Ntoh nau tâm nar mâp măt, Kruanh Quốc hội Trần Thanh Mẫn rnê prêh đah nau kơl an bah Groi kruanh dak ơm Trương Mỹ Hoa, tơm prăk Vừ A Dính hŏ geh nau ƀư ueh, blau, săk tam. Âk nau kan geh nau tơm yor tơm prăk aơ ƀư, kơt: Bôk nau kan “Yơng kon ntil nau kan mhe” răk rong rlau 600 kon se tă bah nkuăl n’har bri, gôl dak tât nti nội trú; Bôk nau kan “Pơk trong tât nau mhe” ân 100 kon se bu ur rnoi mpôl đê̆, gôl yôk ndrel gôl dak geh nau rêh jêr jŏt...hŏ njêng âk nau ueh, rêng nuih n’hâm tâm kơl, rgop nau khlay tâm nau ndâk nŭih kan ân nkuăl rnoi mpôl đê̆, gôl yôk ndrel gôl dak.

 Kruanh Quốc hội ntoh nau ŭch đah nau kan ntơm năm 2009 tơm prăk nkhôm Vừ A Dính gay rnê ăp nŭih, ăp rmôt geh nau blau tâm nau kan, ntĭm nti, mĭn njêng khoa học; Văn hoá nghệ thuật, Thể thao; neh dak, rnă njrăng, nau kan nsum mpôl...Leo nsĭt nau dơi ueh ân ƀon lan gôl yôk ndrel gôl dak. Ntrong 15 năm rlau aơ, nau nkhôm mô rlu hun hao, pơk hvi, ntơm bah 15 nŭih blau, ntoh lư ndrel 05 rmôt nŭih geh ndơn nau nkhôm rơh bôk năp, tât rnôk aơ geh 118 rmôt ndrel 210 nŭih tă băh 44 rnoi mpôk, tâm nê rnoi mpôl đê̆ geh ndơn nau nkhôm.

 Kruanh Quốc hội rnê prêh ăp ntoh măt lah nŭih kon se nti, sinh viên, druh ndăm, ăp cán bộ Đoàn, ăp nŭih nai nti mom hŏ nsôih chiăr nti, pah kan, blau mhe, geh dơi âk nau, geh nkhôm, geh huy chương gưl neh dak, dak ba dih, geh âk nau blau, nau kan mhe, kơl an ân khoa học, njêng âk nau dơi, dŏng tâm nau ngăn ndrel hun hao văng sa, rêh jêng, đăp mpăn rna ửnăng, đăp mpăn ƀon lan.

Kruanh Quốc hội kŏ kơp dơn, rnê ăp nau tă geh ma tơm prăk Vừ A Dính hŏ geh tâm 25 năm ma aơ, rnê ăp nŭih kơl an, êp nau tăch rgâl hŏ geh âk nau kan ueh, rgop n’hâm soan, drăp ndơ ân nau hun hao nkuăl rnoi mpôl đê̆, gol yôk ndrel gôl dak bah Tơm prăk kơl an bah ăp năm ma aơ.

Kruanh Quốc hội ŭch, ăp kon se, sinh viên, ăp nŭih nai nti mom ƀư ueh nau ntĭnh bah Kruanh Hồ Chí Minh tâm săm ƀŭt njoăl kon se nti di nar ntơm lăp năm nti “Neh dak Việt Nam geh dơi ueh lăng đŏng lah mô, rnoi mpôl Việt Nam geh dơi choat jâng tât nau ueh ang gay ma tâm ban ma neh dak prăm nkuăl neh đŏng lah mô, nê lah rnơm du gưl têh tâm nau kan ntĭm nti bah ăp oh”. Kruanh Quốc hội Trần Thanh Mẫn, đă:

 “Ăp rmôt, ăp nŭih geh ndơn nau nkhôm ƀư ueh ăp nau tă dơi geh, lŏ nsôih rgop n’hâm soan, bôk rngok ân nau ndâk ƀon lan, ƀon tơm, neh dak nar lơn ma ueh. Di rnôk aơ, gâp đă Trung ương Đoàn lŏ kơl an rđau đă, pơk trong nơih gay tơm prăk nkhôm Vừ A Dính rêng dăng lơn, đah nuih n’hâm tâm rnglăp, tâm pă, tâm kơl, năn kơl an, bonh đă, rgop nau hun hao, ƀư ueh nau geh dơi, nau dăng bah nŭih rnoi mpôl đê̆, gôl yôk ndrel gôl dak, rgop nau ndâk nŭih mom geh nau blau, tŏng dơi nau ŭch nau kan rgâl mhe ăp ntil bah neh dak”.

Kruanh Quốc hội kŏ mbơh, Đảng, Ngih dak nsŭn n’hâm gay ntuh kơl âk lơn tay ân nkuăl rnoi mpôl đê̆. Quốc hội hŏ ntrŭnh ăp nau ntrŭnh mpeh 3 bôk nau kan nkô̆ nau bah neh dak nê lah Ndâk njêng ƀon lan mhel hun hao văng sa, rêh jêng nkuăl rnoi mpôl đê̆ ndrel gôl yôk; jut jăng ach o nâp nâl. Rnôk aơ, Chính phủ dôl nsôih ƀư nau kan aơ./.