Du nau tât rlong geh ƀư tâm rơh rƀŭn, jêh rnôk djăt Kruanh n’gâng kan ntĭm nti mbơh mpeh nkô̆ nau bah nau tâm lơh tâm ngih săm ƀŭt, ntoh măt Đậu Khắc Gia Bảo tă bah rmôt kan ntoh măt Quốc hội kon se n’gor Quảng Trị, mbơh nau ôp tâm nar rƀŭn mbơh:

            ‘Dăn mbơh ma Kruanh n’gâng kan ntĭm nti, gâp hŏ djăt kloh nau mbơh bah Kruanh n’gâng kan mpeh nau tâm lơh tâm ngih săm ƀŭt. Yơn lah, gâp saơ Kruanh n’gâng kan ê geh nchră kloh ngăn mpeh nau tât bah kon se tâm nau mĭn nau kan tâm lơh tâm ngih săm ƀŭt”.

            Ntoh măt N’gâng kan ntĭm nti ơh nau ôp:

            ‘Gâp lah ueh ndrel tâm ban ngăn đah ntoh măt Quốc hội Đậu Khắc Gia Bảo, aơ kŏ lah nau ê dơi, ri ma tâm rơh tât, nơm ân geh tâm rgop rjăp ngăn đah ntŭk kan dak su gay ma n’hao nau ntrŭnh ƀư ndrel rklaih ăp nau kan ân năn lơn, yơn nau kan geh tât nau mĭn geh ntoh luh êng bah kon se”.

            Hôm đah Kruanh n’gâng kan dak si Đào Hồng Lan, bol ma râng rƀŭn rlong ƀư Quốc hội kon se, yơn Kruanh n’gâng kan hôm geh nau mĭn kơt dôl râng du nau rƀŭn nchră ngăn ngên:

            ‘Ăp nau ôp kŏ kơt lah ơh nau ôp bah ăp ntoh măt lah kon se uănh rjăp ngăn ndrel ƀư ngăn nau kan, ntoh nau kơl an tât ăp nau kan bah kon se. Phung hên uănh rjăp ngăn đah kon se rnôk aơ. Ăp nau kan geh tât nau su hât, ngăn lah su hăt mhe, su hât điện tử, su hât n’ha duh ndrel ăp ndơ êng kơh lah ngêt ndrănh, ƀiêr, mô lah geh n’ăp ma ma tuý kŏ kơt lah nau nkre âk ngăn đah n’hâm soan bah kon se lah nsum, kŏ kơt lah rnoh ueh bah kon ntil, ntil nŭih bah neh dak nơm”.

            Đah nau dơi lah ntoh măt Quốc hội kon se bah rmôt kan ntoh măt Quốc hội nkuăl ƀon têh Hà Nội, oh Nguyễn Trà My, kon se jrâu 8 B3, Ngih săm ƀŭt THCS Vinschool Times City ntoh nau:

            ‘Tâm rnôk rƀŭn nar aơ, ăp nŭih hŏ tâm nchră khuh n’gôr ndrel kŏ geh âk ngăn nau tâm nchră ueh ndrel geh âk nau. Gâp ŭch lah, ăp nau rgop ndrel nau ngơi bah gâp mra geh ăp Kruanh n’gâng kan, ntŭk kan djăt ndrel kơl an, geh ăp nau kan tă bah nau đă bah hên, gay dơi geh nsrŭng lơi ăp nau tâm rnôk tâm di năm bah phung hên”.

            Jêh rnôk râng ôp ndrel ơh nau ôp rlong ƀư, Kruanh Quốc hội Trần Thanh Mẫn rnê ngăn Trung ương Đoàn, Hội đồng Đội Trung ương hŏ geh nau mbơh đă ma ăp ntŭk kan ƀư rơh rƀŭn ntit rlong “Quốc hội kon se”. Nkre lah rjăp, Đảng, Ngih dak mro kơl an, mât chăm ngăn tât nau mât chăm, ntĭm nti kon se. Tĭng Kruanh Quốc hội, rơh rƀŭn rlong ƀư “Quốc hội kon se” tal 2 mra geh săch 02 nau kan “Njrăng, rdâng nau tâm lơh bah kon se tâm ngih săm ƀŭt” ndrel “Njrăng, rdâng nau khuch bah su hât, ngêt ndrănh ƀiêr, ngăn lah tâm ăp ngih săm ƀŭt” ngăn ngên geh nau ta, geh ƀon lan kơl an./.