Ntoh nau tâm nkuăl Anh Sơn, Kruanh Quốc hội Trần Thanh Mẫn mbơh, rnôk aơ, tâm lam dak geh rlau 9,2 rkeh nŭih geh n’hâm, tâm nê geh bơi tât 1,2 rkeh tahen khĭt, bơi tât 500 rbăn rnăk tahen khĭt, rlau 117 rbăn Mẹ Việt Nam janh dăng, bơi tât 600 rbăn tahen sôt rmanh ndrel geh kơl an. N’gor Nghệ An lah ngoai tâm 3 n’gor geh rnăk geh n’hâm ma cách mạng, tahen khĭt, tahen sôt rmanh âk rđil lam dak, geh rlau 65 rbăn rnăk geh n’hâm.

    Kruanh Quốc hội rnê prêh, ăp năm, n’gor uỷ, HĐND, UBND, ăp ntŭk kan bah n’gor Nghệ An hŏ rgum tu tơm, tơm prăk Ngih dak, rgop tâm tơm prăk kơl an, mât chăm ân rnăk geh n’hâm kơl cách mạng, đak rnoh prăk âk, nklăp 150 rmen.

    Kruanh Quốc hội kŏ ân lah, ăp nkuăl kŏ ân geh rgŏ jă ăp ntŭk gay ma mât chăm kơl an ăp rnăk geh n’hâm ma cách mạng, ngăn lah uănh aơ lah nau kan ƀa ƀơ, mro, ngăn lah ăp rnăk geh nau rêh jêr jŏt. Kruanh Quốc hội Trần Thanh Mẫn, đă:

       ‘N’gor ân geh lŏ ntrŭnh nau ntrŭnh mrô 14 bah Ban Bí thư mpeh nau lŏ n’hao lơn tay nau rđau kan bah Đảng đah nau kan kơl nŭih geh n’hâm ma cách mạng; mêt uănh nau ƀư ăp nau kan bah Đảng, Ngih dak đah rnăk nŭih geh n’hâm, rnăk tahen sôt rmanh tahen khĭt hŏ ntrŭnh ƀư ntŭk geh tât. Gâp đă rgŏ jă ân rjăp tay tâm lam ƀon lan tâm nau kan mât chăm ân rnăk vâl geh n’hâm, ăp nŭih tahen sôt rmanh, rnăk vâl tahen khĭt đah nau ƀư kan ngăn”.

    Lam n’gor Nghệ An ƀư tĭng nau râng tơm prăk rgop kơl, kơl an Mẹ Việt Nam janh dăng, mât chăm, kơl an, tâm pă kơl an ân ăp rnăk geh nŭih sôt rmanh, me mbŏ tahen khĭt; kơl an rnăk geh dơi kơl, rnăk geh n’hâm ân nsôih hun hao văng sa, jut n’huch ach o. Đah tơm geh rgum, n’gor ndâk mhe, nkra tay bơi tât 16 rbăn ngih, bơi tât 24 rbăn săm ƀŭt têm prăk ân ăp rnăk geh n’hâm ma cách mạng. N’gor hôm tơm prăk gay ma ndâk, n’hao nkra rlau du rbăn môch, ntŭk nkah ơm.

            Ta ntŭk kan bah nkuăl uỷ Anh Sơn, n’gor Nghệ An, Kruanh Quốc hội Trần Thanh Mẫn ndrel rmôt kan bah Uỷ ban Rnâng kan Quốc hội hŏ râng nau pă tơm prăk kơl an ndâk nkra 20 ngih gŭ ân rnăk dơi kơl, nŭih geh n’hâm ma cách mạng. Du ngih rnoh 50 rkeh prăk.

     Bah năp nê, tâm nkuăl ƀon têh Cần Thơ, Kruanh Quốc hội Trần Thanh Mẫn ndrel rmôt hăn kan hŏ tât khâl, pă nklâm ndơ ân rnăk dơi kơl, nŭih geh n’hâm ma cách mạng di nkah 77 năm nar tahen sôt rmanh, tahen khĭt. Kruanh Quốc hội Trần Thanh Mẫn đă, nkuăl ƀon têh n’hao nau ƀư tĭng nau rđau mrô 14 bah Ban Bí thư mpeh nau n’hao nau rđau kan bah Đảng đah nau ƀư kan kơl an nŭih geh n’hâm ma cách mạng gay ăp nau kơl an bah Đảng ndrel Ngih dak geh ƀư tŏng ăp tât nŭih geh n’hâm:

      ‘Nơm ân lŏ rgŏ jă tâm lam ƀon lan tâm nau mât chăm kơl an ân mẹ Việt Nam janh dăng, nŭih geh n’hâm janh dăng, nŭih janh dăng blau tâm nau pah kan jan sa rnôk tâm lơh kăl e, rnăk geh n’hâm ma neh dak. Rgum n’hâm dăng bah lam ntrong kan chính trị gay geh tơm prăk ngih dak ri ân geh rgum nsum gay ma mât chăm ân nŭih geh n’hâm ma neh dak. Gâp đă ăp đồng chí ân rnê, nkhôm năn ăp ntŭk kan, ăp nŭih kơl an mât chăm ân nŭih geh n’hâm ma neh dak. Năn rnê nkhôm ăp rnăk geh n’hâm, rnăk dơi dơi ma nsôih êng, nsôih gay rlet hao tâm rnôk pah kan jan sa, tăch rgâl, pah kan ân geh săk tam, ngăn lah đah ăp rnăk geh nau rêh jêr jŏt nsôih đăp mpăn nau rêh”.

    Kruanh Quốc hội Trần Thanh Mẫn ŭch ăp gưl rđau kan bah Đảng, n’gâng kan, mặt trận, ăp rmôt kan bah Nkuăl ƀon têh Cần Thơ lŏ kơl an tât Mẹ Việt Nam janh dăng, nŭih janh dăng bah tahen, rnăk tahen sôt rmanh, tahen khĭt đah ăp nau kan ngăn, n’hêl, ƀa ƀơ kơl an ân ăp rnăk vâl, nŭih geh n’hâm đah cách mạng, rklaih nau jêr, ngăn lah ăp rnăk geh nau rêh jêr jŏt./.