Rnôk Kruanh Quốc hội Trần Thanh Mẫn mhe tât, cử tri ndrel ƀon lan xã Nga My, nkuăl Phú Bình, n’gor Thái Nguyên hŏ mbơh nau khuch yor mih dak lip lơh, ndrel ntoh nau ŭch geh kơl an:

‘Kônh wa Thái Nguyên lah nsum ndrel ƀon lan Nga My lah êng ŭch geh nau kơl an kônh wa rklaih nau khuch rnôk aơ. Phung hên geh dŭm âk lŏ, đê̆ roh đê̆, âk roh âk, mô mô ndơ geh jêng tay ôh”.

Rngot bah năp nau roh hoch yor mih dak lip lơh ngih vâl, drăp ndơ ndrel lŏ mir bah ƀon lan, Kruanh Quốc hội Trần Thanh Mẫn bonh đă, lah rjăp nau ntrŭnh, nau kơl bah Đảng ndrel Ngih dak mro kơl an tât nau rêh bah kônh wa:

‘Yuh djăt ma đăp mpăn, Đảng ndrel Ngih dak. Mặt trận ăp rmôt, ăp ntŭk kan, ăp gưl kan mro mrăng kơl an tât nau rêh bah ƀon lan, ngăn lah ăp nŭih ƀon lan geh nau rêh jêr jŏt jêh rnôk phŭt mrô 3 lơh khuch tât drăp ndơ, ndơ tuch tăm bah kônh wa. Mhâm ƀư nau ntrŭnh bah Đảng, Ngih dak nơm đah n’gor lah ân geh năn đăp mpăn nau rêh ân ƀon lan”.

Tât ôp khâl ƀon lan xã Nga My, ntŭk geh dak lip băm, Kruanh Quốc hội Trần Thanh Mẫn pă 200 nklâm ndơ bonh đă ăp rnăk geh nau khuch ntơm bah phŭt mrô 3 ndrel dak lip lơh:

‘Ăp đồng chí cán bộ, tahen lah gâp kŏ gĭt đŏng nau jêr jŏt, r’ah rgănh rley rlau nau jêr, kơl an kônh wa ta aơ gay ma rklaih nau khuch bah phŭt mrô 3. Ngăn lah dak hao thăng, ăp đồng chí hăn ntrơn leo kônh wa tât ntŭk đăp mpăn. Rnôk aơ gâp gĭt lah 100% rnăk ƀon lan hŏ sĭt tâm ngih. Ăp đồng chí lŏ kơl an ƀon lan đăp mpăn nau rêh ân ƀon lan, ngăn lah kơl an ƀon lan rep kloh ntŭk ntu gŭ âm”.

Mbơh nau ma Kruanh Quốc hội Trần Thanh Mẫn, Bí thư n’gor uỷ Thái Nguyên Trịnh Việt Hùng, mbơh, geh 4 nŭih khĭt, nchrăp geh rnoh khuch tât drăp ndơ rlau 600 rmen, rlau 25 rbăn rnăk ntrơn du ndal. Mpeh ndơ tuch tăm khuch nklăp 10 rbăn ha. Đah ăp nkuăl geh dak lip, jêh dak rhuăt dôl geh nau khuch djơh tât ntŭk ntu gŭ âm, ntoh luh srê ji.

Ntoh nau tâm nar pah kan, Kruanh Quốc hội Trần Thanh Mẫn mbơh, bah năp nau khuch jâk bah phŭt mrô 3, Tổng Bí thư, Kruanh dak Tô Lâm hŏ geh nau kuăl jă ƀon lan, cán bộ, tahen tâm lam dak rgum rklaih nau khuch ân ăp n’gor mpeh Bắc ndrel Thủ đô Hà Nội.

Kruanh Quốc hội kŏ đă, N’gor Thái Nguyên ân mêt uănh lam ntrong kan điện, dak dŏng ân ƀon lan, nau kan rep kloh ntŭk ntu ân geh đăp mpăn njrăng, rdâng srê ji. Mpeh nau kan aơ, Kruanh Quốc hội ngăn ngên nkah dak si ân geh lăp kan gay đăp mpăn n’hâm soan ân ƀon lan, ân n’hao nkra ăp ngih săm ƀŭt gay đăp mpăn ân ăp kon se ăp gưl geh hăn nti, đăp mpăn rnă njrăng chính trị, rêh jêng lam ƀon lan:

‘Gâp ŭch lah, tâm nuih n’hâm tâm kơl, “n’ha ueh nkŭm n’ha sat’, tâm kơl tâm rnôk aơ lah nau khlay, nơm ân geh bonh đă tâm ndrel bah dih n’gor geh tơm prăk rklaih khuch jehe phŭt mrô 3 lơh tâm nuih n’hâm ân geh tâm ban, mô ân geh ăp nau tât mô tâm di tâm rnôk kơl an njrăng dak lip lơh. Du tŏ tay, ntoh măt ân rđau kan Đảng, Ngih dak, ntoh măt rmôt kan, gâp njoăl tât Đảng bộ, n’gâng kan ndrel ƀon lan Thái Nguyên rlet rlau nau jêr, ntul rlong gay đăp mpăn nau rêh ân ƀon lan’.

Kruanh Quốc hội ân lah, phŭt hăn rlau, tât dak lip ndrel rnôk dak lip rhuăt, lơi ân ba kơi âk nau jâk ngăn, nê lah trong hăn djơh khuch; ngih vâl bah ƀon lan, ngihs ăm ƀŭt ân geh nkra, ndâk tay; rep kloh ntŭk ntu gŭ âm geh khuch. Gay ma rklaih nau khuch bah phŭt mrô 3, Kruanh Quốc hội đă, lam ntrong kan chính trị bah n’gor Thái Nguyên, ntơm bah N’gor uỷ, HĐND, UBND, MTTQ Việt Nam, ăp gưl kan, rmôt kan, ăp gưl ân geh lăp rklaih, mô dơi thơ tha./.