geh đă N’gâng kan tư pháp ntoh măt Chính phủ mbơh gay Uỷ ban Rnâng kan Quốc hội uănh nchră uỷ ban Pháp luật tâm rơh rƀŭn”.

Kruanh Quốc hội kŏ nkah, ăp ntŭk kan bah Quốc hội uănh nau ntrŭnh, nau mbơh mpeh mât mpôn nau, nau ntrŭnh văn thư, lưu trữ, nau ntrŭnh mât nau kan khlay bah Ngih dak, mât chính trị ntŭk kan, nau kan ƀư rjăp rnôk ntoh ngơi. Ăp rmôt kan ân geh kơp ndrel đă ăp cán bộ, công chức ƀư rjăp nau ntrŭnh mpeh nau ƀư công chức ndrel công vụ. Ăp ntŭk kan bah Quốc hội ân ntoh n’hao nau kan rjăp lơn tay, nchrăp ăp ntrong, nkre n’hao nau kan mpeh ăp ding, nkre n’hao nau tâm rgop n’ăp tâm trôm, bah dih tâm nau ƀư nau kan, nau dơi geh jao./.