Gay kơl ăp kon se nti geh nău rêh jêr jŏt đăp mpăn ôn thi tốt nghiệp THPT, n’gor Kon Tum hŏ geh âk trong ntop kơl ăp kon se nti. Tâm rlău 5.000 nuĭh râng thi bah n’gor Kon Tum đăng ký râng rơh thi tốt nghiệp THPT năm aơ, geh rlău 1.100 kon se nti geh nău rêh jêr jŏt, hŏ dơi ăp nhih nti tâm n’gor nta trong dơh ôn thi rgum ta nhih nti.

Êng đah ăp nhih nti PTTH Dân tộc Nội trú, ăp kon se nti dơi tâm pă  lĕ ma ntŭk gŭ n’hanh ntop kơl prăk sa. Gay geh tơm ndơ kơl ăp kon se nti, ăp nkuâl, nkual ƀon têh bah n’gor Kon Tum sŏk ngân sách n’hanh rgum ndơ kơl, tât rnôk dja geh 430 rkeh prăk. Aƀaơ, Tỉnh đoàn Kon Tum dôl rgŏ jă tay ăp nuĭh lŏng nuih n’hâm, gay ntop kơl ăp kon se nti geh nău rêh jêr jŏt. Sở Giáo dục n’hanh Đào tạo n’gor Kon Tum n’hanh ăp nkuâl, ăp n’gâng kan bah n’gor mbra rgum tơm ndơ,  kơl ăp ntil đah ăp kon se nti tât dŭt jêh rơh thi. Nău nsum bah ăp gưl, ăp n’gâng kan lah du nău nđơr dŭt têh đah nai ntĭm n’hanh kon se nti gay n’hao tay săk blău ôn tập tâm rơh ndăn ngăch.