Tâm kêng măng 27/9, ta rơh rƀŭn tal 37 bah Ủy ban Thường vụ Quốc hội lĕ an rgop mpeh nău tâm pă trong nchrăp ntuh kơl nsum đêt năm prăk Trung ương lvang 2021-2025 n’hanh trong nchrăp năm prăk năm 2024 an ăp nău kan, nău nchrăp ƀư dŏng sŏk hao tơm prăk trung ương năm 2022 lĕ jêh sam ƀŭt ntuh kơl. Ta sam ƀŭt mbơh bah Chính phủ njuăl Ủy ban Thường vụ Quốc uănh mĭn tay 2 nkô̆ nău: Tâm pă trong nchrăp ntuh kơl nsum đêt năm lvang 2021-2025 lah 22.551 rmen prăk tơm prăm nkrem nsum Trong nchrăp ntuh kơl nsum jŏ năm bah sŏk hao tơm prăk trung ương năm 2022 an 11 nău nchrăp ƀư; tâm pă trong nchrăp ntuh kơl nsum năm 2024 lah rlău 2.100 rmen prăk bah tơm prăk sŏk hao prăk Trung ương năm 2022.

Kruanh Quốc hội Trần Thanh Mẫn an lah, tât rnôk aơ, hôm e âk nău nchrăp ƀư, ndơ ƀư mbrơi, đê̆ đŏng mô hŏ dơi tâm pă tơm prăk. Yor nê, Kruanh Quốc hội đă, Chính phủ ntĭm rđău ăp n’gâng kan, nău kan ndăn kơp uănh, ƀư kloh nkô̆ nău, ntrŭt đă rnôk ƀư, lôch jêh ăp sam ƀŭt ntuh kơl tâm pă. Kruanh Quốc hội uănh lah đŏng, trong kan mât uănh, dŏng prăk ntuh kơl nsum an ntêm nkrem, săk rnglăy, mô an geh du ntil ndơ ƀư, nău nchrăp ƀư geh roh rui, mpŭng lir, nta an nău nsing nơm tâm Đảng, tâm ƀon lan; bah meng nĕ an groi nđôi rjăp ăp nău nchrăp ƀư. ndơ ƀư, yor Quốc hội uănh an.