Kruanh dak Tô Lâm mhe mâp măt nuĭh ntơh măt ăp chroh rƀŭn. Rơh mâp măt geh nău tât râng bah ăp kruanh chroh rƀŭn 45 mpôl chroh mpeh 16 ntil chroh dơi Đảng, Ngih dak kơp dơn. Ta  rơh mâp măt, Kruanh dak Tô Lâm njuăl tât lĕ rngôch kruanh chroh rƀŭn, ƀon lan kon chroh, nuĭh geh chroh lam dak nău ôp khân lĕ nuih n’hâm bah Tổng Bí thư Nguyễn Phú Trọng. Nkre njuăl tât ăp kruanh chroh rƀŭn ntơh măt ăp mpôl chroh n’hâm suan ngăch dăng, rhơn răm, ndrel geh hao kalơ trong hăn ndrel đah rnoi nuĭh.

Kruanh dak ŭch rŏng, ăp kruanh chroh rƀŭn mpơl tay uĕh lơn đŏng nău khlay kan  lah ntung njŏ khlay đah Đảng, Ngih dak tât ƀon lan kon chroh; kuăl  jă kon chroh, nuĭh geh chroh tâm n’hanh bah dih dak, tâm rnglăp đah ƀon lan lam  dak nsrôih tĭng ăp trong leo tâm  rlong rŏng dak, hun hao wăng sa- văn hóa- rêh jêng kon nuĭh, đăp mpăn njrăng n’gang neh dak, rnă njrăng, tâm boh dak bah dih; leo tĭng ƀư jăp trong nchrăp, gung trong bah Đảng n’hanh trong kơl, pháp luật bah Ngih dak; tĭng ƀư jăp nău khlay kan, nău dơn kan bah nuĭh ƀon lan, tĭng ƀư trong rƀŏng chroh rƀŭn nkre krêp dêh đah rnoi mpôl.