Kruanh Quốc hội Vương Đình Huệ ân lah, nkoch tât bu ur, lam ntur neh kŏ kơt lah Việt Nam kŏ geh nau ueh ngăn. Kruanh Hồ Chí Minh kŏ lah rjap, ‘Neh dak Việt Nam ueh yor bu ur nơm, mom kŏ kơt lah bu ranh, dŏng n’hâm njêng nkra ma ntop tay nau ntor, nau ueh”. Ntơm bah kăl e tât rnôk aơ, bu ur mro geh nau khlay ngăn tâm nau rgop ân nau ndâk ndâk nau rêh hun hao ndrel ndâk rnăk vâl ueh lăng, tâm moh nau kan, tâm moh ntŭk gŭ, bu ur Việt Nam mro ntoh n’hao nuih n’hâm “Janh dăng, nâp nâl, blau nau kan, blau nau ƀư” kơt 8 rplay ma Wa Hồ ân an. Ndrel ma nau hun hao bah nau rêh mhe, ăp nau ueh nê lŏ geh ƀư ueh tay, n’hao jêng ăp nau dơi tâm rnôk mhe lah: Janh kan, ueh săk nơm, ƀư nau kan, ƀư nau blau.

 Kruanh Quốc họi lah rjăp, ăp năm kan bah Quốc hội ntơm bah bôk rơh năm kan gưl 15 tât rnôk aơ, Quốc hội mro joi, rgâl mhe nau tă dơi ăp ntil. Tâm nê, nau ƀư kan bah ăp ntoh măt bu ur kan Quốc hội, ăp oh nur tâm ăp ntŭk kan bah Quốc hội. Ngăn lah, năm kan Quốc hội gưl 15 geh rnoh bu ur ntoh măt Quốc hội âk ngăn tâm 10 năm kan êp aơ, geh 30,26%, rnoh aơ geh nghị viện ăp dak rnê prêh. Tâm nê, geh 3 nŭih bu ur Uỷ viên Trung ương Đảng, Uỷ viên Uỷ ban Rnâng kan Quốc hội, 32 nŭih lah Groi Kruanh, Uỷ viên Rnâng kan, Uỷ viên ƀư nau kan tâm Hội đồng dân tộc, ăp uỷ ban, rđau kan ntŭk kan Quốc hội, rđau kan ăp ntŭk kan bah Uỷ ban Rnâng kan Quốc hội.

Ăp ntoh măt hŏ geh nau mĭn săm ƀŭt, geh nau gĭt jru, geh nau rgop ngăn, ueh, nâp tâm ăp rơh rƀŭn, rgop âk ngăn ân Quốc hội, ntŭk kan Quốc hội, ntŭk kan tâm ăp Uỷ ban râng kan Quốc hội, ƀư ueh nau dơi nau ntrŭnh mpeh tâm ban bu ur bu klô. Rmôt bu ur ntoh măt hŏ âk tŏ ƀư nau kan ueh, jêng tâm nchră uegh, tâm di gay ăp ntoh măt tâm n’ur, tâm nchră nau blay mpeh nau kan bah ntoh măt bu ur kan tâm lam ntur neh âk ding ndrel bar ding.

 Ntoh măt Quốc hội, Kruanh Quốc hội Vương Đình Huệ rnê ngăn ăp nau nsôih, nau dơi ngăn bah ăp ntoh măt bu ur kan Quốc hội tâm Trung ương ndrel rđau kan, mât nau kan bah Văn phòng Quốc hội, ntŭk mĭn njêng ndâk pháp luật, lah rjăp Quốc hội mro ƀư ueh nau ntrŭnh bah Đảng mpeh nau kan bu ur:

 ‘Đă nau ntrŭnh ƀư rjăp nau rđau mrô 11 bah Bộ chính trị mpeh nau kan bu ur tâm rnôk ntrŭt dăng nau kan mhe, ueh nâp neh dak, rđau mrô 21 bah Ban Bí thư mpeh nau lŏ ntrŭt dăng nau kan bu ur tâm nau mhe, ntrŭnh ƀư ueh nau kan, ntrong kan mpeh nau ƀư tâm ban bu ur bu klô, rgop nau geh dơi ăp nkô̆ nau hun hao nâp nâl tât năm 2030, ƀư săk tam nau kan bah neh dak mpeh nau tâm ban bu ur bu klô năm 2021-2030. Bol ma nau kan tâm ban bu ur bu klô ƀư ueh, yơn hôm ân nơm kŏ ntrŭnh. Gâp đă ăp gưl kan, rmôt kan ăp nŭih nơm ân mro ƀư ueh tă bah nau gĭt mĭn tât nau kan, tâm nau ƀư tâm nau nau kan jao nau kan”.

 Kruanh Quốc hội mbơh, dăch tât Đảng đoàn Quốc hội rđau ƀư nau kan, nau ƀư, lŏ n’hao nau dơi rnoh bu ur, ngăn lah ntoh măt Quốc hội. Ân tât rnôk aơ, Quốc hội hŏ ƀư ueh nau kan rgum ntoh măt Quốc hội, cán bộ ăp gưl rnoh âk, lŏ n’hao nau nâp săk tam bah nau kan bah ntoh măt Quốc hội, Kruanh Quốc hội đă lŏ tâm rgop ma nau kan công đoàn gay n’hao nau ƀư nau kan gĭt, hăn uănh, mĭn njêng...Êp nê, Đảng đoàn Quốc hội kŏ ân kơl an nau kan bu ur, mât kơl an nau rêh nuih n’hâm ân bu ur, tâm nê geh nau kan prăk khay, geh nau nchrăp kan prêh, săk tam bah kan bah bu ur.

 Kruanh Quốc hội ntoh nau rnơm lah, ăp ntoh măt Quốc hội lŏ ƀư ueh ăp nau tă geh dơi, geh ăp nau rgop âk lơn tâm nau kan bah Quốc hội, ƀư njêng âk nau dơi têh jăp dăng ndrel rƀŏng tât nau nkah 80 năm Quốc hội Việt Nam./.