Ntoh nau tâm nar mâp măt, ntoh măt rđau kan Đảng, Ngih dak, Kruanh dak Tô Lâm njoăl nau ôp khâl, nau rhơn ueh lăng, n’hâm soan bah Tổng Bí thư Nguyễn Phú Trọng tât ăp đồng chí druh ndăm xung phong ơm. Kruanh dak rhơn, ăp nŭih tâm lam dak rêh ueh, rêh đăp mpăn, lŏ rêng nuih n’hâm “druh ndăm xung phong” tâm nau kan ndâk njêng neh dak Việt Nam ŭch rŏng.

Rnôk aơ tâm lam dak geh rlau 650 rbăn druh ndăm xung phong ơm tă râng tâm lơh yor neh dak, rnoi mpôl. Rơh rlau aơ, rmôt hŏ ƀư âk nau kan kơl an ăp nŭih druh ndăm xung phong. Tâm nê, hŏ bonh đă ndrel pă kơl an rlau du rbăn ngih, nkra tay 509 ngih, bonh đă pă ndơ kơl an, kơt: prăk, ndeh vah jâng, ndơ sa, kho ao, ndơ dŏng nti ân kon se rnoh rlau 269 rmen.

Du rnôk nchrăp Đại hội ntoh măt lam dak bah Druh ndăm xung Việt Nam tal V năm kan 2024-2029, Kruanh dak ŭch ăp nŭih ân nkah ndrel nsôih n’hâm nơm ƀư tĭng nau Wa Hồ ntĭnh “Đah ăp nŭih hŏ roh du gưl nting mham bah nơm”, Đảng, Chính phủ ndrel kônh wa ân joi ân khân păng geh ntŭk sa, ntŭk rêh, nkre pơk jrâu nti nau kan ân geh kan rong săk nơm:

‘Nkah nau ntĭm bah Wa Hồ, tahen ndrel cán bộ geh chiăr nti ăp nau ueh, kơt: Nsôih janh kan, nsôih mô klach nau jêr, geh chiăr nti ân ueh, nau  ƀư rjăp ân ƀon lan sŏng dơi nau nkah lah ndrel cán bộ ân ƀư kloh lơi ăp nau mô ueh tih tâm nau kan, sa khâm, mpung lir; tâm ngih săm ƀŭt mbung ngơi ty kan, nau nti geh nsum ma nau kan mhâm ƀư ân cán bộ geh nau mĭn ân kloh, nau mĭn ân nâp tay, ntrong pah kan ntop tay nau ƀư tơm. Ăp ntŭk nê ân geh ntĭm nti, nkre ntul rlong cán bộ”.

Kruanh dak ŭch ăp nŭih hŏ nsôih ri ân nsôih lơn tay, hŏ nsôih ti ân nsôih prêh đŏng, đah âk nau kan ngăn gay ơm rklaih ăp nau kol tâm nau kan đah Druh ndăm xung phong ơm, uănh nê lah nau kan, nau rŏng, ntoh nau nkah, nau gĭt jru đạh ăp nŭih hŏ kơl an, roh hoach ân nau kan rklaih rnoi mpôl, đăp mpăn neh dak, ndâk ndrel mât neh dak. Kruanh dak Tô Lâm lah rjăp:

“Cán bộ, ntŭk kan, n’gâng kan, ngăn lah Đoàn druh ndăm Cộng sản Hồ Chí Minh lŏ mĭn, đă ƀư dŏng nau blau mhe tâm nau mĭn kan Hồ Chí Minh mpeh ntŭk ntĭm nti têh bah druh ndăm xung phong, ndâk rmôt cán bộ, ndâk rơh mom ndăm Việt Nam ŭch rong neh dak, nsôih ntô̆ n’hao rnoi mpôl, geh nau blau nâp bah chính trị, geh nau  blau mĭn cách mạng  kloh ang, geh nau nâp tâm rnglăp lam ntur neh, geh nau ŭch, leo trong blau ƀư tơm khoa học công nghệ mhe n’hao trong mhe, mra lơh khĭt săk, leo trong, ngăn ngên jêng nau kan tơm bah nau ndâk njêng ndrel mât neh dak”.

Kruanh dak kŏ đă lŏ ntĭm nti, tâm rnglăp ndâk njêng rmôt kan ndrel rmôt druh ndăm xung phong ơm tâm lam dak nâp dăng, nsôih, ndâk, ntop tay, nkra nâp ăp ntŭk nkah ơm, ntŭk nkah ơm mpeh druh ndăm xung phong, ngăn ngên jêng “ntŭk tât ueh” gay ntĭm nti nau vay ơm cách mạng.

Rnôk aơ, Trung ương rmôt druh ndăm xung phong dôl ntrŭnh ƀư du nau rgŏ jă ndrel 2 nau kan têh geh Rgŏ jă “Druh ndăm xung phong leo trong ƀư tĭng nau mĭn, nau rêh, nau kan Hồ Chí Minh; nau kan “Druh ndăm xung phong pah kan jan sa blau yor nau kơl an”; Nau kan “yor nau kơl an tahen nơm, ăp cán bộ, hội viên ƀư âk nau ueh” 74 năm rlau aơ bah ăp rơh druh ndăm xung phong hŏ khĭt săk nơm, bun dăp nau ueh ơm bah druh ndăm xung phong ndrel ăp rơh Việt Nam, ƀư ăp ntil nau kan, hăn tât ăp ntŭk rnôk geh neh dak đă, rêh yor nau tâm kơl tahen nơm./.