Râng nar rƀŭn geh rlau 500 ntoh măt lah nŭih kan bah Rnâng kan rđau kan, rmôt thư ký, Kruanh rmôt ƀư nau kan Trung ương, ntŭk kan ntoh măt bah Rnâng kan rđau mrô 35, Rnâng kan Đảng, Đảng đoàn, Đảng uỷ tâm Trung ương; ntoh măt Rnâng kan rđau kan 35 ăp n’gor uỷ, thành uỷ tâm Trung ương...

            Đah nuih n’hâm ƀon lan ƀư tơm, ƀư nau kan rjăp, sŏng, rơh rƀŭn hŏ dŏng âk mông gay djăt ăp ntoh măt tâm nchră, mbơh ƀư mpeh ăp nkô̆ nau geh nkah tâm nau mbơh lôch 5 năm ntrŭnh ƀư nau ntrŭnh mrô 35-NQ/TW, rgum nchră jru ndrel ngăn ăp nau tă geh dơi, tă bah nê đă âk nau kan khlay tâm rơh tât. Ăp ntoh măt nkoch âk nau kan ueh, nau kan mhe, nau tă dơi tâm nau kan mât nau nâp tâm nau mĭn bah Đảng, lơh rdâng, njrăng, rklaih nau mô ueh, ăp nau tih, nau tâm rkeh.

            Ntoh nau tâm nar rđau rƀŭn, Kruanh dak Võ Văn Thưởng rnê lah, jêh 5 năm ƀư nau ntrŭnh mrô 35-NQ/TW, nau gĭt bah ăp gưl uỷ, ntŭk kan Đảng, cán bộ, đảng viên mpeh nau kan, nau dơi, nau khlay bah nau kan mât nau mĭn bah Đảng, lơh rdâng lơi ăp nau mĭn tih geh âk nau rgâl ueh, rjăp, rgum dơi n’hâm dăng rgum bah lam ntrong kan chính trị rêh jêng ndrel njêng jêng n’hâm dăng nsum, njêng jêng nuih n’hâm ƀon lan mât nau mĭn bah Đảng.

            Nau kan mbơh, nkoch geh âk nau blau mhe n’ăp ma nkô̆ nau, nau kan mbơh, ƀư ueh nau leo trong tâm nau mbơh nau bah ăp ntŭk kan nkoch mbơh, ngăn lah tâm internet ndrel mạng xã hội, ƀư rêng lam nau ntrŭnh bah Đảng, nau ntrŭnh bah Ngih dak, ăp nau mbơh ueh, ăp nau dơi bah nau kan rgâl mhe neh dak tâm ăp nau kan, nkoch mbơh nau kan ueh, nŭih kan blau tât âk mpưm nŭih cán bộ đảng viên ndrel nŭih ƀon. Ăp nau tă geh dơi jêh 5 năm ƀư nau ntrŭnh mrô 35-NQ/TW hŏ rgop nau khlay tâm nau mât đăp mpăn chính trị, rnă njrăng, đăp mpăn nau rêh jêng, ƀư nâp nau rnơm bah ƀon lan ma Đảng, Ngih dak.

            Kruanh dak đă ăp gưl uỷ Đảng ân lŏ ntrŭnh, gĭt kloh jru jăp lơn tay nau kan mât đăp mpăn nau mĭn bah Đảng, lơh rdâng ăp nau tih, nau tâm rkeh, ngăn lah tâm rnok aơ; uănh năl nau kan dơi bah nŭih dâk bôk ndrel ăp cán bộ, đảng viên tâm rnôk ƀư nau kan aơ. Ndrel ma nê, ƀư ueh lơn tay nau kan, nau dơi bah ăp ntŭk kan tâm nau mât nau mĭn bah Đảng, n’hao nau săk tam nau mbơh, nau nkoch trêng, rêng lam nsôih ueh ngăn, nsôih lơh rdâng rjăp ăp nau tih, nau tâm rkeh.

            Tâm nar rƀŭn, ăp ntoh măt râng uănh nau mpla n’hơ ăp ntil ndơ mĭn njêng khoa học, ntil dnơ khoa học-công nghệ kơl an nau mât nau mĭn bah Đảng, uănh phim nkoch tât ăp nau ơm geh mpeh nau tă geh dơi bah 5 năm ntrŭnh ƀư nau ntrŭnh mrô 35-NQ/TW bah Bộ chính trị gưl XII.

            Rnâng kan rđau kan mrô 35 Trung ương kŏ pă bằng khen ân ăp rmôt, ăp nŭih geh nau dơi ngăn tâm nau ntrŭnh kan bah 5 năm ntrŭnh ƀư nau kan mât nau mĭn kan bah Đảng, lơh rdâng lơi ăp nau ƀư tih, nau tâm rkeh bah dih./.